 |
| ອົງປະກອບຂອງອົງກອນທີ່ມີຄວາມຍືນຍົງ |
...ຖ້າທ່ານຕ້ອງການທວນຄືນເລື່ອງການປະເມີນຂີດຄວາມສາມາດອົງກອນ ທ່ານສາມາດອ່ານໄດ້ໃນບົດຄວາມຕອນ ຖ້າຄິດຈະພັດທະນາອົງກອນ ຂໍເຊີນເບິ່ງເລື່ອງນີ້ກ່ອນເດີ້...
...ຖ້າເວົ້າເຖີງເລື່ອງຊື່ສຽງຂອງອົງກອນໃດໜຶ່ງ ຊີເຮັດໃຫ້ເຮົາໄດ້ເຫັນຄວາມຫຼາກຫຼາຍຂອງຈຸດເດັ່ນ ຈຸດດີ ຂອງອົງກອນນັ້ນໆ ນັບຕັ້ງແຕ່ຫົວໜ້າອົງກອນ, ຮູບແບບການບໍລິຫານ ການຈັດການອົງກອນ, ຄວາມເປັນທີມງານ, ຄວາມຄິດຄວາມເຊື່ອຂອງອົງກອນ, ການດູແລເບິ່ງແຍງກັນຂອງຄົນໃນອົງກອນ, ວັດທະນະທຳຂອງອົງກອນ, ການໃຫ້ບໍລິການຂອງອົງກອນ, ຄວາມຮູ້ຄວາມສາມາດຂອງອົງກອນ ຫຼື ຖ້າຈະເວົ້າໃຫ້ງ່າຍໆ ຕາມສະໄຕລຜູ້ຂຽນ ກໍຈະບອກວ່າ ທຸກເລື່ອງຂອງອົງກອນຫັ້ນລ່ະ ທີ່ປະສົມປະສານກັນຂຶ້ນມາເປັນຊື່ສຽງຂອງອົງກອນ...
...ໂດຍປົກກະຕິແລ້ວ ການມີຊື່ສຽງຈະເກີດຂຶ້ນມາໄດ້ ຕ້ອງປະກອບໄປດ້ວຍ 2 ເລື່ອງ ແມ່ນ ຄວາມພຶງພໍໃຈຂອງຜູ້ຮັບບໍລິການ ແລະ ຄວາມນ່າເຊື່ອຖືຂອງອົງກອນ ເຊິ່ງມີຄວາມສຳພັນກັນຈົນບໍ່ສາມາດແຍກອອກຈາກກັນໄດ້ ຢາມເຮົາປະເມີນເລື່ອງຊື່ສຽງອົງກອນ...
...ຄວາມພຶງພໍໃຈຂອງຜູ້ຮັບບໍລິການ ຈະກ່ຽວຂ້ອງກັບການຮັບຮູ້ຂອງຜູ້ຮັບບໍລິການ ເປັນເລື່ອງຄວາມຮູ້ສຶກຂອງຜູ້ຮັບບໍລິການຕໍ່ຄວາມເປັນອົງກອນ ແລະ ການໃຫ້ບໍລິການ...
...ຄວາມນ່າເຊື່ອຖືຂອງອົງກອນ ຈະເປັນເລື່ອງຄວາມຮູ້ ຄວາມສາມາດຂອງອົງກອນທີ່ມີ ແລະ ສົ່ງອອກມາໃນຮູບຂອງການໃຫ້ບໍລິການ ສົ່ງຜົນຕໍ່ການຮັບຮູ້ຂອງຜູ້ຮັບບໍລິການ ວ່າ ອົງກອນນີ້ນ່າໄວ້ໃຈ ເຊື່ອຖືໄດ້ ນ່ານັບຖື...
...ດັງນັ້ນ ຈາກປະສົບການຂອງຜູ້ຂຽນ ພົບວ່າ ແນວຄຳຖາມທີ່ໃຊ້ໃນການປະເມີນຈະແນໃສ່ການວິເຄາະຕົວເອງຂອງອົງກອນ ແລະ ຈະຕ້ອງມີການປະເມີນມຸມມອງຂອງຄົນພາຍນອກນຳ ເພື່ອນຳມາປະກອບກັບຂໍ້ມູນພາຍໃນອົງກອນ ເຮັດໃຫ້ເຮົາໄດ້ເຫັນພາບຊັດເຈນຂຶ້ນ...
...ຄຳຖາມຫຼັກໆ ທີ່ໃຊ້ໃນການປະເມີນຊື່ສຽງຂອງອົງກອນ ກໍຈະມີດັງນີ້...
- ພາບລັກຂອງອົງກອນໃນສາຍຕາຂອງຄົນທົ່ວໄປ ເປັນແນວໃດແດ່? ມີັຫຍັງດີແດ່ ມີຫຍັງທີ່ຕ້ອງປັບປຸງແດ່?
- ມີເລື່ອງດີໆ ຫຍັງແດ່ ທີ່ຜູ້ຮັບບໍລິການໄດ້ເວົ້າເຖີງ? ເລື່ອງຄົນ, ເລື່ອງວຽກ, ເລື່ອງການບໍລິຫານຈັດການອົງກອນ...
- ມີການບໍລິການດ້ານໃດແດ່ ທີ່ຜູ້ຮັບບໍລິການຍອມຮັບວ່າອົງກອນເຮັດໄດ້ດີ?
- ຄວາມຮູ້ ຄວາມສາມາດຂອງອົງກອນດ້ານໃດແດ່ ທີ່ຜູ້ຮັບບໍລິການເວົ້າເຖີງຫຼາຍ ແລະ ພຶງພໍໃຈກັບຄວາມຮູ້ຄວາມສາມາດຂອງອົງກອນ?
- ອົງກອນມີການປະເມີນການສະທ້ອນຄືນເລື່ອງການບໍລິການຂອງອົງກອນຫຼືບໍ່? ຖ້າມີ ຜົນທີ່ໄດ້ເປັນແນວໃດ?
- ອົງກອນໄດ້ມີການເກັບກຳສະຖິຕິຫຼືບໍ່ ກ່ຽວກັບຈຳນວນຜູ້ຮັບບໍລິການໃນແຕ່ລະຊ່ວງເວລາ?
- ພະນັກງານຂອງອົງກອນມີຄຳຄິດເຫັນແນວໃດແດ່ ຕໍ່ເລື່ອງຊື່ສຽງຂອງອົງກອນ? ເຫັນດີນຳກັນ ຫຼື ບໍ່ແນ່ໃຈ?
...ຊື່ສຽງຂອງອົງກອນທີ່ໄດ້ມາ ບໍ່ແມ່ນໄດ້ມາງ່າຍໆ ຕ້ອງໃຊ້ເວລາ ໃຊ້ທັ້ງແຮງກາຍ ແຮງໃຈຂອງພະນັກງານທຸກຄົນສ້າງຮ່ວມກັນມາ ດັງນັ້ນ ການປະເມີນຊື່ສຽງຈຶງເປັນອີກເລື່ອງໜຶ່ງທີ່ເຮົາໃຫ້ຄວາມສຳຄັນ ຍ້ອນວ່າ ຈະເຮັດໃຫ້ເຮົາໄດ້ເຫັນຄວາມເຊື່ອມໂຍງ ແລະ ດຸນດ່ຽງຂອງທຸກເລື່ອງທີ່ມີໃນອົງກອນ ທີ່ປະກອບກັນຈົນສ້າງຊື່ສຽງໃຫ້ອົງກອນນັ້ນເອງ...😄
ไม่มีความคิดเห็น:
แสดงความคิดเห็น