 |
| ສິ່ງທີ່ຕ້ອງປະເມີນໃນເລື່ອງວັດທະນະທຳອົງກອນ |
...ເນື້ອໃນຂ້າງລຸ່ມນີ້ ມາຈາກຕອນທີ່ເວົ້າເຖີງເລື່ອງນີ້..."ວັດທະນະທຳອົງກອນ"...
“...ຍ້ອນຫຍັງຜູ້ຂຽນຈຶງໃຫ້ຄວາມສຳຄັນກັບເລື່ອງນີ້ຫຼາຍສຸດ ຍ້ອນວ່າ ວັດທະນະທຳອົງກອນ ເປັນຕົວເຊື່ອມສານຄວາມແຕກຕ່າງທາງດ້ານຄວາມຄິດ
ວິຖີຊີວິດຂອງພະນັກງານທີ່ຫຼາກຫຼາຍໃນອົງກອນ ນອກຈາກນັ້ນ ຍັງເປັນພື້ນຖານໃນການກຳນົດຈັນຍາບັນຂອງການເຮັດວຽກຂອງອົງກອນ...ບໍ່ແມ່ນເລື່ອງງ່າຍ ແລະ ບໍ່ແມ່ນເລື່ອງຍາກ ທີ່ຈະສ້າງວັດທະນະທຳອົງກອນຂຶ້ນມາ
ໂດຍການຮ່ວມແຮງຮ່ວມໃຈກັນຂອງຄົນໃນອົງກອນ...ຕ້ອງສ້າງບັນຍາກາດທີ່ເອື້ອອຳນວຍໃຫ້ພະນັກງານໄດ້ມີຄວາມກ້າວໜ້າໃນໜ້າທີ່ການງານ
ເຕີບໃຫຍ່ທາງຄວາມຄິດ ທາງປັນຍາ ແລະ ວຸດທິພາວະ (Maturity) ຖ້າວັດທະນະທຳອົງກອນມີຄວາມຊັດເຈນ
ພະນັກງານກໍຮູ້ທິດທາງວ່າຈະພັດທະນາຕົວເອງໄປທາງໃດ ແລະ ຈະພາກັນພັດທະນາອົງກອນໄປທາງໃດ...ຕົວຢ່າງວັດທະນະທຳອົງກອນ
ເປັນອົງກອນທີ່ແນໃສ່ການຮຽນຮູ້ ແລະປ່ຽນແປງຈາກພາຍໃນ, ເປັນອົງກອນທີ່ສະໜັບສະໜຸນໃຫ້ພະນັກງານໄດ້ສະແດງຄຳຄິດຄຳເຫັນຢ່າງອິດສະຫຼະ, ເປັນອົງກອນທີ່ເຮັດວຽກແບບຄອບຄົວ ພີ່ນ້ອງ...”
...ຢາມເວົ້າເຖີງວັດທະນະທຳອົງກອນນີ້
ຜູ້ຂຽນຄິດເຫັນພາບຂອງພະນັກງານໃນຫ້ອງການຍິ້ມ-ມ່ວນ-ຊວນຫົວ ບັນຍາກາດໃນຫ້ອງການດີ
ຫົວໜ້າມີຄວາມເປັນກັນເອງ ທີມງານໃຫ້ຄວາມເຄົາລົບ ມີຫຍັງກໍລົມກັນ ປຶກສາຫາລືກັນ ເຮັດໃຫ້ເຮົາໄດ້ສຳຜັດ ແລະ ຮູ້ສຶກເຖີງແກ່ນທີ່ເປັນບ່ອນຍຶດ ບ່ອນອິງ
ຂອງທຸກຄົນໃນອົງກອນ...
...ການປະເມີນວັດທະນະທຳຂອງອົງກອນ
ຈະມີຄວາມລະອຽດອ່ອນແດ່ ຍ້ອນວ່າ ເປັນເລື່ອງທີ່ຈັບຕ້ອງບໍ່ໄດ້ ເຊິ່ງຕ້ອງອາໄສການສັງເກດການສະແດງອອກ,
ບັນຍາກາດໃນອົງການ ການພົວພັນກັນຂອງສະມາຊິກໃນອົງກອນ...ບາງທ່ານກໍບອກວ່າ ວັດທະນະທຳອົງກອນທີ່ດີ
ແມ່ນ ສະມາຊິກຂອງອົງກອນທຳດີດ້ວຍຈິດສຳນຶກຂອງຕົວເອງ...ບາງທ່ານກໍສົມທຽບວັດທະນະທຳອົງກອນເປັນ
ນ້ຳ ສະມາຊິກເປັນຕົວປາ ຖ້ານ້ຳບໍ່ສະອາດ ເອົາມາລ້ຽງປາທີ່ແຂັງແຮງ ຮອດມື້ໜຶ່ງປາກໍຈະຢູ່ບໍ່ໄດ້
ຈົນມີຄຳເວົ້າວ່າ ການລ້ຽງປາ ສົມທຽບໄດ້ກັບການລ້ຽງນ້ຳ ວ່າຊັ້ນ...
...ຈາກປະສົບການຂອງຜູ້ຂຽນໃນການປະເມີນວັດທະນະທຳອົງກອນ
ຜູ້ຂຽນຈະເບິ່ງຢູ່ 3 ເລື່ອງ...ເລື່ອງທີ່ໜຶ່ງ ແມ່ນ
ເບື້ອງຫຼັງຄວາມສຳເລັດຂອງອົງກອນ ແມ່ນມີປັດໄຈຫຍັງແດ່ທີ່ຜ່ານມາ...ເລື່ອງທີ່ສອງ ແມ່ນ ສິ່ງທີ່ອົງກອນຊ່ວຍກັນສ້າງຂຶ້ນມາໃນປະຈຸບັນທີ່ຈະສົ່ງຜົນຕໍ່ຄວາມສຳເລັດໃນອະນາຄົດ...ແລະເລື່ອງທີ່ສາມ
ແມ່ນ ເປົ້າໝາຍຂອງອົງກອນທີ່ຈະພັດທະນາ ຜັນຂະຫຍາຍສິ່ງດີໆ ໃຫ້ເກີດຂຶ້ນຕໍ່ເນື່ອງ
ແມ່ນມີຫຍັງແດ່...ດັງນັ້ນ ແນວຄຳຖາມໃນການປະເມີນ ກໍຈະມີດັງນີ້...
...ການປະເມີນ
ປັດໄຈທີ່ຢູ່ເບື້ອງຫຼັງຄວາມສຳເລັດຂອງອົງກອນ...ໃນເລື່ອງນີ້ ເຮົາຕ້ອງການປະເມີນສິ່ງທີ່ມີຜົນຕໍ່ຄວາມສຳເລັດໃນອະດີດ...ຖ້າວ່າໄປແລ້ວ
ກໍຈະມີຫຼັກການເບິ່ງ 4 ມິຕິ ແມ່ນ ແນວຄິດ, ຫົວໜ້າ, ພະນັກງານ ແລະ ບັນຍາກາດ...
- ມີແນວຄິດຫຍັງແດ່ ທີ່ທຸກຄົນໃຊ້ເປັນບ່ອນອິງ ແລະເຮັດໃຫ້ອົງກອນປະສົບຄວາມສຳເລັດໄດ້?
- ພຶດຕິກຳຂອງຫົວໜ້າອົງກອນ ມີເລື່ອງຫຍັງແດ່ ທີ່ສົ່ງຜົນຕໍ່ຄວາມສຳເລັດຂອງອົງກອນ?
- ພຶດຕິກຳຂອງພະນັກງານ ມີເລື່ອງຫຍັງແດ່ ທີ່ສົ່ງຜົນຕໍ່ຄວາມສຳເລັດຂອງອົງກອນ?
- ບັນຍາກາດໃນອົງກອນເປັນແນວໃດ ທີ່ສົ່ງຜົນໃຫ້ທຸກຄົນຮ່ວມແຮງ ຮ່ວມໃຈກັນ ຈົນອົງກອນເຮັດວຽກໄດ້ສຳເລັດ?
...ການປະເມີນ
ສິ່ງທີ່ອົງກອນຊ່ວຍກັນສ້າງຂຶ້ນມາໃນປະຈຸບັນທີ່ຈະສົ່ງຜົນຕໍ່ຄວາມສຳເລັດໃນອະນາຄົດ...
- ແນວຄິດໃດແດ່ ທີ່ຖືກນຳໃຊ້ໃນປະຈຸບັນ ຍ້ອນຄິດວ່າເປັນສິ່ງທີ່ຈະເຮັດໃຫ້ເກີດຄວາມສຳເລັດຂຶ້ນໄດ້ໃນອະນາຄົດ?
- ໄດ້ມີການກຳນົດພຶດຕິກຳຂອງຫົວໜ້າອົງກອນໄວ້ແດ່ບໍ່ ວ່າມີແນວໃດທີ່ຕ້ອງເຮັດ ຕ້ອງພັດທະນາ ເພື່ອຮັບປະກັນວ່າຈະສາມາດນຳພາອົງກອນໄປສູ່ຄວາມສຳເລັດໄດ້? ແລະເຮັດແນວໃດ?
- ໄດ້ມີການກຳນົດພຶດຕິກຳຂອງພະນັກງານໄວ້ແດ່ບໍ່ ວ່າຄວນຕ້ອງມີແນວໃດທີ່ຕ້ອງເຮັດ ຕ້ອງພັດທະນາ ເພື່ອຮັບປະກັນວ່າຈະສາມາດນຳພາອົງກອນໄປສູ່ຄວາມສຳເລັດໄດ້? ແລະເຮັດແນວໃດ?
- ຕ້ອງມີການປັບປຸງ ແລະ ພັດທະນາບັນຍາກາດໃນອົງກອນ ເລື່ອງໃດແດ່? ແລະ ຈະເຮັດໄດ້ແນວໃດ?
...ການປະເມີນ
ເປົ້າໝາຍຂອງອົງກອນທີ່ຈະພັດທະນາ ຜັນຂະຫຍາຍສິ່ງດີໆ ໃຫ້ເກີດຂຶ້ນຕໍ່ເນື່ອງ...
- ມີແນວຄິດແນວໃດແດ່ ທີ່ຈະຮັກສາແນວດີໆ ທີ່ເກີດຂຶ້ນໃນອົງກອນ ໃຫ້ສາມາດສືບຕໍ່ໄປໄດ້?
- ມີຂະບວນການ ວິທີການໃດແດ່ ທີ່ຈະເຮັດໃຫ້ພຶດຕິກຳທີ່ດີຂອງສະມາຊິກໃນອົງກອນຍັງຄົງຢູ່ ໃຫ້ດີຕໍ່ເນື່ອງ ແລະ ພັດທະນາໃຫ້ດີຂຶ້ນເລື່ອຍໆ...ສະມາຊິກໃນອົງກອນ ກໍໝາຍເຖີງ ຫົວໜ້າ, ພະນັກງານ ເວົ້າໃຫ້ງ່າຍກໍຄືທຸກຄົນໃນອົງກອນ.
- ອົງກອນຈະເຮັດແນວໃດແດ່ ມີຂະບວນການ ມີວິທີການແນວໃດແດ່ ທີ່ຈະຮັກສາບັນຍາກາດທີ່ດີໃນອົງກອນ ໃຫ້ສືບຕໍ່ໄປໄດ້ໃຫ້ດົນທີ່ສຸດເທົ່າທີ່ຈະເຮັດໄດ້?
...ຫວັງວ່າທ່ານຈະໄດ້ແນວທາງໃນການປະເມີນວັດທະນະທຳອົງກອນໃນອີກມຸມໜຶ່ງ ຖືວ່າເປັນການເພິ່ມຕຶ່ມມຸມມອງ ເຮັດໃຫ້ເຮົາສາມາດປະເມີນໄດ້ຢ່າງຮອບດ້ານ ຫຼາກຫຼາຍຂຶ້ນ...ກໍເປັນເລື່ອງຍາກຢູ່ ທີ່ຈະວັດສິ່ງທີ່ຈັບຕ້ອງບໍ່ໄດ້ ແຕ່ຖ້າເຮົາສັງເກດດີໆ ແລະໃຫ້ຄວາມໃສ່ໃຈກັບລາຍລະອຽດ ເຮົາກໍຈະເຫັນບ່ອນໄປບ່ອນມາຂອງວັດທະນະທຳຂອງອົງກອນໄດ້ຊັດເຈນຂຶ້ນ ຄ້າຍຄືກັບເຮົາກຳລັງຕໍ່ຈິີ້ກຊໍ (Jigsaw) ພາບໃຫຍ່ຈະຢູ່ໃນຫົວເຮົາຕະຫຼອດເວລາ ໃນຂະນະທີ່ສາຍຕາຂອງເຮົາຕ້ອງຊອກຫາຊິ້ນສ່ວນຕ່າງໆ ມາຕໍ່ກັນເພື່ອໃຫ້ໄດ້ພາບໃຫຍ່ນັ້ນ...ວັດທະນະທຳອົງກອນກໍຄືກັນ ເຮົາຮູ້ຢູ່ວ່າວັດທະນະທຳອົງກອນທີ່ດີເປັນແນວໃດ ດັງນັ້ນ ການປະເມີນກໍຄ້າຍຄືເຮົາກຳລັງຄ່ອຍໆ ຊອກຫາປັດໄຈ ຊອກຫາອົງປະກອບຕ່າງໆ ມາຕໍ່ກັນ ເພື່ອໃຫ້ເຫັນຄວາມສຳພັນຂອງອົງປະກອບເຫຼົ່ານັ້ນ ແລະ ເປັນສິ່ງທີ່ຍືນຍັນວ່າ ວັດທະນະທຳອົງກອນນັ້ນ ມີຢູ່ຈິງ ແລະ ສົ່ງຜົນຕໍ່ຄວາມເປັນອົງກອນ ສົ່ງຜົນຕໍ່ພະນັກງານທຸກຄົນຢ່າງເປັນເຫດເປັນຜົນ...😃
ຜູ້ສະໜັບສະໜຸນ “ການເຮັດຄວາມດີ”
ຢ່າງເປັນທາງການ...
ສຳລັບອົງກອນເຮົາແມ່ນຈະມີຄວາມຍືດຍຸ່ນ, ເປັນອັນດຽວກັນ, ມີຄວາມສາມະຄີ, ການເຮັດວຽກທີ່ຮູ້ສຶກອົບອຸ່ນ ແລະ ສາມາດແລກປ່ຽນໄດ້ທຸກເລື່ອງ
ตอบลบ