ກຽມຄົນ-ກຽມເຄື່ອງມືອ-ປະຕິບັດຕົວຈິງ
...ພໍເວົ້າຮອດເລື່ອງການປະເມີນຂີດຄວາມສາມາດຂອງອົງກອນແລ້ວ ຫຼາຍໆ ຄົນຄືຊີຄິດພໍ້ເລື່ອງສິ່ງທີ່ຕ້ອງປັບປຸງ ສິ່ງທີ່ບໍ່ດີທີ່ມີຢູ່ ແຕ່ໃນຄວາມເປັນຈິງແລ້ວ ຂີດຄວາມສາມາດຂອງອົງກອນມີທັ້ງທີ່ດີ ແລະ ທີ່ຕ້ອງປັບປຸງ...ດັງນັ້ນ ກ່ອນການເລິ່ມຕົ້ນບາດກ້າວທຳອິດ ຕ້ອງປັບປ່ຽນມຸມມອງຂອງເຮົາ ຂອງພະນັກງານ ຂອງຜູ້ທີ່ກ່ຽວຂ້ອງໃນອົງກອນວ່າ ເຮົາປະເມີນຂີດຄວາມສາມາດຂອງອົງກອນ ເພື່ອພັດທະນາອົງກອນຂອງເຮົາໃຫ້ດີຂຶ້ນຕຶ່ມ...ສິ່ງທີ່ດີ ສາມາດຜັນຂະຫຍາຍ ແລະ ຊ່ວຍປັບປຸງສິ່ງທີ່ຍັງບໍ່ດີໃຫ້ດີຂຶ້ນໄດ້ ຍ້ອນວ່າທຸກອົງປະກອບໃນການພັດທະນາອົງກອນມີຄວາມກ່ຽວຂ້ອງກັນເປັນຕ່ອງໂຊ່ນັ່ນເອງ ຄືຮູບພາບທາງລຸ່ມນີ້...
ອົງປະກອບຂອງອົງກອນທີ່ມີປະສິດທິພາບ ແລະ ປະສິດທິຜົນ
...ໃນການປະເມີນຂີດຄວາມສາມາດຂອງອົງກອນນີ້ ເຮົາຕ້ອງ "ເອົາໃຈ-ໃສ່" ຢູ່ 3 ເລື່ອງ ແມ່ນ ການກະກຽມຄົນ, ການກະກຽມເຄື່ອງມືອ ແລະ ການປະຕິບັດຕົວຈິງ...
...ການ "ເອົາໃຈ-ໃສ່" ທີ່ຜູ້ຂຽນເນັ້ນໜັກ ແມ່ນຍ້ອນວ່າອົງກອນບໍ່ແມ່ນຊັບສິນຂອງຜູ້ໃດຜູ້ໜຶ່ງ, ບໍ່ແມ່ນຂອງຫົວໜ້າອົງກອນ, ບໍ່ແມ່ນຂອງຜູ້ສະໜັບສະໜຸນທຶນ, ບໍ່ແມ່ນຂອງວິຊາການ, ແຕ່ແມ່ນອົງກອນຂອງທຸກຄົນ ຖ້າຂາດການມີສ່ວນຮ່ວມຂອງຜູ້ໃດຜູ້ໜຶ່ງໄປ ກໍສົມທຽບໄດ້ກັບຮ່າງກາຍຂອງຄົນເຮົາທີ່ບໍ່ສົມປະກອບ...ຂາດຫົວສະໝອງ ກໍສ່ຳຂາດຄົນຄິດ...ຂາດຕາ ກໍສ່ຳຂາດຜູ້ນຳທາງ...ຂາດມື ຂາດຕີນ ກໍສ່ຳກັບຂາດຜູ້ປະຕິບັດ...ດັງນັ້ນ ການເຮັດໃຫ້ທຸກຄົນເຂົ້າມາມີສ່ວນຮ່ວມ ຕ້ອງມີໃຈເປັນໜຶ່ງດຽວກັນ ຕ້ອງເຂົ້າໃຈ, ຮ່ວມໃຈ ແລະ ຕັ້ງໃຈ ການປະເມີນຂີດຄວາມສາມາດຈຶງຈະດຳເນີນການໄປໄດ້ດ້ວຍດີ...
...ບາດກ້າວທີ່ໜຶ່ງ ແມ່ນ ການກຽມຄົນ...ບາດກ້າວນີ້ ມີຄວາມສຳຄັນຫຼາຍ ສົມທຽບໄດ້ກັບການໃສ່ກະດຸມເສື້ອ ຖ້າໃສ່ຜິດອັນທຳອິດ ອັນຕໍ່ໄປກໍຜິດໄປນຳກັນເບິ່ດ...ການກຽມຄົນ ຈະຕ້ອງ "ເອົາໃຈໃສ່" ໃນເລື່ອງຕໍ່ໄປນີ້...
- ການໃຫ້ຂໍ້ມູນທີ່ສຳຄັນ ວ່າ ກຳລັງຈະເກີດຫຍັງຂຶ້ນ, ຍ້ອນຫຍັງຕ້ອງເຮັດ, ຂະບວນການ ແລະ ວິທີການເປັນແນວໃດແດ່ , ໄລຍະເວລາໜ້ອຍຫຼາຍເທົ່າໃດ, ແລະ ຜົນທີ່ຈະເກີດຂຶ້ນແມ່ນຫຍັງ.
- ຄວາມເຂົ້າໃຈໃນບົດບາດ ໜ້າວຽກຂອງແຕ່ລະຄົນ ແມ່ນຜູ້ໃດຈະຕ້ອງເຮັດຫຍັງ, ເຮັດແນວໃດ ໃຊ້ເຄື່ອງມືຫຍັງແດ່, ເຮັດຍາມໃດ.
- ການສື່ສານກັນໃນອົງກອນ ຢາມເກີດບັນຫາ ຂໍ້ສົງໄສ ຈະຕິດຕໍ່ປະສານງານກັບຜູ້ໃດ, ຜູ້ໃດຈະເປັນຜູ້ຕັດສິນໃຈ.
- ການສ້າງບັນຍາກາດການຮຽນຮູ້ຈະເຮັດແນວໃດແດ່ ໃນຊ່ວງຂອງການປະເມີນຂີດຄວາມສາມາດອົງກອນ.
...ບາດກ້າວທີ່ສອງ ແມ່ນ ການກຽມເຄື່ອງມື...ໃນການປະເມີນຂີດຄວາມສາມາດອົງກອນນີ່ ກໍສາມາດນຳໃຊ້ຫຼາຍໆ ເຄື່ອງມື...ເຄື່ອງມືຈະແບ່ງເປັນ ເຄື່ອງມືໃນການເກັບກຳຂໍ້ມູນ, ເຄື່ອງມືສະຫຼຸບຂໍ້ມູນ ແລະ ເຄື່ອງມືນຳສະເໜີຜົນ...ຈາກປະສົບການຂອງຜູ້ຂຽນ ພົບວ່າ ການໃຊ້ແບບສອບຖາມ, ແບບສຳພາດ, ແບບສັງເກດການ, ການສົນທະນາກຸ່ມສະເພາະ, ການປະຊຸມແບບປະຕິບັດການ (Workshop), ກໍຖືວ່າໄດ້ຜົນດີ ໂດຍສະເພາະກັບອົງກອນຂະໜາດນ້ອຍ ຫຼື ອົງກອນທີ່ບໍ່ໄດ້ມີໂຄງຮ່າງທີ່ສະຫຼັບຊັບຊ້ອນ...ໃນການເລືອກໃຊ້ເຄື່ອງມື ກໍຕ້ອງມາພິຈາລະນາວ່າ ເຄື່ອງມືແຕ່ລະອັນມີຄວາມແທດເໝາະກັບອົງກອນເຮົາຫຼືບໍ່...ການອອກແບບເຄື່ອງມື ກໍມີຄວາມສຳຄັນ ຕ້ອງໃຫ້ຄອບຄຸມຂົງເຂດອົງປະກອບທີຈະປະເມີນ...ທີ່ສຳຄັນທີ່ຕ້ອງ "ເອົາໃຈ-ໃສ່" ແມ່ນ ການທົດລອງໃຊ້ເຄື່ອງມື ທັ້ງການເກັບກຳຂໍ້ມູນ, ການສະຫຼຸບຂໍ້ມູນ ແລະ ການນຳສະເໜີຜົນ...
...ບາດກ້າວທີ່່ສາມ ແມ່ນ ການປະຕິບັດຕົວຈິງ...ເຮັດເລີຍ ຕາມແຜນທີ່ໄດ້ວາງໄວ້...ຢ່າລືມວ່າໃນບາດກ້າວນີ້ ເປັນບາດກ້າວທີ່ເຮົາຊີໄດ້ທຳຄວາມຮູ້ຈັກອົງກອນຂອງເຮົາຫຼາຍຂຶ້ນ ແລະ ຮູ້ຈັກຕົວເອງຫຼາຍຂຶ້ນໃນຖານະທີ່ເຮົາເປັນສະມາຊິກຂອງອົງກອນ...ການໄດ້ຂໍ້ມູນທີ່ລະອຽດ ຮອບດ້ານ ຖືກຕ້ອງ ຈະເປັນປະໂຫຍດໃນການພັດທະນາອົງກອນ ດັງນັ້ນ ຈຶງຕ້ອງ "ເອົາໃຈ-ໃສ່" ໃນການເກັບກຳຂໍ້ມູນ ແລະ ໃນການໃຫ້ຂໍ້ມູນ ຜູ້ຂຽນເຫັນວ່າ ການສ້າງບັນຍາກາດການຮຽນຮູ້ເປັນສິ່ງທີ່ສຳຄັນຫຼາຍ ສາມາດເຮັດໃຫ້ໄດ້ຂໍ້ມູນທີ່ຖືກຕ້ອງ ເອົາມາກຳນົດການພັດທະນາອົງກອນໄດ້ແທ້...ເຮົາສາມາດຈ້າງບຸກຄົນພາຍນອກມາເຮັດປະເມີນໃຫ້ກໍໄດ້ ຫຼື ເຮົາຈະເຮັດເອງກໍໄດ້ ເຊິ່ງໃນແຕ່ລະຮູບແບບ ກໍມີຂໍ້ດີ ຂໍ້ດ້ອຍ ແຕກຕ່າງກັນໄປ...
...ການປະເມີນຂີດຄວາມສາມາດຂອງອົງກອນ ບໍ່ແມ່ນເລື່ອງຍາກ ຖ້າເຮົາ "ເອົາໃຈ-ໃສ່"...
ไม่มีความคิดเห็น:
แสดงความคิดเห็น