ສູດສຳເລັດນັ້ນມີຫຼາຍ ແຕ່ຈະສຳເລັດບໍ່ ນັ້ນແມ່ນອີກເລື່ອງນຶງ...ຕອນທີ່ 2

...ການສົນທະນາທີ່ຕໍ່ເນື່ອງຂອງລູກສິດກັບອາຈານ ກໍເກີດຂຶ້ນອີກຄັ້ງ ຫຼັງຈາກທີ່ລູກສິດໄດ້ຖາມເຖີງສູດທີ່ຈະເຮັດໃຫ້ຄົນເຮົາປະສົບຄວາມສຳເລັດ

"ສູດທີ່ອາຈານບອກວ່າຕ້ອງຕັ້ງເປົ້າໝາຍໃຫ້ຊັດເຈນ ວາງບາດກ້າວໃຫ້ແທດເໝາະ ເຮັດໃຫ້ຕໍ່ເນື່ອງ ຢ່າໂຈະ ຢ່າຢຸດ...ມັນເປັນແນວໃດ໋ອາຈານ"

"ເຮົາມາເບິ່ງໄປເທືອລະໂຕເນາະ...ການຕັ້ງເປົ້າໝາຍໃຫ້ຊັດເຈນ ກໍແມ່ນການກຳນົດບ່ອນທີ່ເຮົາຈະໄປໃຫ້ຮອດ ບ່ອນທີ່ເຮົາຢາກເປັນ ບ່ອນທີ່ເຮົາຢາກເຫັນ ບ່ອນທີ່ເຮົາຢາກໃຫ້ເກີດຂຶ້ນ..."

"ອາຈານ...ຖ້າສົມທຽບກັບໂຄງການ ມັນແມ່ນຜົນທີ່ຈະເກີດຂຶ້ນພາຍຫຼັງໂຄງການຈົບ ແມ່ນບໍ່ອາຈານ?"

"ແມ່ນແລ້ວ ເປົ້າໝາຍຂອງໂຄງການ ນັ່ນຄືສິ່ງທີ່ເຮົາຢາກເຫັນຄວາມສຳເລັດ..."

"ຖ້າຈັ່ງຊັ່ນ ກະບໍ່ໄດ້ຍາກປານໃດ໋ດອກ ນ້ອງຄິດວ່າມັນມີຂະບວນການວິເຄາະຫຼາຍຢ່າງກວ່າຈະໄດ້ເປົ້າໝາຍຂອງໂຄງການມາ...ແຕ່ວ່າ ສິ່ງທີ່ນ້ອງສົນໃຈຫຼາຍນີ້ ແມ່ນການກຳນົດເປົ້າໝາຍຊີວິດນີ້ນາ ມັນຄືຍາກແທ້ຍາກວ່າ...ອາຈານຄິດຄືນ້ອງບໍ່?"

ອາຈານແນມເບິ່ງສີໜ້າລູກສິດແລ້ວ ກໍເຂົ້າໃຈເຖີງຄວາມຫຍຸ້ງຍາກໃຈທີ່ລູກສິດໄດ້ສະແດງອອກມາ....ອາຈານກໍເລີຍຕອບດ້ວຍນ້ຳສຽງລາບລຽບວ່າ "ການກຳນົດເປົ້າໝາຍຊີວິດຄົນເຮົາ ມັນກະບໍ່ຕ່າງຈາກການກຳນົດເປົ້າໝາຍຂອງໂຄງການດອກ ພຽງແຕ່ວ່າມັນມີຄວາມລະອຽດອ່ອນ ມີປັດໄຈທີ່ເຂົ້າມາກ່ຽວຂ້ອງຫຼາຍເລື່ອງ...ອາຈານເອງກໍເຄີຍທົດລອງກຳນົດເປົ້າໝາຍຊີວິດຕົວເອງໂດຍໃຊ້ຫຼາຍໆ ວິທີ ຕົວຢ່າງ ການຖາມຕົວເອງວ່າ ຖ້າມີເວລາຢູ່ອີກປີໜຶ່ງ ເຮົາຈະເຮັດຫຍັງ ອັນນີ້ພໍເຮັດໃຫ້ເຮົາວາງເປົ້າໝາຍໄລຍະສັ້ນໄດ້ ແຕ່ໃນໄລຍະຍາວ ອາຈານກໍຖາມຕົວເອງວ່າ ເຮົາເກີດມາເພື່ອຫຍັງ ມີເປົ້າໝາຍຊີວິດແນວໃດ..."

ລູກສິດສົງໄສແຮງ ກໍເລີຍຖາມອາຈານຄືນວ່າ "ເອີ້ ແມ່ນ ອາຈານ...ອາຈານເກີດມາເພື່ອຫຍັງ ມີເປົ້າໝາຍຫຍັງ....?" ລູກສິດກໍຖາມໄປ ຫົວໄປນຳ

ອາຈານກັບລູກສິດແນມເບິ່ງໜ້າກັນ ແລ້ວກະຫົວພ້ອມກັນ ອາຈານກໍຕອບວ່າ "ບໍ່ຮູ້ຄືກັນ..."

"ມັນມີສູດຢູ່ເດ້ນ້ອງ...ອາຈານກໍໄປອ່ານໜັງສືມາຫົວນຶງ ເຂົາບອກວ່າ ການກຳນົດເປົ້າໝາຍຊີວິດ ມັນກໍຈະມີ 4 ເລື່ອງ ທີ່ຕ້ອງພິຈາລະນາ ວ່າຊັ້ນ...ນ້ອງພໍເດົາໄດ້ບໍ່ ວ່າແມ່ນຫຍັງ..."

"ນ້ອງວ່າ ມີເງີນມີຄຳ ມີຄອບຄົວທີ່ອົບອຸ່ນ ມີໝູ່ມິດ ມີວຽກເຮັດທີ່ດີໆ ແມ່ນບໍ່ອາຈານ..."

"ອັນນັ້ນກະແມ່ນເປົ້າໝາຍ ຕາມຄວາມຄິດເຫັນຂອງນ້ອງ...ຕອນນີ້ລອງພິຈາລະນາເລື່ອງທີ່ອາຈານຈະເວົ້າໃຫ້ຟັງເດີ້... ເລື່ອງທີ່ໜຶ່ງ ແມ່ນນ້ອງຕ້ອງຮູ້ກ່ອນວ່າ ສິ່ງທີ່ນ້ອງຮັກແມ່ນຫຍັງ ຮັກທີ່ຈະເຮັດໂດຍບໍ່ຕ້ອງມີຜູ້ໃດມາບອກ. ເລື່ອງທີ່ສອງແມ່ນສິ່ງທີ່ນ້ອງຖະໜັດ ມີຄວາມຊຳນານ ເກີດຈາກການຝຶກປະຕິບັດແມ່ນຫຍັງ. ເລື່ອງທີ່ສາມແມ່ນເລື່ອງຫຍັງທີ່ນ້ອງເຮັດໄດ້ແລະມີລາຍໄດ້ເກີດຂຶ້ນ ສາມາດລ້ຽງຕົວເອງໄດ້ກຸ້ມ. ແລະເລື່ອງທີ່ສີ່ ສັງຄົມໂລກນີ້ຕ້ອງການຫຍັງ ຕ້ອງການຄົນແບບໃດ ຕ້ອງການສະພາບດີໆ ແນວໃດ. ຖ້ານ້ອງສາມາດຕອບຄຳຖາມສີ່ເລື່ອງນີ້ໄດ້ ກໍສະແດງວ່ານ້ອງເລິ່ມຮູ້ຈັກຕົວເອງແລ້ວ..."

"ແມ່ນຫວາອາຈານ ຕອບສີ່ເລື່ອງນີ້ໄດ້ ກະຮູ້ເປົ້າໝາຍຊີວິດເຮົາເລີຍຫວາ?"

"ໃກ້ແລ້ວລ່ະ ແຕ່ຍັງບໍ່ສຸດເທືອ ມີລາຍລະອຽດຕຶ່ມອີກ...ເອົາຈັ່ງຊີ້ເນາະ ນ້ອງກັບໄປຕອບຄຳຖາມນີ້ມາກ່ອນເນາະ ແລ້ວມາລົມກັນຕຶ່ມ..."

"ມື້ອື່ນຫວາ ອາຈານ ນ້ອງບໍ່ທັນແທ້ໄດ໋..."

"ນ້ອງມາລົມ ຍາມນ້ອງພ້ອມເນາະ ຄ່ອຍໆ ຄິດໄປ ບໍ່ມີຜິດດອກ...ຊີວິດເຮົາເປັນເລື່ອງລະອຽດອ່ອນ ຄ່ອຍໆ ຄິດເດີ້..."

"ໂດຍ..ອາຈານ"

ການສົນທະນາກໍຈົບລົງພຽງເທົ່ານີ້...✋