ທັກສະທີ່ຈຳເປັນສຳຫຼັບຜູ້ໃຫ້ຄຳແນະນຳທີ່ມີປະສິດທິຜົນ (Effective Mentor) ຕອນທີ່ 3 (ແຮງບັນດານໃຈ ກັບ ແຮງຈູງໃຈ)

...ການສົນທະນາຂອງລູກສິດ ກັບ ອາຈານ ກໍເກີດຂຶ້ນຢ່າງຕໍ່ເນື່ອງ...

...“ອາຈານ ແຮງບັນດານໃຈນີ່ ມັນແມ່ນຫຍັງ...ນ້ອງໄດ້ຍິນຢູ່ເລື່ອຍໆ ບາງເທືອກໍສັບສົນຢູ່ວ່າ ແຮງບັນດານໃຈກັບແຮງຈູງໃຈນີ້ ມັນອັນດຽວກັນບໍ່ ຫຼືແມ່ນແນວໃດ”...

... “ຖ້າເວົ້າຕາມຄວາມໝາຍແລ້ວ ມັນກໍແຕກຕ່າງກັນຢູ່...ແຮງບັນດານໃຈ ແມ່ນ ພະລັງຊະນິດໜຶ່ງທີ່ຢູ່ພາຍໃນຕົວຂອງເຮົາ ທີ່ເຮັດໃຫ້ເຮົາລຸກຂຶ້ນມາເຮັດເລື່ອງໃດເລື່ອງໜຶ່ງໃຫ້ເປັນຈິງຂຶ້ນມາໄດ້...ສ່ວນແຮງຈູງໃຈນັ້ນ ແມ່ນ ພະລັງພາຍນອກທີ່ມີຜົນຕໍ່ການຕັດສິນໃຈຂອງເຮົາ...ສະຫຼຸບວ່າ ແຮງບັນດານໃຈ ແມ່ນເລື່ອງທີ່ເກີດຂຶ້ນພາຍໃນຕົວເຮົາ...ສ່ວນແຮງຈູງໃຈ ເປັນເລື່ອງຂອງພາຍນອກມາກະຕຸ້ນເຮົາ”...

... “ຍັງບໍ່ແຈ້ງປານໃດ໋ອາຈານ😕...ການທີ່ຄົນເຮົາຈະເຮັດຫຍັງຈັກເລື່ອງໜຶ່ງນີ້ ມັນຕ້ອງມີທັ້ງສອງແຮງບໍ່ແມ່ນຕີ້ ທັ້ງແຮງບັນດານໃຈ ແລະ ແຮງຈູງໃຈ...???”...

... “ຖ້າມີທັ້ງສອງແຮງນັ້ນ ດີຄັກຫຼາຍເດ້...ຍ້ອນວ່າ ສາມາດໃຊ້ທັ້ງພະລັງພາຍໃນຕົວເອງ ແລະ ພະລັງພາຍນອກມາໃຊ້ໄດ້ເດ ນັ້ນລ່ະ ຖືວ່າສຸດຍອດ...ແຮງບັນດານໃຈນີ້ ແມ່ນ ພະລັງພາຍໃນ ເປັນເລື່ອງທີ່ຕົວເຮົາເອົງຄົ້ນພົບ ຮູ້ສຶກວ່າມີພະລັງ ແລະ ບໍ່ໄດ້ມີຫຍັງມາກະຕຸ້ນໃຫ້ເກີດຂຶ້ນ ແຮງແບບນີ້ຢູ່ດົນ ມີພະລັງ...ສ່ວນແຮງຈູງໃຈ ເປັນເລື່ອງທີ່ເຮົາເອົາສິ່ງອື່ນນອກຕົວເຮົາມາເປັນແຮງດຶງດູດໃຈໃຫ້ເຮັດເລື່ອງໃດເລື່ອງໜຶ່ງ ແຮງນີ້ຢູ່ບໍ່ດົນ”...

... “ກໍຍັງແຍກບໍ່ຄ່ອຍອອກລ່ະອາຈານ...ມັນຄ້າຍໆ ຄືກັນ ແຕ່ນ້ອງເລິ່ມເຫັນຄວາມແຕກຕ່າງແລ້ວ ວ່າ ແຮງບັນດານໃຈເຮັດເລື່ອງໃດເລື່ອງໜຶ່ງນີ້ ມັນຈະເຮັດໃຫ້ພຶດຕິກຳນັ້ນຢູ່ດົນ ແຕ່ຖ້າແຮງຈູງໃຈ ມັນຈະຢູ່ບໍ່ດົນ”...

... “ແຮງບັນດານໃຈຈະເປັນຕົວຊຸກຢູ້ ສ່ວນແຮງຈູງໃຈຈະເປັນຕົວດຶງດູດ...ແຮງບັນດານໃຈ ສົ່ງແຮງຊຸກຍູ້ດ້ວຍຕົວເຮົາເອງ...ແຮງຈູງໃຈ ແມ່ນ ດຶງເຮົາ ດູດເຮົາ ຖ້າມັນເບິ່ດແຮງ ເຮົາກໍໝົດໄຟ...ວ່າຊັ້ນ”...

... “ສ່ຳພໍ😃 ອາຈານເວົ້າວ່າ ຖ້າມີທັ້ງສອງແຮງກໍຈະດີຫຼາຍ ທັ້ງແຮງຊຸກຍູ້ແລະແຮງດຶງດູດ ຫຼືອາດຈະເວົ້າວ່າ ແຮງໄລຍະສັ້ນ ແລະ ໄລຍະຍາວ ກະໄດ້ຫວາອາຈານ”...

... “ຮ່າຮ່າຮ່າ😁...ເຂົ້າໃຈໄວເນາະ...ຍົກຕົວຢ່າງໃກ້ຕົວນີ້ລ່ະ ອາຈານພະຍາຍາມບໍ່ກິນເຂົ້າແລງ ກິນໝາກໄມ້ແທນ ຫຼືຖ້າໄດ້ກິນ ກໍຈະພະຍາຍາມກິນໃຫ້ໜ້ອຍ ຍ້ອນວ່າ ອາຈານຢາກຢູ່ດົນໆ ເພື່ອເຮັດຕາມເປົ້າໝາຍຂອງການມີຊີວິດຢູ່ ໃຫ້ໄດ້ດົນທີ່ສຸດເທົ່າທີ່ຈະເຮັດໄດ້...ອາຈານເລິ່ມຈາກການຈິງຈັງກັບການກິນໜ້ອຍ ໂດຍສະເພາະຕອນແລງ ຍ້ອນວ່າກິນແລ້ວບໍ່ໄດ້ໃຊ້ພະລັງງານ ເຮັດໃຫ້ຮ່າງກາຍສະສົມພະລັງງານໄວ້ເກີນຄວາມຈຳເປັນ ສົ່ງຜົນບໍ່ດີຕໍ່ສຸຂະພາບໃນໄລຍະຍາວ ອາຈານກໍເລີຍປັບປ່ຽນພຶດຕິກຳການກິນຂອງຕົວເອງມາເລື່ອຍໆ ຕໍ່ເນື່ອງມາຫຼາຍເດືອນແລ້ວ”...

... “ແຮງບັນດານໃຈຂອງອາຈານ ແມ່ນ ການໄດ້ເຮັດຕາມເປົ້າໝາຍຊີວິດຂອງອາຈານທີ່ໄດ້ຕັ້ງໄວ້ໃຫ້ເຕັມທີ່ ໃຫ້ດົນທີ່ສຸດ ແມ່ນບໍ່ອາຈານ”...

... “ແມ່ນແລ້ວ...ດັງນັ້ນ ແຮງບັນດານໃຈນີ້ລ່ະ ເປັນຕົວຊຸກຍູ້ໃຫ້ຄົນເຮົາເກີດການປັບປ່ຽນພຶດຕິກຳທີ່ຕໍ່ເນື່ອງ ສະໝ່ຳສະເໝີ”...

... “ອາຈານ ສົມມຸດວ່າ ອາຈານຕຸ້ຍ ອາຈານຕັ້ງເປົ້າໄວ້ວ່າ ອາຈານຢາກຈ່ອຍ ຢາກໃຫ້ຄົນເຫັນວ່າອາຈານ ດູດີ ມີລາສີ ສະຫງ່າງາມ ອາຈານກໍເລີຍບໍ່ກິນເຂົ້າແລງ...ຮອດວັນໜຶ່ງ ອາຈານຈ່ອຍລົງ ຊ່ວງທຳອິດກໍມີຄົນທັກທ້ວງວ່າອາຈານຈ່ອຍລົງ ອາຈານກໍດີໃຈ ພະຍາຍາມຮັກສາຄວາມຈ່ອຍຂອງຕົວເອງໄວ້...ແຕ່ຫຼັງຈາກຫຼາຍວັນຜ່ານໄປກໍບໍ່ມີຜູ້ໃດສົນໃຈອີກ, ບໍ່ມີຜູ້ໃດເວົ້າເຖີງ, ອາຈານກໍເລີຍກັບມາກິນເຂົ້າແລງຄືເກົ່າ ເຮັດໃຫ້ອາຈານຕຸ້ຍຄືນມາອີກ...ອັນນີ້ ຄືຊີແມ່ນແຮງຈູງໃຈຕີ້ເນາະ ອາຈານ....ຍ້ອນວ່າ ອາຈານເອົາຄົນອື່ນເປັນຕົວຕັ້ງ😉”...

... “😅ຮ່າຮ່າຮ່າ...ເຈົ້ານີ່ກະເຂົ້າໃຈສົມທຽບເນາະ...ແມ່ນລ່ະ ຕົວຢ່າງທີ່ເຈົ້າຍົກມາກໍເຫັນໄດ້ຊັດເຈນວ່າ ຄວາມຕ້ອງການຈ່ອຍລົງ ບໍ່ແມ່ນຄວາມຕ້ອງການທີ່ແທ້ຈິງຂອງອາຈານ...ຄວາມຕ້ອງການທີ່ແທ້ຈິງ ແມ່ນ ຢາກໃຫ້ຄົນອື່ນບອກອາຈານວ່າ ອາຈານຈ່ອຍລົງ ພໍຮອດຢາມບໍ່ມີຄົນເວົ້າ ອາຈານກໍບໍ່ໄດ້ສົນໃຈອີກແລ້ວ ວ່າຈະຈ່ອຍຫຼືຕຸ້ຍ ແບບນີ້ລ່ະ ເຂົາຮ້ອງວ່າ ແຮງຈູງໃຈ ມັນດຶງ ມັນດູດ ເອົາຄວາມສົນໃຈເຮົາ ແລະ ເຮັດໃຫ້ເຮົາປ່ຽນແປງພຶດຕິກຳ ພໍມັນເຊົາດຶງ ເຊົາດູດ ເຮົາກໍບໍ່ໄດ້ສົນໃຈ ເຮົາກໍຢຸດພຶດຕິກຳນັ້ນໄປ”...

... “ອໍ້...ນ້ອງເຂົ້າໃຈລ່ະ ອາຈານ...ສະແດງວ່າ ໃນການໃຫ້ຄຳແນະນຳນີ່ ເຮົາຕ້ອງສ້າງແຮງບັນດານໃຈໃຫ້ຜູ້ຮັບຄຳແນະນຳເດ້ເນາະອາຈານ”...

... “ເຮົາບໍ່ສາມາດສ້າງແຮງບັນດານໃຈໃຫ້ຜູ້ໃດໄດ້ດອກ...ຖ້າເຮົາສ້າງໃຫ້ເຂົາ ແລະ ເຂົາເຮັດຕາມເຮົາ ສະແດງວ່າ ນັ້ນແມ່ນແຄ່ແຮງຈູງໃຈ ທີ່ເຂົາຢາກເຮັດຕາມເຮົາ...ສິ່ງທີ່ເຮົາເຮັດໄດ້ ໃນຖານະຜູ້ໃຫ້ຄຳແນະນຳ ແມ່ນ ການສ້າງສະພາບແວດລ້ອມທີ່ດີ ທີ່ເອື້ອຕໍ່ການເກີດແຮງບັນດານໃຈຂອງຄົນ”...

... “ໂອ້...ເຮັດຍາກຂະໜາດເລີຍ ອາຈານ...ແຄ່ສ້າງແຮງຈູງໃຈນີ້ ນ້ອງຄິດວ່າຍາກແລ້ວ ອັນນີ້ຈະສ້າງບັນຍາກາດໃຫ້ຄົນເກີດແຮງບັນດານໃຈ ແຮ່ງຍາກເຂົ້າໄປອີກເດ້ນີ່”...

... “ການທີ່ຄົນເຮົາຈະຟັງຜູ້ໃດ ຈະເຊື່ອຜູ້ໃດ ມີເຫດຜົນຫຼາຍຢ່າງ ແລະ ມີຄວາມຮູ້ສຶກຫຼາຍຢ່າງ...ເລື່ອງເຫດຜົນທີ່ເຮັດໃຫ້ຄົນຜູ້ໜຶ່ງ ເຊື່ອໝັ້ນຄົນອີກຜູ້ໜຶ່ງ ກໍຈະເປັນເລື່ອງຄວາມຮູ້ຄວາມສາມາດ ການເວົ້າແທ້ທຳຈິງ ຄວາມໃກ້ຊິດ ສະໜິດສະໜົມ ທີ່ວ່າມານີ້ກໍພໍຈະເຮັດໃຫ້ຄົນເຊື່ອໝັ້ນຄົນໄດ້...ສ່ວນອີກເລື່ອງໜຶ່ງ ກໍຈະແມ່ນຄວາມຮູ້ສຶກ ສິ່ງນີ້ລ່ະ ເປັນສິ່ງທີ່ທຳມະຊາດໄດ້ມອບໃຫ້ສິ່ງມີຊີວິດທີ່ຖືກເອີ້ນວ່າມະນຸດ ມາຕັ້ງແຕ່ສະໄໝມີມະນຸດຄັ້ງທຳອິດພູ້ນລ່ະ...ແຕ່ສະໄໝກ່ອນນັ້ນ ມະນຸດນີ້ບໍ່ໄດ້ມີຈຳນວນຫຼວງຫຼາຍ ບໍ່ໄດ້ສະຫຼັບຊັບຊ້ອນຄືທຸກມື້ນີ້ ກໍເລີຍໃຊ້ຄວາມຮູ້ສຶກສື່ສານກັນໄດ້...ທຸກມື້ນີ້ກໍຍາກຫຼາຍ ການໃຊ້ຄວາມຮູ້ສຶກໃນການສື່ສານຖືກປິດກັ້ນດ້ວຍຕຳແໜ່ງ ໜ້າທີ່ ວຽກງານ ຖານະຮັ່ງມີ ຖານະທຸກຈົນ ແລະອີກຫຼາຍໆ ເລື່ອງ...ແຕ່ໃນຖານະທີ່ເຮົາເປັນຜູ້ໃຫ້ຄຳແນະນຳ ເຮົາຕ້ອງສາມາດສ້າງຄວາມຮູ້ສຶກທີ່ດີໃຫ້ກັບຄົນທີ່ໄດ້ພົບເຮົາ ບໍ່ວ່າໃນສະຖານະໃດກໍຕາມ ບໍ່ວ່າທຸກຈົນ ບໍ່ວ່າຮັ່ງມີ”...

... “ອາຈານກຳລັງຈະບອກນ້ອງວ່າ ເຮົາຕ້ອງເຮົດຕົວເອງໃຫ້ນ່າເຊື່ອຖື ແມ່ນບໍ່ອາຈານ ເຮົາຈຶງຈະສາມາດສ້າງສະພາບແວດລ້ອມໃຫ້ຄົນເກີດແຮງບັນດານໃຈໄດ້”...

... “ແມ່ນລ່ະ...ເຮົານີ້ລ່ະ...ເຮົາຈະສ້າງສະພາບແວດລ້ອມທີ່ດີໃຫ້ຄົນອື່ນ ເຮົາຕ້ອງຮູ້ຈັກສ້າງໃຫ້ຕົວເອງຄືກັນ...ເວົ້າໃຫ້ຟັງງ່າຍ ກໍຄື ເຮົາເອງກໍຕ້ອງເປັນຄົນທີ່ຮູ້ຈັກແຮງບັນດານໃຈເປັນຢ່າງດີ...ເຮົາມີແຮງບັນດານໃຈແນວໃດແດ່ ເລື່ອງໃດແດ່...ເຮັດຕາມແຮງບັນດານໃຈຂອງຕົວເອງແລ້ວ ເກີດຫຍັງຂຶ້ນແດ່ ຮູ້ສຶກດີກັບຕົວເອງແນວໃດແດ່...ຕ້ອງສຳຫຼວດຕົວເອງກ່ອນເດີ້...ຈາກນັ້ນ ກໍຖ່າຍທອດປະສົບການຂອງຕົວເອງໃຫ້ຄົນອື່ນຟັງ...ຈາກປະສົບການຂອງອາຈານ ການຖ່າຍທອດໂດຍການເລົ່າເລື່ອງ ຈະໄດ້ຜົນດີ ແລະ ເຮັດໃຫ້ຜູ້ຟັງເຂົ້າໃຈໄດ້ງ່າຍຂຶ້ນ ເຫັນຕົວຢ່າງຈິງ ແລະ ສາມາດແລກປ່ຽນຮຽນຮູ້ຈາກກັນແລະກັນໄດ້ດີ”...

... “ອາຈານ ເຮົາສາມາດເອົາເລື່ອງຂອງຜູ້ອື່ນມາເວົ້້າໄດ້ບໍ່”...

... “ໄດ້ຄືກັນ...ເຮັດໃຫ້ເຮົາມີຫຼາຍຕົວຢ່າງເພິ່ມຂຶ້ນມາອີກ ສິ່ງທີ່ສຳຄັນ ແມ່ນການຊີ້ໃຫ້ເຫັນວ່າ ຄົນທີ່ມີແຮງບັນດານໃຈນັ້ນເປັນແນວໃດ, ຍ້ອນຫຍັງເຂົາເຈົ້າຈຶງເຮັດໄດ້ ແລະ ມີປະໂຫຍດຈາກການທີ່ມີແຮງບັນດານໃຈແນວໃດແດ່...ອາຈານໃຊ້ປະສົບການຕົວເອງສ່ວນໜຶ່ງ ມາແລກປ່ຽນ ເລົ່າສູ່ກັນຟັງ...ອີກສ່ວນໜຶ່ງກໍໃຊ້ວິທີອ່ານຫຼາຍໆ ເຫັນຄຳຄົມ ຫຼື ເລື່ອງທີ່ເປັນຄະຕິເຕືອນໃຈໄດ້ ເປັນຂໍ້ຄິດທີ່ດີ ເຮົາກໍນຳມາແລກປ່ຽນກັບຜູ້ຮັບຄຳແນະນຳໄດ້”...

... “ເປັນອີກຄວາມທ້າທາຍໜຶ່ງເນາະອາຈານ...ນ້ອງຕ້ອງໄດ້ໄປທວນຄືນຕົວເອງຈັກໜ້ອຍແລ້ວລ່ະ ວ່ານ້ອງມີແຮງບັນດານໃຈເລື່ອງໃດແດ່...ແລ້ວນ້ອງຈະໄດ້ມາແລກປ່ຽນກັັບອາຈານອີກເທືອ”...

... “ໂດຍ ດ້ວຍຄວາມຍິນດີ”...😊