...ສະບາຍດີ...
...ສືບຕໍ່ຈາກຕອນທີ່ແລ້ວ...ເຮົາໄດ້ລົມກັນເລື່ອງ ການຊອກຫາ "ຄວາມປາດຖະໜາຂອງຊີວິດ" ໃນການໃຊ້ຊີວິດ...ມື້ນີ້ຈະມາລົມກັນຕໍ່ ເລື່ອງ "ວິຊາຊີບ"...
...ການຊອກຫາ "ວິຊາຊີບ" ແມ່ນການພິຈາລະນາ "ສິ່ງທີ່ເຮົາຖະໜັດ" ກັບ "ສິ່ງທີ່ເຮັດແລ້ວເກີດລາຍໄດ້"...ສອງສ່ວນນີ້ ຈະເປັນສ່ວນປະສົມປະສານທັກສະ ຄວາມຊຳນານຂອງເຮົາ ເຂົ້າກັບສິ່ງທີ່ເຮົາເຮັດແລ້ວເກີດລາຍໄດ້ຂຶ້ນມາ...ຫຼາຍຄົນບອກວ່າ ບາງເທືອ ການເຮັດສິ່ງທີ່ເປັນລາຍໄດ້ ກໍບໍ່ແມ່ນສິ່ງທີ່ເຮົາຖະໜັດສະເໝີໄປ...ໃນມຸມກົງກັນຂ້າມ ຖ້າເຮົາຄິດແລະພິຈາລະນາ ເອົາສິ່ງທີ່ເຮົາຖະໜັດ ມາສ້າງລາຍໄດ້ກັບເຮົາ ກໍຈະເປັນການດີຫຼາຍ...ດັງນັ້ນ ໃນຂັ້ນນີ້ ເຮົາຕ້ອງເບິ່ງຕົວເອງ ຢ່າຕັ໋ວະຕົວເອງ ທັກສະທີ່ເຮົາໃຊ້ເຮັດວຽກນັ້ນ ກໍມີພື້ນຖານຈາກສິ່ງທີ່ເຮົາຖະໜັດຢູ່ແລ້ວ..."ວິຊາຊີບ" ແມ່ນສິ່ງທີ່ເຮົາໄດ້ຮຽນຮູ້ມາຈາກໂຮງຮຽນ ຈາກມະຫາວິທະຍາໄລ ຈາກການອົບຮົມ ຈາກການຝຶກປະຕິບັດຕົວຈິງ ເກີດທັກສະຂຶ້ນມາໃນຫຼາຍໆ ດ້ານ ທັ້ງການຄິດ ການປະຕິບັດ ຖ້າພິຈາລະນາເບິ່ງໃຫ້ຄັກ ເຮົາກໍຈະເຫັນຄວາມສຳພັນກັນເປັນຕ່ອງໂຊ່ຢູ່...
...ຂໍຍົກຕົວຢ່າງຈາກຜູ້ຂຽນ ໃນການກຳນົດ "ວິຊາຊີບ" ຂອງຜູ້ຂຽນເອງ ຜູ້ຂຽນ "ຖະໜັດ" ເລື່ອງການຟັງຄົນ, ຟັງເພື່ອເຂົ້າໃຈຄົນ, ຖະໜັດເລື່ອງການເບິ່ງຄົນ ແລະ ສາມາດໄຈ້ແຍກໄດ້ວ່າ ຄົນຜູ້ນັ້ນມີບຸກຄະລິກ ລັກສະນະນິໄສແນວໃດ, ຖະໜັດເລື່ອງການສອນຄົນ ແບບໃຫ້ເຂົາເຈົ້າໄດ້ຄິດເອງ...ສ່ວນ "ສິ່ງທີ່ເຮັດແລ້ວ ສາມາດສ້າງລາຍໄດ້" ຂອງຜູ້ຂຽນ ກໍເປັນເລື່ອງການເປັນຄູຝຶກ, ການເປັນຜູ້ອຳນວຍຄວາມສະດວກໃນການຮຽນຮູ້, ການເປັນໂຄ້ຊ, ການເປັນທີ່ປຶກສາດ້ານການພັດທະນາບຸກຄະລາກອນ ແລະ ອົງກອນ...
...ເມື່ອນຳ "ຄວາມຖະໜັດ" ແລະ "ສິ່ງທີ່ເຮັດແລ້ວສາມາດສ້າງລາຍໄດ້" ມາພິຈາລະນາ ແລະ ປະສົມປະສານກັນ ຜູ້ຂຽນກໍຈະໄດ້ "ວິຊາຊີບ" ວ່າ ເປັນຄູຝຶກ, ເປັນໂຄ້ຊ, ເປັນທີ່ປຶກສາດ້ານການພັດທະນາບຸກຄະລາກອນ ແລະ ອົງກອນ...
...ຈາກຕົວຢ່າງ ເຮົາຈະໄດ້ເຫັນຄວາມສຳພັນ ແມ່ນ ພື້ນຖານຂອງ "ວິຊາຊີບ" ກໍມາຈາກ "ຄວາມຖະໜັດ" ຂອງເຮົາ ບໍ່ໂດຍທາງກົງ ກໍທາງອ້ອມ...
...ຕອນໜ້າ ເຮົາຈະມາເບິ່ງ ຂັ້ນທີ່ 3 ເພື່ອກຳນົດ "ຄຸນຄ່າຂອງວຽກເຮົາທີ່ໃຫ້ກັບສັງຄົມ" ທີ່ພາສາອັງກິດໃຊ້ຄຳວ່າ Vocation...
ไม่มีความคิดเห็น:
แสดงความคิดเห็น