..."ອາຈານ...3C ສູດຄວາມສຳເລັດທີ່ຈຳໄດ້ງ່າຍ ແລະ ເຮັດໄດ້ງ່າຍໆ ນີ້ ມັນແມ່ນແທ້ບໍ່...ນ້ອງຄິດວ່າ ຍາມເວົ້າມັນກະງ່າຍຢູ່ ແຕ່ຍາມເຮັດນີ່ລ່ະ ມັນຊີຍາກຄັກເດ້..." ລູກສິດເຮັດສີໜ້າຄິດຍາກ
..."ນ້ອງໄດ້ລົງມືເຮັດລ່ະຍັງ..."
..."ຍັງລ່ະ ອາຈານ ແຕ່ແຄ່ຄິດກະຍາກແລ້ວ..."
..."ນັ່ນລ່ະ ມັນຍາກນຳຄວາມຄິດນີ່ລ່ະ ຖ້າຍັງບໍ່ທັນໄດ້ເຮັດ ຊີບອກວ່າມັນຍາກ ມັນກໍຈະເປັນການຕັດກຳລັງໃຈຕົວເອງເດ້..."
..."ມັນກະອົດຄິດບໍ່ໄດ້ ອາຈານ...ປົກກະຕິຄົນເຮົາກໍຕ້ອງຄິດກ່ອນເຮັດຢູ່ແລ້ວ ຖ້າບໍ່ຄິດກ່ອນ ເຮົາກໍຈະບໍ່ຮູ້ວ່າຊີເຮັດແນວໃດເດ້ ອາຈານ..."
..."ນ້ອງຕ້ອງແຍກເລື່ອງການຄິດ ກັບຄວາມຍາກໃນການລົງມືເຮັດອອກຈາກກັນກ່ອນ...ເຮົາຄິດ ເພື່ອສ້າງທາງເລືອກ ຫາທາງທີ່ແທດເໝາະທີ່ສຸດ ຖ້າຄິດໄດ້ ຄິດອອກ ສາມາດກຳນົດໄດ້ຈະແຈ້ງວ່າຈະເຮັດຫຍັງ ສິ່ງນີ້ເປັນການດີ...ຈາກນັ້ນກໍລົງມືເຮັດ...ຄວາມຍາກມັນເກີດຂຶ້ນມາຈາກເຮົາບໍ່ເຊື່ອສິ່ງທີ່ເຮົາຄິດມາ ມັນກໍເລີຍຄິດຍາກ ແຕ່ຖ້າເຮົາເຊື່ອວ່າ ສິ່ງທີ່ເຮົາຄິດມາມັນຄັກແລ້ວ ກໍບໍ່ຕ້ອງຄິດຍາກຫຍັງ..."
..."ອາຈານ ສະແດງວ່າ ເຮົາຕ້ອງກ້າ ແມ່ນບໍ່?"...
..."ແມ່ນແລ້ວ...ຄວາມກ້າ ຈະພາໃຫ້ເຮົາໄດ້ເລິ່ມເຮັດໃນສິ່ງທີ່ເຮົາຄິດໄວ້ແລ້ວໄດ້ຍ່າງມັ່ນໃຈ..."
..."ຖ້າອາໄສຄວາມກ້າຢ່າງດຽວ ກະບໍ່ຕ້ອງຄິດຫຼາຍລ່ະອາຈານ..."
..."ຖ້າກ້າເຮັດ ໂດຍບໍ່ໄດ້ຄິດຫຍັງກ່ອນ ເຂົາຮ້ອງວ່າ ໃຊ້ອາລົມຊົ່ວວູບ...ແຕ່ຖ້າຄິດໄດ້ແລ້ວ ບໍ່ກ້າເຮັດຈັກເທືອ ເຂົາຮ້ອງວ່າ ຄົນຄິດຍາກ..."
"...ໂດຍ ອາຈານ...ນ້ອງເຂົ້າໃຈວ່າ ຕ້ອງກ້າລົງມືປະຕິບັດ ໂດຍທີ່ເຮົາມີເປົ້າໄວ້ແລ້ວ ມັນກໍຈະເຮັດໃຫ້ເຮົາມັ່ນໃຈຂຶ້ນເດ້ເນາະອາຈານ..."
..."ຄວາມມັ່ນໃຈຢ່າງດຽວບໍ່ພໍ ຕ້ອງອາໄສຄວາມກ້າໃນການເຮັດໃນສິ່ງທີ່ເຮົາມັ່ນໃຈນັ້ນລ່ະ..."
..."ນ້ອງວ່າ ມັນກ່ຽວກັບຄວາມຊັດເຈນ C ຕົວທີ່ໜຶ່ງເດ້ເນາະ...ຖ້າເຮົາມັ່ນໃຈວ່າ ເປົ້າໝາຍຂອງເຮົາແມ່ນຫຍັງ ເຮົາຈະເຮັດຫຍັງ ເຮັດຍ້ອນຫຍັງ ເຮົາຈະໄປຮອດໄສ ເຮົາຈະໄປແນວໃດ ຖ້າເກີດບັນຫາຂຶ້ນຈະແກ້ໄຂແນວໃດຄວາມປ່ຽນແປງທີ່ເຮົາຢາກເຫັນແມ່ນຫຍັງ ແລະ ຈະຮູ້ໄດ້ແນວໃດວ່າມັນມີຄວາມປ່ຽນແປງ ກໍສະແດງວ່າ ເຮົາໄດ້ເຮັດ C ຕົວທີ່ໜຶ່ງແລ້ວ..."
... "ແມ່ນແລ້ວ....ນ້ອງຄິດຖືກແລ້ວ..."
..."ສະແດງວ່າ ກິດຈະກຳທີ່ເກີດຂຶ້ນ ວ່າຈະເຮັດຫຍັງ ກໍເປັນຜົນຈາກທີ່ເຮົາຊັດເຈນວ່າເຮົາຕ້ອງການເຫັນຫຍັງເກີດຂຶ້ນເດ້ເນາະອາຈານ..."
..."ນີ້ກະແມ່ນອີກແລ້ວ.......ມາຮອດຕອນນີ້ ນ້ອງກໍຄົງຈະເຂົ້າໃຈແລ້ວເນາະ ວ່າ ຖ້າເຮົາກຳນົດເປົ້າໝາຍໃຫ້ຊັດເຈນ ສິ່ງອື່ນໆ ກໍຈະຊັດເຈນຕາມມາເປັນຕ່ອງໂຊ່ ຖ້າບໍ່ແຈ້ງຕັ້ງແຕ່ບາດກ້າວທຳອິດ ສິ່ງທີ່ຕາມມາກໍຈະບໍ່ແຈ້ງ ແລະ ຖ້າຍັງຍືນຍັນວ່າຈະເຮັດຕໍ່ ບໍ່ມີການປັບປຸງ ແກ້ໄຂ ມັນກໍຈະດຳມືດໄປໃນທ້າຍທີ່ສຸດ..."
..."ໂດຍ ອາຈານ..."
