ເຮົາມາຊ່ວຍກັນກວດສຸຂະພາບອົງກອນຂອງເຮົາກັນເຖາະ...

...ຄິດໄປຄິດມາ ຕາຍລ່ະ😓 ປີນີ້ຍັງບໍ່ໄດ້ໄປກວດສຸຂະພາບເລີຍ ທັ້ງໆ ທີ່ຮູ້ວ່າ ການກວດສຸຂະພາບປະຈຳປີເປັນເລື່ອງທີ່ດີ ແລະ ອາຍຸປະມານສ່ຳເຮົານີ້ ກໍຖືວ່າຈຳເປັນສຸດໆ ແລ້ວ ຍ້ອນວ່າ ຄວາມເສື່ອມຂອງສັງຂານ ຄວາມເສື່ອມຂອງສະພາບຮ່າງກາຍທີ່ຖືກໃຊ້ງານມາຢ່າງດົນນານ ແລະ ໃຊ້ງານມາໜັກໜາ ມັນເລິ່ມສົ່ງຜົນໃຫ້ເຫັນເທືອລະນິດ ເທືອລະໜ້ອຍ ຖ້າບໍ່ມີການເບິ່ງແຍງຢ່າງຕໍ່ເນື່ອງ ອີກບໍ່ດົນກໍຄົງຈະຄືນໃຫ້ກັບທຳມະຊາດຂອງການເສື່ອມສະຫຼາຍ ແລະດັບໄປເປັນແນ່ແທ້...

...ຄົນເຮົານີ້ກໍແປກເນາະ ຖ້າບໍ່ມີຫຍັງທີ່ຜິດປົກກະຕິເກີດຂຶ້ນກັບຮ່າງກາຍ ກໍຄົງຈະບໍ່ໄດ້ຫັນມາໃຫ້ຄວາມສົນໃຈຢ່າງຈິງຈັງ ຜູ້ຂຽນກໍເປັນໜຶ່ງໃນຈຳນວນຫຼວງຫຼາຍທີ່ເປັນແບບນັ້ນ...😥

...ຈາກປະສົບການຂອງຜູ້ຂຽນເອງ ພົບວ່າ ຖ້າບໍ່ເຈັບປ່ວຍ ກໍຈະບໍ່ໄປຫາໝໍ ບໍ່ສົນໃຈວ່າຈະກິນຈະຢູ່ແນວໃດ ກິນຕາມໃຈຂ້ອຍ ຢາກແນວໃດກໍກິນແນວນັ້ນ ຢາກໃຊ້ຊີວິດແນວໃດກໍໃຊ້ໃຫ້ຄຸ້ມ ວ່າຊັ້ນ...ທັ້ງໆ ທີ່ໃນອີກມຸມໜຶ່ງ ການກິນ ການຢູ່ນັ່ນເອງ ທີ່ສົ່ງຜົນໂດຍກົງກັບສຸຂະພາບຂອງເຮົາຢ່າງຫຼີກໜີບໍ່ໄດ້ ມັນເປັນເລື່ອງດຽວກັນ ມີຄວາມສຳພັນກັນ...

...ມີເຫດຜົນຫຼາຍຢ່າງທີ່ຄົນເຮົາຍົກຂຶ້ນມາເປັນເຫດຜົນໃນການບໍ່ຕ້ອງກວດສຸຂະພາບປະຈຳປີ...ບໍ່ມີເວລາ...ບໍ່ມີຄົນພາໄປ...ເຮັດວຽກກ່ອນ...ຫາເງີນກ່ອນ...ຍັງບໍ່ປ່ວຍ ຄືຊີບໍ່ເປັນຫຍັງ...ຄ່າກວດສຸຂະພາບແພງຫຼາຍ...😞

...ຄິດໄປຫຼິ້ນໆ ຕໍ່ໄປອີກ ກໍຄິດໄປຮອດອົງກອນຕ່າງໆ ທີ່ບໍ່ໄດ້ແຕກຕ່າງຈາກຮ່າງກາຍຂອງເຮົາ ທີ່ມີການດຳລົງຊີວິດຄືກັນ...ມີອົງປະກອບຕ່າງໆ ປະສົມປະສານ ເຊື່ອມໂຍງ ຂັບເຄື່ອນການເຮັດວຽກ ໃຫ້ບັນລຸເປົ້າໝາຍທີ່ໄດ້ຕັ້ງໄວ້...ຄົນເຮົາມີເປົ້າໝາຍໃນການໃຊ້ຊີວິດຍືນຍາວ ໃຊ້ຊີວິດຄຸ້ມຄ່າ ແລະມີຄຸນນະພາບ...ອົງກອນກໍຄືກັນ ອົງກອນຕ້ອງມີເປົ້າໝາຍທີ່ຈະດຳເນີນການສິ່ງໃດໜຶ່ງ ເພື່ອໃຫ້ບັນລຸຕາມທີ່ໄດ້ຕັ້ງໄວ້ ໃຫ້ປັບຕົວຢູ່ກັບຄວາມປ່ຽນແປງ ແລະ ຢູ່ໄດ້ດົນໆ...ບໍ່ແຕກຕ່າງກັນເລີຍ...

...ຜູ້ຂຽນເບິ່ງວ່າ ອົງກອນ ກໍມີການເກີດ ການເຕີບໃຫຍ່ຂະຫຍາຍຕົວ ການຄົງຢູ່ ການເຈັບເປັນ ການດັບໄປ ການປັບປ່ຽນສະພາບ ຕາມເງື່ອນໄຂຂອງການເວລາຄືກັນກັບຄົນ ດັງນັ້ນ ຄືຊີບໍ່ເປັນການແປກປະຫຼາດ ທີ່ເຮົາຈະໄດ້ກວດສຸຂະພາບປະຈຳປີອົງກອນ ເພື່ອໃຫ້ຮູ້ວ່າອົງກອນມີສຸຂະພາບເປັນແນວໃດ ຊີມີແນວໃດຕ້ອງປິ່ນປົວ ຕ້ອງມີແນວໃດທີ່ຊີປ້ອງກັນບໍ່ໃຫ້ເກີດພະຍາດ ແລະ ມີແນວໃດທີ່ຈະເຮັດໃຫ້ອົງກອນເຂັ້ມແຂງ...

...ອາການທີ່ສະແດງອອກຂອງອົງກອນທີ່ມີສຸຂະພາບດີ ເຮົາກໍເບິ່ງຈາກໜ້າຕາຂອງພະນັກງານກ່ອນເປັນອັນດັບທຳອິດ...ພະນັກງານຍິ້ມແຍ້ມແຈ່ມໃສ ພະນັກງານມີຄວາມສຳພັນທີ່ດີຕໍ່ກັນພາຍໃນອົງກອນ ແລະ ກັບພາຍນອກອົງກອນ ຜູ້ໃດຍ່າງເຂົ້າມາໃນອົງກອນ ກໍຈະພົບບັນຍາກາດທີ່ດີ ເປັນກັນເອງ ອົບອຸ່ນ ພະນັກງານມີຄວາມຄິດສ້າງສັນ ຄິດຄົ້ນວຽກງານໄດ້ຕາມເງື່ອນໄຂ ຫົວໜ້າແລະພະນັກງານມີທ່າແຮງ ມີພາວະການນຳພາ ແລະ ມີຊື່ສຽງໃນທາງທີ່ດີ ເປັນທີ່ຍອມຮັບຂອງພາກສ່ວນຕ່າງໆ...ສິ່ງທີ່ເວົ້າມານັ້ນ ກໍເປັນຜົນສືບເນື່ອງຈາກອົງກອນມີຍຸດທະສາດທີ່ຊັດເຈນ ມີລະບົບການເຮັດວຽກ ສະໜັບສະໜຸນວຽກທີ່ເອື້ອອຳນວຍໃຫ້ພະນັກງານໄດ້ເຕີບໃຫຍ່ທາງຄວາມຄິດ ສະຕິປັນຍາ ແລະ ວຸດທິພາວະ...

...ສ່ວນອາການທີ່ສະແດງອອກວ່າອົງກອນເລິ່ມເຈັບເປັນ ກໍເບິ່ງຈາກພະນັກງານອີກຫັ້ນລ່ະ...ໜ້າຕາເຄັ່ງຕຶງ ບໍ່ລົມບໍ່ປຶກສາຫາລືກັນ ເຮັດວຽກໄຜລາວ ບໍ່ໄດ້ສົນໃຈທີ່ຈະຊ່ວຍສະໜັບສະໜຸນວຽກກັນ ບັນຍາກາດໃນອົງກອນກໍເຄັ່ງຕຶງ ນິນທາ ເວົ້າພື້ນກັນ ມີຄົນເຂົ້າມາກໍສຳຜັດກັບບັນຍາກາດທີ່ບໍ່ອົບອຸ່ນ ບໍ່ເປັນມິດ ຄວາມສຳພັນທັ້ງພາຍໃນແລະພາຍນອກອົງກອນມີແຕ່ທາງລົບ ມີຂ່າວລືທີ່ເຮັດໃຫ້ຊື່ສຽງເປັນໄປໃນທາງທີ່ບໍ່ດີ...ອາການແບບນີ້ ຈະເປັນຜົນມາຈາກອົງກອນມີຍຸດທະສາດທີ່ບໍ່ຊັດເຈນ ຫຼື ບໍ່ມີຍຸດທະສາດເລີຍ ລະບົບການເຮັດວຽກ ສະໜັບສະໜຸນວຽກບໍ່ມີປະສິດທິພາບ ບໍ່ສາມາດຕອບສະໜອງຄວາມຕ້ອງການຂອງກຸ່ມເປົ້າໝາຍ ແລະ ພະນັກງານຜູ້ປະຕິບັດຕົວຈິງ ຫົວໜ້າອົງກອນແລະພະນັກງານຂາດພາວະການນຳພາ...ອາການແບບນີ້ນ່າເປັນຫ່ວງຫຼາຍ...

...ອາການທີ່ວ່າມາທັ້ງດີ ແລະ ບໍ່ດີ ຜູ້ຂຽນເຊື່ອວ່າ ທຸກຄົນໃນອົງກອນຮູ້ຢູ່ແລ້ວ ແມ້ວ່າຈະບໍ່ໄດ້ເກີດຂຶ້ນກັບອົງກອນຂອງຕົວເອງ ກໍມີບົດຮຽນຈາກອົງກອນອື່ນໆ ທີ່ໃຫ້ເຮົາໄດ້ສຶກສາ ໄດ້ຮຽນຮູ້ມາທັ້ງນັ້ນ...ດັງນັ້ນ ເຮົາຕ້ອງມາເລິ່ມໃຫ້ຄວາມສຳຄັນແລະຈິງຈັງກັບການຮັກສາສຸຂະພາບອົງກອນ ໂດຍເລິ່ມຕົ້ນຈາກການກວດສຸຂະພາບອົງກອນ ເພື່ອປ້ອງກັນຄວາມເສຍຫາຍທີ່ຈະເກີດຂຶ້ນຈົນຮັບມືກັບຄວາມປ່ຽນແປງນັ້ນບໍ່ໄຫວ...ຖ້າອາການດີ ກໍຕ້ອງພະຍາຍາມຮັກສາໄວ້ ແລະ ສ້າງເສີມໃຫ້ເຂັ້ມແຂງຂຶ້ນຕື່ມ...ຖ້າເລິ່ມມີອາການບໍ່ດີ ກໍຕ້ອງປິ່ນປົວ ແລະ ຕ້ອງຫາທາງປ້ອງກັນແກ້ໄຊບໍ່ໃຫ້ເກີດຄວາມເສຍຫາຍ...ກ້າວໃຫ້ຂ້າມເງື່ອນໄຂຕ່າງໆ ບໍ່ວ່າຈະເປັນເລື່ອງຂໍ້ຈຳກັດຂອງງົບປະມານ ເລື່ອງວຽກຫຼາຍ ເລື່ອງບໍ່ມີເວລາ...ຖ້າບໍ່ຟ້າວເຮັດຕັ້ງແຕ່ຕອນນີ້ ເຮົາອາດຈະຕ້ອງໃຊ້ງົບປະມານຫຼາຍ ໃຊ້ເວລາຫຼາຍ ໃຊ້ກຳລັງຄົນຫຼາຍ ໃນການມານັ່ງແກ້ໄຂບັນຫາສຸຂະພາບອົງກອນ ທັ້ງໆ ທີ່ຮູ້ຢູ່ແລ້ວ ວ່າສາມາດປ້ອງກັນໄດ້...ນ່າເສຍດາຍເດ້ ຖ້າເປັນແບບນັ້ນ...😥  

...ເຮັດແນວໃດລ່ະບາດນີ້...ຕິດຕາມໄດ້ທີ່ບົດຄວາມເຫຼົ່ານີ້ເດີ້ 😄
ຖ້າຄິດຈະພັດທະນາອົງກອນ ຂໍເຊີນເບິ່ງເລື່ອງນີ້ກ່ອນເດີ້...
3 ເລື່ອງທີ່ຕ້ອງ "ເອົາໃຈ-ໃສ່" ໃນການປະເມີນຂີດຄວາມສາມາດຂອງອົງກອນ
ການປະເມີນລະບົບອົງກອນ 6 ດ້ານ...
ການປະເມີນຊື່ສຽງຂອງອົງກອນ
ການປະເມີນຄວາມສຳພັນຂອງອົງກອນກັບຄູ່ຮ່ວມງານ
ການປະເມີນຄຸນນະພາບການບໍລິການຂອງອົງກອນ
ການປະເມີນວັດທະນະທຳອົງກອນ

ຜູ້ສະໜັບສະໜຸນ “ການເຮັດຄວາມດີ” ຢ່າງເປັນທາງການ...

ມູນນິທິພັດທະນາອີສານ, ແຂວງສຸລິນ, ປະເທດໄທ... http://www.netsurin.org/