ສູດສຳເລັດນັ້ນມີຫຼາຍ ແຕ່ຈະສຳເລັດບໍ່ ນັ້ນແມ່ນອີກເລື່ອງນຶງ...ຕອນທີ່ 1

ບົດສົນທະນາລະຫວ່າງລູກສິດກັບອາຈານ ໃນເວລາອາຫານທ່ຽງຂອງວັນໜຶ່ງ...

ລູກສິດຖາມອາຈານ "ອາຈານ...ມີທາງລັດແດ່ບໍ່ ທີ່ຈະເຮັດໃຫ້ເຮົາປະສົບຄວາມສຳເລັດໃນຊີວິດ ແລະ ວຽກງານ?"

ອາຈານຕອບຄຳຖາມດ້ວຍຄວາມສະຫງົບນິ່ງ "ນ້ອງຄິດວ່າ ມີບໍ່..."

"ນ່າຈະມີຢູ່ອາຈານ....ການທີ່ຄົນເຮົາຈະພົບກັບຄວາມສຳເລັດ ແມ່ນຕ້ອງມີຄວາມຕັ້ງໃຈເດ້ເນາະ....ຕັ້ງໃຈແລ້ວຕ້ອງເຮັດໃຫ້ໄດ້...ມີການຕິດຕາມຜົນ...ນ້ອງຄິດວ່າແນວນັ້ນ...."

ອາຈານງຽບໄປໜ້ອຍໜຶ່ງ ແລະ ກໍຊົມເຊີຍລູກສິດວ່າ "ນ້ອງຄິດຖືກແລ້ວ...ຄົນເຮົາຕ້ອງມີຝັນ ມີຄວາມຕັ້ງໃຈ ມຸ່ງມັ່ນໃນສິ່ງທີ່ເຈົ້າຂອງເຊື່ອວ່າຈະນຳພາໄປສູ່ຄວາມສຳເລັດ..."

ລູກສິດເຮັດໜ້າຕາແບບຍັງບໍ່ເຂົ້າໃຈ ຄິ້ວຊົນກັນ.."ເລື່ອງແບບນີ້ ຄົນກະຮູ້ເດ້ ອາຈານ ແຕ່ຍ້ອນຫຍັງ ຄົນເຮົາຄືບໍ່ສຳເລັດກັນເບິ່ດທຸກຄົນ..."

ອາຈານຕອບດ້ວຍນ້ຳສຽງທີ່ສະບາຍໆ "...ຍ້ອນຄົນເຮົາບໍ່ຄືກັນ ບາງຄົນຝັນ ແຕ່ບໍ່ຮູ້ຊີໄປຮອດຝັນໄດ້ແນວໃດ...ຢາກຮຽນເກ່ງ ແຕ່ກໍບໍ່ອ່ານໜັງສື...ຢາກຮັ່ງມີ ແຕ່ກໍ່ຢູ່ລ້າໆ...ຢາກເປັນມືອາຊີບ ແຕ່ບໍ່ລົງມືຝຶກປະຕິບັດ ແລະຮຽນຮູ້...ມັນກະບໍ່ປະສົບຄວາມສຳເລັດຈັກເທືອ...."

ລູກສິດກະຍັງບໍ່ເຂົ້າໃຈ ແຕ່ພໍເຫັນແລ້ວວ່າ ຈະຕ້ອງມີແນວທາງທີ່ພໍເຮັດໄດ້ ກະເລີຍຖາມອາຈານວ່າ "ອາຈານເຮັດແນວໃດ ອາຈານຈຶ່ງມາຮອດມື້ນີ້ໄດ້"

ພໍໄດ້ຟັງຄຳຖາມຈາກລູກສິດ ອາຈານກໍຍິ້ມໜ້ອຍນຶງ ພ້ອມກັບຕອບຄຳຖາມວ່າ "ບໍ່ມີຫຍັງຍາກດອກ ຂໍໃຫ້ນ້ອງຕັ້ງສະຕິໃຫ້ດີ ແລະໃຊ້ສູດ ຕັ້ງເປົ້າໝາຍໃຫ້ຊັດເຈນ ວາງບາດກ້າວໃຫ້ແທດເໝາະ ແລະ ເຮັດໃຫ້ຕໍ່ເນື່ອງ ຢ່າໂຈະ ຢ່າຢຸດ...."

"ແມ່ນແນວໃດນໍ້ ອາຈານ..." ລູກສິດຖາມຂຶ້ນມາດ້ວຍຄວາມຢາກຮູ້...

"ໂດຍ...ກິນເຂົ້າສວຍແລ້ວ ເຮົາຄ່ອຍລົມກັນຕຶ່ມເນາະ ດ໋ຽວຊີໄປບໍ່ທັນປະຊຸມຕອນບ່າຍເດ...."

"ໂດຍ...ອາຈານ...."
😊