ເຈົ້າແມ່ນຄົນປະເພດ "ເວົ້າໄດ້" ຫຼື "ໄດ້ເວົ້າ"

..."ອາຈານ ຄົນທຸກມື້ນີ້ເວົ້າບໍ່ຄ່ອຍຄິດໜ້າ ຄິດຫຼັງເນາະ ເວົ້າໄວ ປາກໄວ ຄົນຟັງກໍຮູ້ສຶກບໍ່ຄ່ອຍດີໄປນຳ"...😒

..."ໂດຍ...ເຫັນດີນຳ...ທຳມະຊາດຂອງຄົນເຮົາປາກໄວກວ່າຄວາມຄິດ ຄິດແນວໃດ ກະເວົ້າແນວນັ້ນ ຍ້ອນຄົນທຸກມື້ນີ້ຢູ່ໃນສະພາບແວດລ້ອມທີ່ຕ້ອງຟ້າວ ຕ້ອງໄວ ຕ້ອງທັນໃຈ ອົດທົນບໍ່ໄດ້ ຢາກໄດ້ຫຍັງກໍຕ້ອງໄດ້ທັນທີ"...😌

..."ແມ່ນເດ້ເນາະອາຈານ...ຢາກຮູ້ເລື່ອງຫຍັງກະໄດ້ຮູ້ ຢາກເບິ່ງເລື່ອງຫຍັງກະໄດ້ເບິ່ງ ຢາກໄດ້ເຄື່ອງແນວໃດ ກະຊອກເອົານຳອິນເຕີເນັດ ແລ້ວກະສັ່ງໃຫ້ມາສົ່ງຢູ່ເຮືອນ...ຊີວິດມັນກະເລີຍງ່າຍ ສະບາຍ ໄດ້ຫຍັງກະໄດ້ມາແບບໄວໄວ ງ່າຍໆ...ເປັນຢູ່ເລື່ອຍໆ ກະເລີຍຄຸ້ນຊິນ ກາຍເປັນນິໄສໄປຈ້ອຍ...ຢາກລົມກັບໄຜກໍແຊດຫາ ພິມເອົາ ບໍ່ຕ້ອງໄດ້ເວົ້າຍາກ ຕິດແນວໃດກະພິມແນວນັ້ນ ສົ່ງມາໄວ ກະຕອບໄປໄວ...ພໍຍາມມາເວົ້າ ກະເວົ້າແບບແຊທຫາກັນ"...


..."ແມ່ນແລ້ວ ເລື່ອງການເວົ້າກໍເປັນເລື່ອງໜຶ່ງທີ່ເຮົາເຫັນຄວາມປ່ຽນແປງ ອາຈານຄິດວ່າ ຖ້າຄົນເຮົາປັບຕົວບໍ່ທັນກັບເຕັກໂນໂລຍີໃນທຸກມື້ນີ້ ກໍອາດຈະມີບັນຫາການນຳໃຊ້ບໍ່ຖືກທາງ ບໍ່ກໍ່ໃຫ້ເກີດປະໂຫຍດທີ່ສ້າງສັນ ຈະເປັນບັນຫາໃຫຍ່ຕໍ່ໄປໃນອະນາຄົດອັນໃກ້ນີ້"...

...ເລື່ອງການເວົ້ານີ້ ຖ້າພິຈາລະນາດີໆ ກໍມີສອງແບບ ແມ່ນເວົ້າດີ ກັບເວົ້າບໍ່ດີ...ແລະ ຖ້າເຈາະຈິ້ມລົງໄປອີກ ເຮົາກໍຈະເຫັນການເວົ້າຢູ່ 3 ລະດັບ...

...ລະດັບທີ່ 1 ແມ່ນ "ເວົ້າໄດ້" ລະດັບນີ້ເປັນລະດັບພື້ນຖານທີ່ຄົນທຸກຄົນພຶງມີ ພຶງໄດ້ມາ ຕາມກົດເກນຂອງທຳມະຊາດ ຢາກເວົ້າຫຍັງກໍເວົ້າຕາມໃຈຕົວເອງ ຕາມຄວາມຄິດຂອງຕົວເອງ ສ້າງສັນແດ່ ບໍ່ສ້າງສັນແດ່ ເຮັດໃຫ້ຄົນພໍໃຈແດ່ ບໍ່ພໍໃຈແດ່...ຖ້າເວົ້າດີ ກໍດີໄປ...ຖ້າເວົ້າໄດ້ບໍ່ດີ ບໍ່ມີສາລະ ບໍ່ມີເນື້ອໃນ ເວົ້າແລ້ວຄົນອື່ນບໍ່ເຂົ້າໃຈ ຂາດສະຕິໃນການເວົ້າ ເອົາແຕ່ຄວາມມ່ວນຂອງຕົວເອງ ບໍ່ຄິດຫາຜູ້ອື່ນວ່າເຂົາເຈົ້າຈະຮູ້ສຶກແນວໃດ ເຂົາຮ້ອງວ່າ "ໄດ້ເວົ້າ" ແຕ່ຖ້າຄວາມເສຍຫາຍຈາກການ "ໄດ້ເວົ້າ" ເກີດຂຶ້ນຢ່າງຫຼວງຫຼາຍ ກໍສູ້ບໍ່ເວົ້າຈະດີກວ່າ...😊

...ລະດັບທີ່ 2 ແມ່ນ "ເວົ້າເປັນ" ລະດັບນີ້ຈະມີວາດມີຊົງຂຶ້ນມາ ຮູ້ວ່າຈະເວົ້າເລື່ອງຫຍັງ ເວົ້າໃນອາລົມແບບໃດ ເວົ້າໃຫ້ຜູ້ໃດຟັງ ເຂົາເຈົ້າຢາກຟັງບໍ່ ເວົ້າຍາມໃດ ເວົ້າຢູ່ໃສ ເວົ້າແລ້ວຈະເກີດປະໂຫຍດຫຼືບໍ່...ຂັ້ນນີ້ຖືວ່າມີສະຕິ ມີຄວາມເປັນຜູ້ໃຫຍ່ຫຼາຍແລ້ວ ນີ່ຄືໃນມຸມດີ...ແຕ່ຖ້າເປັນມຸມບໍ່ດີ ໃຊ້ການເວົ້າຫາປະໂຫຍດໃສ່ຕົວເອງ ບໍ່ຄິດເຖີງຄວາມເສຍຫາຍຕໍ່ຜູ້ອື່ນ ແບບນີ້ຮ້ອງວ່າ ປາກເປັນ...😃

...ລະດັບທີ່ 3 ແມ່ນ "ເວົ້າຖືກ" ຂັ້ນສູງສຸດຂອງການເວົ້າ...ຄິດກ່ອນເວົ້າ ຮູ້ວ່າເວົ້າແລ້ວ ຈະເກີດປະໂຫຍດແທ້ຈິງ ຈຶງເວົ້າ ຖ້າຄິດວ່າຈະມີຄວາມເສຍຫາຍ ກໍຈະບໍ່ເວົ້າ...ເຂົ້າໃຈຄວາມຮູ້ສຶກຂອງຄົນຟັງ ຄົນໄດ້ຍິນ ຮູ້ຈັກເອົາໃຈເຂົາມາໃສ່ໃຈເຮົາ...😇

...ໃນຊີວິດຈິງ ກໍຄົງຕ້ອງຕັ້ງສະຕິໃນການເວົ້າ ຕ້ອງຈຳໄວ້ວ່າ ຄິດກ່ອນເວົ້າ ຍ້ອນວ່າ ເວົ້າອອກໄປແລ້ວ ມັນເອົາຄືນມາບໍ່ໄດ້...ໄດ້ຍິນ ໄດ້ເຫັນ ໃຫ້ເອົາໃຈຟັງ ໃຫ້ເອົາໃຈເບິ່ງ ກັ່ນຕອງກ່ອນ ຈັ່ງເວົ້າອອກມາ ຫຼື ຖ້າພິຈາລະນາແລ້ວວ່າບໍ່ຄວນເວົ້າກະມິດໄປສາ...

...ເຈົ້າເດ...ການປາກເວົ້າຂອງເຈົ້າ ຢູ່ໃນລະດັບໃດ...