ສູດສຳເລັດນັ້ນມີຫຼາຍ ແຕ່ຈະສຳເລັດບໍ່ ນັ້ນແມ່ນອີກເລື່ອງໜຶ່ງ...ຕອນທີ່ 7

...ທວນຄວາມຄືນແດ່ຈັກໜ້ອຍ...ການສັງລວມຄວາມເປັນຕົວຕົນຂອງເຮົາ ມີ 4 ຂັ້ນຕອນ ແມ່ນ...
ການຊອກຫາ "ຄວາມປາດຖະໜາຂອງຊີວິດ"
ການຊອກຫາ "ວິຊາຊີບ"
ການຊອກຫາ "ຄຸນຄ່າຂອງວຽກເຮົາ ທີ່ໃຫ້ກັບສັງຄົມ ໃຫ້ກັບໂລກໃບນີ້" ແລະ
ການຊອກຫາ "ພາລະກິດການໃຊ້ຊີວິດ"

...ໃນການຊອກຫາ "ພາລະກິດການໃຊ້ຊີວິດ" ໃຫ້ເຮົານຳເອົາສິ່ງທີ່ເຮົາໄດ້ພິຈາລະນາວ່າ "ໂລກນີ້ ສັງຄົມນີ້ຕ້ອງການຫຍັງ" ມາສົມທຽບກັບ "ສິ່ງທີ່ຕົວເອງມັກ ຢາກເຮັດ ໂດຍທີ່ບໍ່ມີຜູ້ໃດມາບັງຄັບ" ແລະພິຈາລະນາຢ່າງເລິກເຊິ້ງ ເຮົາກໍຈະໄດ້ຂໍ້ສະຫຼຸບອອກມາ...

...ແລະກໍເຊັ່ນເຄີຍ ຜູ້ຂຽນຂໍຍົກຕົວຢ່າງຂອງຜູ້ຂຽນທີ່ໄດ້ກຳນົດ "ພາລະກິດການໃຊ້ຊີວິດ" ຂອງຕົວເອງອອກມາ...ຜູ້ຂຽນເຊື່ອວ່າ "ໂລກນີ້ ສັງຄົມນີ້ຕ້ອງການຜູ້ຟັງທີ່ດີ, ຕ້ອງການຄົນເບິ່ງໂລກໃນມຸມທີ່ດີໆ, ຕ້ອງການຄວາມສະຫງົບສຸກ ສັນຕິພາບ, ຕ້ອງການຜູ້ນຳທາງຄວາມຄິດ..." ສ່ວນສິ່ງທີ່ຕົວເອງມັກ ຢາກເຮັດ ແມ່ນ "ການເດີນທາງທ່ອງທ່ຽວ, ມັກການຂຽນໜັງສື, ມັກການອ່ານໜັງສື, ມັກການຂັບລົດ, ມັກສ້າງຄົນ ສອນຄົນ, ມັກເຮັດເລື່ອງນ້ອຍໆ ແຕ່ມີພະລັງ..." ເມື່ອພິຈາລະນາແລ້ວ ຜູ້ຂຽນກໍຈະໄດ້ "ພາລະກິດຂອງການໃຊ້ຊີວິດ" ວ່າ "ການສື່ສານເລື່ອງຕ່າງໆ ທີ່ສ້າງພະລັງຊີວິດໃຫ້ກັບຄົນອື່ນ, ສ້າງຄົນທີ່ມີຄຸນນະພາບໃຫ້ກັບສັງຄົມ..."

...ໃນຂັ້ນຕອນຕໍ່ໄປ ກໍເປັນການກຳນົດ ເປົ້າໝາຍຊີວິດຂອງຕົວເອງ ຫຼື Ikigai ປັດຊະຍາການໃຊ້ຊີວິດຂອງຄົນຍີ່ປຸ່ນ ບອກໄວ້ວ່າ "ເປັນເຫດຜົນທີ່ຈະເຮັດໃຫ້ເຮົາຕື່ນຂຶ້ນມາ ລຸກມາໃຊ້ຊີວິດຢ່າງເບີກບານໃຈ..." ການກຳນົດເຮັດໄດ້ໂດຍນຳຜົນທີ່ໄດ້ຈາກການຊອກຫາຕົວເອງມາພິຈາລະນາລວມກັນ ເຊິ່ງຜູ້ຂຽນ ກໍໄດ້ກຳນົດເປົ້າໝາຍຊີວິດຕົວເອງໄດ້ວ່າ "ນັກເລົ່າເລື່ອງ ເພື່ອສ້າງພະລັງຊີວິດ ແລະ ສ້າງທາງເລືອກໃນການພັດທະນາຕົວເອງ ແລະ ພັດທະນາສັງຄົມ..."

...ກໍຄົງຈະບໍ່ຍາກປານໃດໃນການຊອກຫາຕົວເອງ ແລະ ກຳນົດເປົ້າໝາຍຊີວິດຂອງຕົວເອງ ຂໍພຽງໃຫ້ເຮົາໃຊ້ເວລາກັບຕົວເອງ ພິຈາລະນາຢ່າງຄ່ອຍເປັນໄປ ບາງຄົນອາດຈະໃຊ້ເວລາຫຼາຍວັນ ຫຼາຍສັບດາ ຫຼາຍເດືອນ ກໍເປັນໄປໄດ້ ນັ້ນກໍຖືວ່າເປັນເລື່ອງທຳມະດາ ຍ້ອນຄົນແຕ່ລະຄົນໄດ້ຜ່ານປະສົບການມາບໍ່ຄືກັນ...ຄ່ອຍໆ ຄິດ ຄ່ອຍໆ ເບິ່ງ "ຊີວິດເປັນຂອງເຮົາເອງ ເຮັດໃນສິ່ງທີ່ມີຄວາມສຸກ ບໍ່ເຮັດຜູ້ອື່ນທຸກນຳ ກໍເອົາລ່ະ..."