 |
| ...ການໂຄ້ຊ ແນໃສ່ການຕັ້ງຄຳຖາມ ແລະ ການໃຫ້ຄຳແນະນຳເດ້ ແມ່ນແນໃສ່ເລື່ອງຫຍັງ... |
...ຕ້ອງສ້າງຄວາມເຂົ້າໃຈກ່ອນວ່າ ການໃຫ້ຄຳແນະນຳ ທີ່ພາສາອັງກິດໃຊ້ຄຳວ່າ
Mentoring ເປັນການແປຄວາມໝາຍເພື່ອໃຊ້ໃນລາວເຮົາ
ຍ້ອນວ່າລາວຍັງບໍ່ໄດ້ໃຫ້ຄວາມໝາຍຄຳນີ້ໄວ້ຊັດເຈນໃນມຸມການພັດທະນາຕົວເອງໂດຍວິທີການນີ້ ດັງນັ້ນ
ຜູ້ຂຽນຈຶງຂໍໃຫ້ຄວາມໝາຍສະເພາະໃນບົດຄວາມນີ້ ວ່າ ເປັນການໃຫ້ຄຳແນະນຳ
ແຕ່ວ່າບໍ່ແມ່ນໃຫ້ຄຳແນະນຳແບບທົ່ວໄປ ແຕ່ເປັນການໃຫ້ຄຳແນະນຳແບບມີຂະບວນການ
ມີຄວາມເອົາໃຈໃສ່ ແລະ ມີເປົ້າໝາຍ...
...ການໂຄ້ຊ ແລະ ການໃຫ້ຄຳແນະນຳ ສອງບົດບາດນີ້ກໍມີຄວາມແຕກຕ່າງກັນພໍສົມຄວນ
ແຕ່ສິ່ງທີ່ຄືກັນ ແມ່ນ ເປັນຂະບວນການພົວພັນກັນແບບ “ຕົວຕໍ່ຕົວ”...ແຕ່ວ່າ ໃນການໃຫ້ຄຳແນະນຳ ຈະເປັນຜູ້ທີ່ອາວຸໂສ ຫຼື
ມີປະສົບການ ທີ່ເຮັດວຽກໃນຂົງເຂດດຽວກັນ ເປັນຜູ້ແລກປ່ຽນປະສົບການ ແລະ ນຳພາໃຫ້ຜູ້ຮັບຄຳແນະນຳໄດ້ໝຸນໃຊ້ຄຳແນະນຳນັ້ນ...
...ການໃຫ້ຄຳແນະນຳນັ້ນ ຈະເປັນເລື່ອງການພັດທະນົາຕົວເອງທີ່ເປັນເລື່ອງສ່ວນຕົວ
ຫຼື ເລື່ອງຄວາມກ້າໜ້າໃນອາຊີບ ທັ້ງໃນລະດັບອົງກອນ ຫຼື ລະດັບສ່ວນບຸກຄົນ...ໂດຍຜູ້ຮັບຄຳແນະນຳ
ຈະມີຄວາມຊັດເຈນວ່າຕົວເອງຕ້ອງການຫຍັງ ຕ້ອງການປະສົບການເລື່ອງຫຍັງ
ຕ້ອງການຄວາມສະເພາະດ້ານເລື່ອງຫຍັງ ເພື່ອນຳມາປັບປຸງຕົວເອງ...ໂດຍຂະບວນການ
ຈະເນັ້ນການແລກປ່ຽນປະສົບການ ການໃຫ້ຄຳແນະນຳກົງໄປຫາເລື່ອງທີ່ຜູ້ຮັບຄຳແນະນຳສົນໃຈ ແລະ
ຕ້ອງການເລີຍ...ອີກເລື່ອງໜຶ່ງ ຖ້າຈະໃຫ້ການແນະນຳໄດ້ຜົນດີ ແມ່ນຈະມີເລື່ອງສາຍສຳພັນທີ່ມີມາດົນ
ແລະ ເປັນໄປໃນທາງບວກ...
...ສ່ວນການໂຄ້ຊ ຈະບໍ່ໄດ້ແນໃສ່ການແລກປ່ຽນປະສົບການ ຫຼື
ການໃຫ້ຄຳແນະນຳ ແຕ່ແນໃສ່ການຕັ້ງຄຳຖາມ ແລະ ການສະທ້ອນຄືນ ໃຫ້ກັບຜູ້ຖືກໂຄ້ຊ ເພື່ອໃຫ້ຜູ້ຖືກໂຄ້ຊໄດ້ເກີດການທົບທວນ
ແລະ ຕັດສິນໃຈດ້ວຍຕົວເອງ...ແລະ ຫຼາຍຄັ້ງທີ່ຜູ້ເປັນໂຄ້ຊ ຈະເປັນຜູ້ອາວຸໂສ ຫຼື ມີປະສົບການຫຼາຍກວ່າຜູ້ຖືກໂຄ້ຊ
ແຕ່ນັ້ນກໍບໍ່ໄດ້ໝາຍຄວາມວ່າ ຈະຕ້ອງເປັນປະສົບການໃນເລື່ອງດຽວກັນກັບ ຜູ້ຖືກໂຄ້ຊສະເໝີໄປ...ການໂຄ້ຊ
ຈະແນໃສ່ຫົວຂໍ້ທີ່ກຳລັງເກີດຂຶ້ນໃນປະຈຸບັນ ຫຼື ເລື່ອງທີ່ຕ້ອງການພັດທະນາໃນປະຈຸບັນ...
...ມີອີກຄຳໜຶ່ງທີ່ເຮົາມັກຈະໄດ້ຍິນມານຳກັນ ແມ່ນ ການໂຄ້ຊ ແລະ
ການໃຫ້ຄຳປຶກສາ (Counseling)...ທັ້ງສອງວິທີການນີ້ ແມ່ນໃຊ້ທັກສະຮ່ວມກັນຫຼາຍທັກສະ ແຕ່ກໍມີຄວາມແຕກຕ່າງກັນພໍສົມຄວນ...
...ການໂຄ້ຊ ຈະແນໃສ່ເລື່ອງໃດໜຶ່ງທີ່ຈະມີຜົນໃນອະນາຄົດ...ການໃຫ້ຄຳປຶກສາ
ຈະແນໃສ່ເລື່ອງທີ່ຜ່ານມາໃນອະດີດ ແລະ ເປັນການເບີ່ງໃນລາຍລະອຽດ...
...ໂດຍປົກກະຕິໄລຍະເວລາການໂຄ້ຊ ແລະ ການໃຫ້ຄຳປຶກສາ
ຈະເປັນໄລຍະສັ້ນ...ແຕ່ບາງຄັ້ງການໃຫ້ຄຳປຶກສາຕ້ອງໃຊ້ໄລຍະເວລາດົນ ໂດຍສະເພາະຖ້າຕ້ອງການແນໃສ່ເລື່ອງສ່ວນບຸກຄົນ...
...ໃນການໂຄ້ຊ ຜູ້ຖືກໂຄ້ຊຈະເປັນຜູ້ກຳນົດຫົວຂໍ້...ການໃຫ້ຄຳປຶກສາ
ຜູ້ໃຫ້ຄຳປຶກສາ ແລະ ຜູ້ຮັບຄຳປຶກສາ ຈະກຳນົດຫົວຂໍ້ຮ່ວມກັນ ແລະ ເຫັນດີຮ່ວມກັນ
ກ່ອນເລີ່ມຂະບວນການໃຫ້ຄຳປຶກສາ...
...ໃນການໂຄ້ຊເລື່ອງວຽກ ຈະມີເປົ້າໝາຍຢູ່ທີ່ການປັບປຸງຂີດຄວາມສາມາດຂອງບຸກຄົນ...ຖ້າເປັນການໃຫ້ຄຳປຶກສາໃນເລື່ອງວຽກ
ເປົ້າໝາຍແມ່ນການເຮັດໃຫ້ຄົນຜູ້ນັ້ນເຂົ້າໃຈສາຍເຫດຂອງບັນຫາໃນການເຮັດວຽກ...
...ການຕັດສິນໃຈໃຊ້ບົດບາດ ຜູ້ເປັນໂຄ້ຊ ຜູ້ໃຫ້ຄຳແນະນຳ
ຜູ້ໃຫ້ຄຳປຶກສາ ເຮົາມີເກນເລືອກແນວໃດແດ່...
...ຖ້າຕ້ອງການແບບຕົວຕໍ່ຕົວ, ກຳນົດເວລາຊັດເຈນ, ເນັ້ນການຕັ້ງຄຳຖາມກັບສິ່ງທີ່ເກີດຂຶ້ນໃນປະຈຸບັນ
ແມ່ນໃຫ້ເລືອກໃຊ້ ການໂຄ້ຊ...
...ຖ້າບັນຫາມີການເກີດຕໍ່ເນື່ອງ ແລະ
ຕ້ອງການຄວາມສະເພາະດ້ານໃນການແກ້ໄຂ ແມ່ນໃຫ້ເລືອກ ການໃຫ້ຄຳແນະນຳ...
...ຖ້າບັນຫາເກີດຂຶ້ນມາດົນ, ຍັງເກີດຂຶ້ນຢູ່ເລື້ອຍໆ ແລະ ຕ້ອງໃຫ້ຮູ້ສາຍເຫດທີ່ແທ້ຈິງ, ກ່ຽວຂ້ອງກັບການເບີ່ງແຍງທາງສັງຄົມ ແລະ ຈິດໃຈ ແມ່ນໃຫ້ເລືອກ ການໃຫ້ຄຳປຶກສາ...
ไม่มีความคิดเห็น:
แสดงความคิดเห็น