 |
| ທັກສະທີ່ຈຳເປັນສຳລັບຜູ້ໃຫ້ຄຳແນະນຳທີ່ມີປະສິດທິຜົນ |
...“ສະບາຍດີອາຈານ ບໍ່ໄດ້ພົບກັນດົນແລ້ວນໍ້”...ສຽງທັກທາຍຂອງລູກສິດ...“ນ້ອງຄາວຽກຫຼາຍແດ່ ຊ່ວງທີ່ຜ່ານມານ້ອງໄດ້ລົງຕິດຕາມວຽກຂັ້ນເມືອງ ແລະ
ຂັ້ນບ້ານ ໄດ້ເອົາບົດຮຽນທີ່ໄດ້ແລກປ່ຽນກັບອາຈານໄປໃຊ້ໄດ້ຫຼາຍເລື່ອງເລີຍລ່ະເຈົ້າ...ນັບຕັ້ງແຕ່ການຟັງ
ການບໍ່ຕັດສິນສິ່ງທີ່ເຫັນ ສິ່ງທີ່ໄດ້ຍິນ...ຊ່ວງທຳອິດລ່ະ ໝຸດໝັດຫຼາຍອາຈານເອີ້ຍ”...
...“ໂອ້...ກໍສະແດງວ່ານ້ອງໄດ້ບົດຮຽນທີ່ດິເດ້ນັ້ນ...ໜ້ອຍຄົນເດ້ທີ່ຈະໄດ້ທົດລອງສິ່ງທີ່ຕົວເອງໄດ້ຮຽນຮູ້ໄປ
ແລະ ນຳມາບອກເລົ່າໃຫ້ຄົນອື່ນໄດ້ຟັງ...ຄັກຫຼາຍ”...
...“ນ້ອງກະວ່າຢູ່...ຮ່າຮ່າຮ່າ...ສິ່ງໜຶ່ງທີ່ນ້ອງສັງເກດເຫັນ
ກໍແມ່ນວ່າ ຢາມເຮົາຟັງເຂົາເຈົ້າຫຼາຍໆ ແລະ ມີການຕັ້ງຄຳຖາມເປັນໄລຍະ ກະເຮັດໃຫ້ເຂົາເຈົ້າຢາກລົມກັບເຮົາ
ຢາກເວົ້າໃຫ້ເຮົາໄດ້ຟັງ ໄດ້ຮັບຮູ້ເລື່ອງຂອງເຂົາເຈົ້າເດ້ອາຈານ”...
...“ແມ່ນຫວາ ດີແລ້ວ
ທີ່ເຂົາເຈົ້າຢາກລົມໃຫ້ເຮົາຟັງ ສະແດງວ່າ ເກີດຄວາມໄວ້ວາງໃຈແລ້ວເດ້...ຟັງແລ້ວ
ກໍສະແດງຄຳຄິດຄຳເຫັນເປັນໄລຍະ ແຮ່ງເຮັດໃຫ້ການສົນທະນາກັນມີບັນຍາກາດທີ່ດີຫຼາຍ”...
...“ແມ່ນແລ້ວອາຈານ ຕອນລົມກັບເຂົາເຈົ້າ ນ້ອງກໍຖາມແດ່ ສະເໜີຄຳຄິດເຫັນຂອງຕົວເອງແດ່
ແຕ່ວ່າບໍ່ໄດ້ໄປຂັດແຍ້ງກັບຄວາມຄິດຂອງເຂົາເຈົ້າ ນ້ອງຈະບອກຢູ່ຕະຫຼອດວ່າ
ອັນນີິແມ່ນຈາກປະສົບການຂອງນ້ອງເດີ້ ເຈົ້າຄິດວ່າແນວໃດ...ພໍຟັງຫຼາຍໆ
ກ້ເຮັດໃຫ້ເຮົາໄດ້ຮູ້ວ່າ ຊ່ວງໃດທີ່ນ້ອງຈະຕ້ອງໃຫ້ຂໍ້ສະເໜີແນະ ຫຼືວ່າໃຫ້ຄວາມຮູ້ ແລະນ້ອງກໍພະຍາຍາມເບິ່ງວ່າເຂົາເຈົ້າມີຄວາມພ້ອມໜ້ອຍຫຼາຍສ່ຳໃດ
ແລະ ເບິ່ງວ່າເຂົາເຈົ້າຄາບ່ອນໃດຈ້າວ...ບາງເທືອເປັນເລື່ອງເຂົາເຈົ້າບໍ່ມີຄວາມຮູ້ ຫຼື
ມີຄວາມຮູ້ທີ່ບໍ່ຖືກຕ້ອງ
ນ້ອງກະຈັ່ງຄອຍໃຫ້ຕາມຄວາມຕ້ອງການຂອງເຂົາເຈົ້າ...ສິ່ງທີ່ນ້ອງເຮັດນີ້
ແມ່ນຖືກຕ້ອງຢູ່ເດ້ເນາະອາຈານ”...
...“ແມ່ນແລ້ວ
ມາຖືກທາງແລ້ວ...ຖ້າເຮົາປະເມີນຄວາມຕ້ອງການໄດ້ຢ່າງຖືກຕ້ອງ
ເຮົາກໍຈະຮູ້ວ່າເຂົາເຈົ້າຂາດເຫຼືອຫຍັງ ເຮົາຈຶງຈະສາມາດຕອບສະໜອງໄດ້ຕາມຄວາມຕ້ອງການນັ້ນ...ສິ່ງສຳຄັນ
ແມ່ນວ່າ ການປ່ຽນແປງພຶດຕິກຳຂອງຄົນເຮົານີ້ ຕ້ອງມີບາດກ້າວເດີ້ ຕ້ອງຄ່ອຍເປັນຄ່ອຍໄປ”...
...“ໂດຍ
ອາຈານ...ນ້ອງຈຳຄຳທີ່ອາຈານເຄີຍລົມກັບນ້ອງ ວ່າ ການທີ່ຈະໃຫ້ຄົນເຮົາເກີດການປັບປຸງ ແລະ
ປັບປ່ຽນພຶດຕິກຳນັ້ນ ບໍ່ແມ່ນເລື່ອງງ່າຍ...ຕ້ອງກະຕຸ້ນໃຫ້ເຂົາເຈົ້າສົນໃຈ
ໃຫ້ມີຄວາມຮູ້ກ່ອນ ເວົ້າງ່າຍໆ ກໍຄືການໃຫ້ເຂົາເຈົ້າຈຳໄດ້ ຈື່ໄດ້ກ່ອນ
ຈາກນັ້ນຄ່ອຍກະຕຸກຊຸກຍູ້ໃຫ້ເຂົາເຈົ້າໄດ້ນຳຄວາມຮູ້ນັ້ນມາທວນຄືນ ສາມາດອະທິບາຍໄດ້
ບອກໄດ້ວ່າແມ່ນຫຍັງ ມີຄວາມສຳຄັນແນວໃດ ແລະ ສາມາດໝຸນໃຊ້ໄດ້ແນວໃດ...ຖ້າໃຫ້ດີເຂົາເຈົ້າຕ້ອງໄດ້ທົດລອງເຮັດ
ໄດ້ປະຕິບັດຕົວຈິງ ກໍຈະເຮັດໃຫ້ເຂົາເຈົ້າໄດ້ບົດຮຽນ ໄດ້ໝັ້ນໃຈວ່າຄວາມຮູ້ນັ້ນສາມາດໃຊ້ໄດ້ຈິງ”...
...“ໂດຍ ແມ່ນແລ້ວ...ການປ່ຽນແປງພຶດຕິກຳຂອງຄົນເຮົາ
ມັນກໍຈະມີການປ່ຽນແປງໄປຕາມລຳດັບຫັ້ນລ່ະ ອາຈານເຖີງໄດ້ບອກນ້ອງຢູ່ຕະຫຼອດວ່າ
ຕ້ອງໃຈເຍັນໆ ຢ່າຟ້າວ ໃຫ້ໄປແບບມີບາດກ້າວ ແລະ ຕໍ່ເນື່ອງ ໃຫ້ສັງເກດການປ່ຽນແປງດີໆ
ຍ້ອນວ່າ ບາງເທືອມັນຈະເກີດຂຶ້ນໄວ ແລະ ເຮົາຕ້ອງກະຕຸ້ນໃຫ້ຖືກຍາມ ຖືກເວລາ”...
...“ຈາກບົດຮຽນຂອງນ້ອງ ນ້ອງວ່າ ຖ້າເອົາຫຼັກການມາຈັບ
ມາສົມທຽບ ມັນເຮັດໃຫ້ເຮົາໄດ້ເຫັນຊັດເຈນຂຶ້ນເນາະອາຈານ...ຢ່າງເລື່ອງການປັບປ່ຽນດ້ານທັດສະນະຄະຕິຂອງຄົນນີ້
ຕ້ອງມີຂັ້ນຕອນ ຕ້ອງໃຫ້ເຂົາເຈົ້າໄດ້ຮັບຮູ້ ໄດ້ສະແດງອອກມາ ໄດ້ກຳນົດຄວາມເຊື່ອຈາກອາລົມຄວາມຮູ້ສຶກທີ່ເກີດຂຶ້ນ
ຈາກນັ້ນຄ່ອຍເຮັດຕາມສິ່ງທີ່ເຊື່ອ ມີການທວນຄືນຢ່າງສະໝ່ຳສະເໝີ ກໍຈະເຮັດໃຫ້ຄົນເກີດການປ່ຽນພຶດຕິກຳໄດ້ງ່າຍຂຶ້ນ...ບໍ່ແມ່ນການໄປບອກເຂົາເຈົ້າໃຫ້ປ່ຽນແນວຄິດພຽງຢ່າງດຽວ
ຫຼື ໄປບອກເຂົາເຈົ້າວ່າ ຄິດຜິດ...ແມ່ນເດ້ເນາະ ອາຈານ”...
... “ຄັກຫຼາຍນ້ອງ
ທີ່ສາມາດອະທິບາຍໄດ້ຢ່າງຊັດເຈນ ອັນນີ້ກໍເປັນທັກສະໜຶ່ງຂອງຜູ້ໃຫ້ຄຳແນະນຳທີ່ດີ
ທີ່ເອີ້ນວ່າ ທັກສະການຖ່າຍທອດຄວາມຮູ້...ທັກສະນີ້ກໍຖືວ່າມີຄວາມສຳຄັນຫຼາຍ ຍ້ອນວ່າ
ຜູ້ໃຫ້ຄຳແນະນຳຕ້ອງມີຄວາມເຂົ້າໃຈ ແລະ ຮູ້ຕົວຢູ່ຕະຫຼອດເວລາວ່າ ການທີ່ຄົນເຮົາຈະຮຽນຮູ້ເລື່ອງໃດໜຶ່ງນັ້ນ
ຕ້ອງໃຊ້ເວລາ ເພື່ອໃຫ້ເກີດການປ່ຽນແປງຢ່າງຄ່ອຍເປັນຄ່ອຍໄປ ແລະ
ມີການປ່ຽນແປງໄປຕາມຂັ້ນຕອນ...ຖ້າການປ່ຽນແປງບໍ່ເປັນໄປຕາມຂັ້ນຕອນ ເຮົາກໍພໍຈະຄາດການໄດ້ວ່າ
ພຶດຕິກຳນັ້ນ ຈະຢູ່ໄດ້ບໍ່ດົນດອກ ບໍ່ພໍຄາວ ກໍຈະກັບຄືນມາເປັນຄືເກົ່າ”...
...“ນ້ອງກໍເຫັນດີນຳອາຈານ...ແມ້ວ່າມັນຈະມີຄວາມຍາກຢູ່
ແຕ່ກໍເປັນຄວາມທ້າທາຍຂອງຜູ້ກ່ຽວ ແລະ ຂອງເຮົານຳເດ້
ໃນຖານະຂອງຜູ້ທີ່ຈະຊ່ວຍສ້າງບັນຍາກາດການຮຽນຮູ້ ແລະ
ກະຕຸກຊຸກຍູ້ໃຫ້ເຂົາເຈົ້າໄດ້ເກີດການປ່ຽນແປງພຶດຕິກຳໄປໃນທາງທີ່ດີຈ້າວ”...
... “ພໍດີລ່ະເນາະ
ເທືອໜ້າເຮົາຈະໄດ້ມາລົມກັນເລື່ອງການສ້າງແຮງບັນດານໃຈ ຊີໄດ້ເປັນອີກແຮງໜຶ່ງ
ທີ່ຈະຊ່ວຍໃຫ້ຄົນທີ່ຢາກປ່ຽນແປງຕົວເອງ ໄດ້ເຫັນບາດກ້າວ ແລະ ເຫັນພະລັງທີ່ມີຢູ່ພາຍໃນຕົວຜູ້ກ່ຽວເອງ
ທີ່ສາມາດເອົາອອກມາໃຊ້ຢ່າງສ້າງສັນໄດ້”...
😄😄😄
ຢາກຝຶກການອ່ານສິໄສຄົນບໍ່ຈິງໃຈ
ตอบลบ