ສູດສຳເລັດນັ້ນມີຫຼາຍ ແຕ່ຈະສຳເລັດບໍ່ ນັ້ນແມ່ນອີກເລື່ອງໜຶ່ງ...ຕອນທີ່ 6

...ມື້ນີ້ເຮົາຈະມາສືບຕໍ່ເລື່ອງ "ຄຸນຄ່າຂອງວຽກເຮົາ ທີ່ໃຫ້ກັບສັງຄົມ ໃຫ້ກັບໂລກໃບນີ້"...

...ເລິ່ມຈາກການນຳເອົາ "ສິ່ງທີ່ເຮົາເຮັດແລ້ວເກີດລາຍໄດ້" ຫຼື ເວົ້າໃຫ້ເຂົ້າໃຈງ່າຍຂຶ້ນ ແມ່ນ ມີຄົນພ້ອມທີ່ຈະຈ່າຍຄ່າຈ້າງໃຫ້ເຮົານັ່ນເອງ ມາສົມທຽບກັບ "ສິ່ງທີ່ໂລກ ສັງຄົມ ຕ້ອງການ"...

...ຕົວຢ່າງຈາກຜູ້ຂຽນເອງ (ຢ່າຟ້າວເບື່ອເດີ້ ຍົກຕົວຢ່າງຂອງຕົວເອງມັນສະດວກດີ)..."ສິ່ງທີ່ເຮັດແລ້ວເກີດລາຍໄດ້" ແມ່ນ ການເປັນຄູຝຶກ, ການເປັນຜູ້ອຳນວຍຄວາມສະດວກໃນການຮຽນຮູ້, ການເປັນໂຄ້ຊ (coach), ການເປັນທີ່ປຶກສາດ້ານການພັດທະນາບຸກຄະລາກອນ ແລະ ອົງກອນ...ສ່ວນ "ສິ່ງທີ່ໂລກ ສັງຄົມຕ້ອງການ" ຕາມມຸມມອງຂອງຜູ້ຂຽນ ເຫັນວ່າ ສັງຄົມຕ້ອງການຜູ້ຟັງທີ່ດີ, ຕ້ອງການຄົນເບິ່ງໂລກໃນມຸມທີ່ດີໆ, ຕ້ອງການຄວາມສະຫງົບສຸກ ສັນຕິພາບ, ຕ້ອງການຜູ້ນຳທາງຄວາມຄິດ...

...ເມື່ອພິຈາລະນາຈາກສອງສ່ວນນີ້ແລ້ວ ຜູ້ຂຽນກໍຈະໄດ້ ຄຸນຄ່າຂອງວຽກເຮົາ ທີ່ໃຫ້ກັບສັງຄົມ ໃຫ້ກັບໂລກໃບນີ້ ແມ່ນ "ຄວາມສາມາດໃນການເປັນທີ່ປຶກສາ ແລະ ເປັນຊັບພະຍາກອນບຸກຄົນ ດ້ານການພັດທະນາຕົວເອງ ແລະ ອົງກອນ"...

...ມາຮອດຕອນນີ້ ເຮົາກໍຈະໄດ້ 3 ສ່ວນທີ່ສຳຄັນ ກ່ອນການກຳນົດເປົ້າໝາຍຊີວິດຂອງເຮົາແລ້ວ...ເຫຼືອອີກໜຶ່ງສ່ວນ ສາມາດຕິດຕາມໄດ້ຕອນຕໍ່ໄປ...

《《《《《《《《《《《《♡》》》》》》》》》》

ທວນຄວາມຄືນ "ການສັງລວມຄວາມເປັນຕົວຕົນຂອງເຮົາ" ມີ 4 ຂັ້ນຕອນ ແມ່ນ

1. ການຊອກຫາ "ຄວາມປາດຖະໜາຂອງຊີວິດ"
2. ການຊອກຫາ "ວິຊາຊີບ"
3. ການຊອກຫາ "ຄຸນຄ່າຂອງວຽກເຮົາ ທີ່ໃຫ້ກັບສັງຄົມ ໃຫ້ກັບໂລກໃບນີ້" ແລະ
4. ການຊອກຫາ "ພາລະກິດໃນການໃຊ້ຊີວິດ"