 |
| ການຝຶກອົບຮົມ ແລະ ການໂຄ້ຊ |
...ມື້ໜຶ່ງຫົວໜ້າພະແນກພັດທະນາບຸກຄະລາກອນ
ໄດ້ຂໍຄຳປຶກສາກັບອຳນວຍການອົງການໜຶ່ງ ວ່າ...
...
“ທ່ານອຳນວຍການ ຕອນນີ້ອົງການຂອງເຮົາກຳລັງປະຕິບັດໂຄງການຂະໜາດໃຫຍ່ຢູ່
ແລະ ພະນັກງານເຮົາສ່ວນໜຶ່ງຍັງຂາດທັກສະ ແລະ ແນວຄວາມຄິດອັນສຳຄັນໃນການເຮັດວຽກກັບຊຸມຊົນເປົ້າໝາຍ
ນ້ອງໄດ້ປະເມີນສະຖານະການແລ້ວ ນ້ອງຄິດວ່າ ເຮົາຕ້ອງຈັດອົບຮົມພະນັກງານ
ເພື່ອໃຫ້ພະນັກງານສາມາດເຮັດວຽກໄດ້ ໃຫ້ບັນລຸເປົ້າໝາຍຂອງໂຄງການ
ນ້ອງກະເລີຍມາປຶກສາທ່ານອຳນວຍການ ວ່າຈະດີຫຼືບໍ່”
...
... “ຂໍເຫດຜົນທ່ານຫົວໜ້າພະແນກແດ່ ຍ້ອນຫຍັງຈຶງຕ້ອງອົບຮົມ?” ອຳນວຍການຕັ້ງຄຳຖາມຄືນ...
... “ນ້ອງເຫັນວ່າ ບໍ່ມີຫຍັງຄັກສ່ຳການຝຶກອົບຮົມແລ້ວ ຍ້ອນວ່າ ທັກສະທີ່ຈະໃຊ້ໃນວຽກນີ້
ກໍເປັນທັກສະໃໝ່ທີ່ພະນັກງານໂຄງການຍັງບໍ່ຮູ້ວ່າຈະເຮັດແນວໃດ ເຮົາຕ້ອງຈ້າງຄູຝຶກມາ
ເພື່ອໃຫ້ຄວາມຮູ້ ໃຫ້ແນວຄວາມຄິດ ແລະ ຝຶກທັກສະເບື້ອງຕົ້ນ
ກ່ອນທີ່ຈະລົງເຮັດວຽກຕົວຈິງ...ຢາມລົງເຮັດວຽກຕົວຈິງ ເຮົາຈຶງໃຊ້ວິທີການໂຄ້ຊ ເພື່ອເປັນການສະໜັບສະໜຸນໃຫ້ພະນັກງານໄດ້ເອົາຄວາມຮູ້ທີ່ໄດ້ຈາກການຝຶກອົບຮົມໄປໝຸນໃຊ້ກັບວຽກຕົວຈິງ” ຫົວໜ້າພະແນກຕອບຄຳຖາມດ້ວຍຄວາມໝັ້ນໃຈ...
... “ການໂຄ້ຊ ກັບ ການຝຶກອົບຮົມ ຕ່າງກັນບ່ອນໃດລ່ະ
ຈຶງໄດ້ໃຊ້ທັ້ງສອງວິທີນີ້ໄປນຳກັນ
ພະນັກງານເຮົາ ກໍມີປະສົບການຫຼາຍແລ້ວເດ້” ອຳນວຍການຖາມດ້ວຍຄວາມຢາກຮູ້...
... “ຂອບໃຈທ່ານອຳນວຍການທີ່ໄດ້ຖາມຄຳຖາມນີ້ຂຶ້ນມາ...ຍ້ອນວ່າພະນັກງານຂອງເຮົາເອງ
ກໍເປັນພະນັກງານທີ່ເຮັດວຽກໂຄງການມາຫຼາຍໂຄງການ ມີປະສົບການມາຫຼາຍ ແລະ
ຜ່ານຂະບວນການພັດທະນາບຸກຄະລາກອນມາຫຼາຍພໍສົມຄວນ ຈຶງຕ້ອງໃຊ້ຫຼາຍໆ
ວິທີເພື່ອໃຫ້ພະນັກງານເຮົາໄດ້ນຳໃຊ້ທ່າແຮງຢ່າງແທດເໝາະ...ໃນກໍລະນີນີ້
ທັກສະນີ້ເປັນທັກສະໃໝ່ທີ່ອົງການເຮົາບໍ່ມີຄວາມຮູ້ ແລະ ປະສົບການດ້ານນີ້ ຈຶງຕ້ອງອາໄສຜູ້ທີ່ມີຄວາມຮູ້ເລື່ອງນີ້ສະເພາະ
ມາຊ່ວຍອົບຮົມໃຫ້ເຮົາໄດ້ເຂົ້າໃຈແນວຄິດ ວິທີໝຸນໃຊ້ ແລະ ໄດ້ຝຶກປະຕິບັດ ເພື່ອທວນຄືນໃນລະດັບຄວາມຮູ້
ຄວາມເຂົ້າໃຈວ່າຮູ້ແທ້ ແລະ ມີຫຍັງຕ້ອງໃສ່ໃຈເປັນພິເສດຫຼືບໍ່ ກ່ອນທີ່ຈະລົງໄປປະຕິບັດຕົວຈິງ...ຢາມລົງປະຕິບັດຕົວຈິງ
ພະນັກງານມີປະສົບການມາແລ້ວ ເຮົາແຄ່ຊ່ວຍສະໜັບສະໜຸນໃຫ້ເຂົາເຈົ້າໄດ້ເຮັດຕາມແຜນທີ່ໄດ້ວາງໄວ້
ບາງເທືອອາດຈະໄດ້ໃຫ້ຄຳແນະນຳແດ່ ຖ້າເປັນເລື່ອງເທັກນິກໃໝ່ໆ ຫຼື ເກີດເຫດການທີ່ບໍ່ຄາດຄິດມາກ່ອນ
ດັງນັ້ນ ການໂຄ້ຊ ຈຶງເປັນວິທີການທີ່ແທດເໝາະ ຍ້ອນຈະແນໃສ່ການຕັ້ງຄຳຖາມ ແລະ
ຄຳຕອບຢູ່ກັບພະນັກງານແລ້ວ” ຫົວໜ້າພະແນກຕອບດ້ວຍຄວາມໝັ້ນໃຈ...
... “ໂອ ເປັນຈັ່ງຊັ້ນເນາະ ເປັນເຫດ ເປັນຜົນດີ ແລະ
ອຳນວຍການກໍເຫັນວ່າ ຫົວໜ້າພະແນກກໍຄິດມາດີແລ້ວ ກ່ອນມານຳສະເໜີ ເພາະສະນັ້ນ
ອຳນວຍການກໍເຫັນດີນຳ ແລະ ເຊື່ອວ່າຫົວໜ້າພະແນກຈະບໍ່ເຮັດໃຫ້ຜິດຫວັງເນາະ” ອຳນວຍການເຫັນດີ
ແລະ ມອບໝາຍໃຫ້ຫົວໜ້າພະແນກດຳເນີນການຕໍ່ໄປ...
...ຈາກຕົວຢ່າງການສົນທະນາ
ເຊີ່ງໃນຊີວິດຈິງອາດຈະເຂັ້ນຂຸ້ນກວ່ານີ້ຫຼາຍເທົ່າ...ເຮົາກໍຈະເລີ່ມເຫັນແດ່ແລ້ວ ວ່າ ຄວາມແຕກຕ່າງຂອງການຝຶກອົບຮົມ
ກັບ ການໂຄ້ຊ ແມ່ນແນວໃດແດ່...
...ການຝຶກອົບຮົມ
ເປັນຂະບວນການຮຽນຮູ້ ແບບກົງໄປກົງມາ ຍ້ອນວ່າ ຄູຝຶກ ຈະເປັນຜູ້ທີ່ຄວບຄຸມຂະບວນການສິດສອນ
ແລະ ເນື້ອໃນ ເພື່ອທີ່ຈະສົ່ງຄວາມຮູ້ໃຫ້ກັບຜູ້ເຂົ້າຮ່ວມອົບຮົມ ແລະ ໝຸນໃຊ້ຄວາມຮູ້ນັ້ນໃຫ້ເກີດການປ່ຽນແປງດ້ານຄວາມຮູ້
ດ້ານທັກສະ ແລະດ້ານແນວຄິດຫຼາຍທີ່ສຸດຈາກຂະບວນການຝຶກອົບຮົມນັ້ນ...ການຝຶກອົບຮົມຈະເກີດຜົນດີທີ່ສຸດ
ແມ່ນຂຶ້ນຢູ່ກັບສອງເລື່ອງ...ເລື່ອງທີ່ໜຶ່ງ ແມ່ນຄວາມສາມາດ ແລະ ຄວາມຮູ້ຂອງຄູຝຶກ ລວມທັ້ງ
ການຖ່າຍທອດ ການສົ່ງຄວາມຮູ້...ອີກເລື່ອງໜຶ່ງ ກໍແມ່ນ ຄວາມສາມາດໃນການຮັບຮູ້ຂອງຜູ້ເຂົ້າຮ່ວມອົບຮົມນັ້ນເອງ...ແລະ
ຖ້າເວົ້າເຖີງຈຳນວນຄົນທີ່ເຂົ້າຮ່ວມການຝຶກອົບຮົມ ສ່ວນຫຼາຍແລ້ວ ຈະມີຜູ້ເຂົ້າຮ່ວມຈຳນວນຫຼາຍຄົນ...
...ການໂຄ້ຊນັ້ນ
ຈະແນໃສ່ການຕັ້ງຄຳຖາມ... “ຜູ້ເປັນໂຄ້ຊ” ຈະເປັນຜູ້ຕັ້ງຄຳຖາມ “ຜູ້ຖືກໂຄ້ຊ” ແລະ “ຜູ້ຖືກໂຄ້ຊ” ກໍຈະເປັນຜູ້ຊອກຫາຄຳຕອບທີ່ຮູ້ຢູ່ແລ້ວ
ແຕ່ບໍ່ເຄີຍຄິດວ່າມັນຈະເປັນຄຳຕອບ...ເວົ້າງ່າຍໆ ຄື ຖ້າບໍ່ມີ “ຜູ້ເປັນໂຄ້ຊ” ມາຕັ້ງຄຳຖາມ “ຜູ້ຖືກໂຄ້ຊ” ກໍຈະບໍ່ໄດ້ໃຊ້ປະໂຫຍດຈາກຄຳຕອບນັ້ນ...ຫຼືໃນອີກມຸມໜຶ່ງ “ຜູ້ຖືກໂຄ້ຊ” ແມ່ນຜູ້ກຳເນື້ອໃນ ແຕ່ມີ “ຜູ້ເປັນໂຄ້ຊ” ນຳພາຂະບວນການ...ສ່ວນຫຼາຍແລ້ວ “ການໂຄ້ຊ” ຈະເຮັດແບບໜຶ່ງຕໍ່ໜຶ່ງ ໝາຍຄວາມວ່າ ຈະມີ “ການໂຄ້ຊ” ເປັນລາຍບຸກຄົນ...
...ໂດຍປົກກະຕິ ຖ້າສາມາດອອກແບບຂະບວນການໃຫ້ມີຄວາມຕໍ່ເນື່ອງ ໃຫ້ມີທັ້ງ ການຝຶກອົບຮົມ ກັບ ການໂຄ້ຊ ກໍຈະເຮັດໃຫ້ປະສິດທິພາບການໝຸນໃຊ້ຄວາມຮູ້ທີ່ໄດ້ຮັບເປັນໄປຢ່າງເຕັມທີ່ ແລະ ມີປະສິດທິຜົນໃນທີ່ສຸດ...ອົບຮົມເພື່ອເອົາຄວາມຮູ້ ເອົາຄວາມຮູ້ໄປປະຕິບັດຕົວຈິງ ແລະ ໃຊ້ການໂຄ້ຊ ເປັນເຄື່ອງມືໃນການສະໜັບສະໜຸນໃຫ້ເກີດຄວາມຕໍ່ເນື່ອງ ແລະ ຕິດຕາມຄວາມປ່ຽນແປງ ລວມທັ້ງການຖອດຖອນບົດຮຽນ ພ້ອມທັ້ງກຳນົດວິທີການໝຸນໃຊ້ບົດຮຽນທີ່ຖອດຖອນໄດ້ຕໍ່ໄປ...ເບີ່ງແລ້ວກໍໜ້າຈະຄົບວົງຈອນລ່ະ...
ไม่มีความคิดเห็น:
แสดงความคิดเห็น