ແລກປ່ຽນບົດຮຽນ “ການຈັດຂະບວນການຮຽນຮູ້”

Credit: Kaitock Sonedalinh 

...ກ່ອນອື່ນຕ້ອງຂໍຂອບໃຈບັນດາໝູ່ມິດ ທີ່ໄດ້ເຂົ້າມາຮ່ວມສົນທະນາແລກປ່ຽນບົດຮຽນການຈັດຂະບວນການຮຽນຮູ້ ອິງຕາມປະສົບການຂອງແຕ່ລະຄົນ ໃນວັນທີ່ 18 ພຶດສະພາທີ່ຜ່ານມາ...ຄວາມຮູ້ ແລະ ປະສົບການທີ່ໄດ້ໃນເທືອນີ້ ຄິດໄລ່ມູນຄ່າອອກມາເປັນຕົວເງີນຄົງຈະເກີນຄວາມສາມາດຂອງຂ້າພະເຈົ້າທີ່ຈະບອກວ່າມີມູນຄ່າເທົ່າໃດ ຍ້ອນວ່າແຕ່ລະຄົນກໍໄດ້ລົງທຶນມາຕະຫຼອດຊີວິດ...ແຕ່ສິ່ງທີ່ເຫັນໄດ້ຊັດເຈນກວ່າມູນຄ່າ ແມ່ນເລື່ອງຂອງ "ຄຸນຄ່າ" ທີ່ເກີດຈາກການກັ່ນຕອງ ແລະ ນຳສະເໜີຜ່ານການສົນທະນາ ເລົ່າເລື່ອງອອກມາໄດ້ຢ່າງມີຊີວິດຊີວາ ຂະໜາດທີ່ຜູ້ຟັງສາມາດຈິນຕະນາການ ແລະ ເຫັນພາບຢ່າງຊັດເຈນ ຕາມແຮງສະຕິປັນຍາຂອງແຕ່ລະຄົນ...ຂ້າພະເຈົ້າຈຶງຂໍນຳສະເໜີບົດຮຽນດີໆ ທີ່ໄດ້ຈາກການສົນທະນາ ຜ່ານຕົວອັກສອນໄວ້ເປັນບ່ອນອິງໃນການຈັດຂະບວນການຮຽນຮູ້ສຳລັບຜູ້ທີ່ສົນໃຈ...

·      ການຮຽນຮູ້ບໍ່ມີມື້ຈົບ ຍ້ອນວ່າ ສະຖານະການຕ່າງໆ ມີການປ່ຽນແປງຕະຫຼອດ...ການຮຽນຮູ້ເກີດຂຶ້ນໃນຊີວິດປະຈຳວັນຂອງທຸກຄົນ...

·   ບໍ່ມີຜູ້ໃດແກ່ເກີນກວ່າທີ່ຈະຮຽນຮູ້...ຖ້າຢຸດຮຽນຮູ້ ສະແດງວ່າ ເຮົາກໍຢຸດການພັດທະນາ...

·      ຂໍ້ມູນທຸກມື້ນີ້ຫາໄດ້ງ່າຍ ແຕ່ຈະຮູ້ໄດ້ແນວໃດວ່າ ຂໍ້ມູນນັ້ນມີຄວາມນ່າເຊື່ອຖື ມີຄວາມຖືກຕ້ອງ...ປັນຫາທີ່ເກີດຂຶ້ນມາແລ້ວ ແມ່ນຂໍ້ມູນຫຼາຍ ແຕ່ບໍ່ສາມາດນຳມາໝຸນໃຊ້ໄດ້...ໃນອະນາຄົດ ຂະບວນການຮຽນຮູ້ຈະຕ້ອງໄດ້ເວົ້າເຖີງວິທີການໝຸນໃຊ້ຄວາມຮູ້ ການຖອດຖອນບົດຮຽນທີ່ໄດ້ຈາກການປະຕິບັດຕົວຈິງ...

·      ເປົ້າໝາຍຂອງການຮຽນຮູ້ ແມ່ນ ໜຶ່ງ ຕ້ອງກະຕຸ້ນໃຫ້ຜູ້ຮຽນຮູ້ໄດ້ເຂົ້າໃຈສະພາບການໃນປະຈຸບັນ ແລະ ຍອມຮັບວ່າ ເກີດຂຶ້ນຈິງ ມີຢູ່ຈິງ...ສອງ ເມື່ອເຫັນສະພາບການໃນປະຈຸບັນຢ່າງຊັດເຈນແລ້ວ ກໍຕ້ອງຮູ້ວ່າຕົວເອງມີສ່ວນກ່ຽວຂ້ອງ ຮັບຜິດຊອບໃນສ່ວນໃດ ຈະແກ້ໄຂ ປັບປຸງ ພັດທະນາແນວໃດ...ແລະ ສາມ ຮູ້ວ່າທ່າແຮງຂອງຕົວເອງມີຫຍັງແດ່ ຕ້ອງພັດທະນາເລື່ອງຫຍັງແດ່ ເພື່ອໃຫ້ສາມາດຮັບມືກັບສະຖານະການໃນປະຈຸບັນ ແລະ ຄວາມຮັບຜິດຊອບທີ່ຕົວເອງມີສ່ວນກ່ຽວຂ້ອງ...

·      ຄວາມໝັ້ນໃຈໃນຕົວເອງ ສາມາດສ້າງໄດ້...ປັດໄຈທີ່ເຮັດໃຫ້ເຮົາເກີດຄວາມໝັ້ນໃຈໃນຕົວເອງ ແມ່ນ ມີຄວາມຮູ້ທີ່ພຽງພໍສຳລັບການຕໍ່ຍອດ ບໍ່ແມ່ນຮູ້ເບິ່ດທຸກເລື່ອງ ແຕ່ໃຫ້ຮູ້ວ່າຈະໄປຊອກຮູ້ເລື່ອງຫຍັງ ຢູ່ໄສ ຮູ້ສ່ຳໃດ...ຮູ້ຈັກຊື່ມຊົມກັບຄວາມສຳເລັດ ແມ້ວ່າຈະເປັນເລື່ອງເລັກນ້ອຍກໍຕາມ...ມີເປົ້າໝາຍໃນຊີວິດ...

·      ການອອກແບບຂະບວນການຮຽນຮູ້ໄດ້ດີ ມີປັດໄຈສອງເລື່ອງ...ເລື່ອງທີ່ໜຶ່ງ ເລື່ອງວິທີຄິດ ຄວາມຄິດ ຄວາມເຊື່ອຂອງຜູ້ອອກແບບຂະບວນການ ມີຄວາມເຊື່ອແນວໃດຂະບວນການຮຽນຮູ້ທີ່ອອກແບບກໍຈະອອກມາແນວນັ້ນ...ເລື່ອງທີ່ສອງ ວິຊາການ ວິທີການ ທັກສະທີ່ຜູ້ອອກແບບມີຢູ່ ແລະ ທີ່ຕ້ອງຊອກຫາເພິ່ມຕື່ມ...

·      ຕົວຢ່າງເລື່ອງຄວາມເຊື່ອຂອງນັກຈັດຂະບວນການຮຽນຮູ້...ເຊື່ອວ່າ ຄົນເຮົາສາມາດຮຽນຮູ້ໄດ້ ຖ້າມີໂອກາດທີ່ແທດເໝາະ...ເຊື່ອວ່າ ຄົນເຮົາບໍ່ໄດ້ເລິ່ມຕົ້ນຈາກສູນ ແມ້ວ່າຈະບໍ່ມີຄວາມຮູ້ ແຕ່ກໍມີຄວາມຄິດ...ເຊື່ອວ່າ ຄວາມແຕກຕ່າງຂອງຄວາມຄິດແລະພຶດຕິກຳຂອງຄົນ ສາມາດເຮັດໃຫ້ເກີດການຮຽນຮູ້ໄດ້...ໂອກາດຂອງການຮຽນຮູ້ ມີຢູ່ໃນທຸກສະຖານະການ...

·      ການອອກແບບຂະບວນການຮຽນຮູ້ຕ້ອງອິງກັບຄວາມຕ້ອງການ ແລະ ຄວາມພ້ອມຂອງຜູ້ຮຽນຮູ້...

·   ກຸ່ມເປົ້າໝາຍແຕ່ລະກຸ່ມ ກໍມີວິທີການຮຽນຮູ້ ແລະ ຮັບຮູ້ທີ່ແຕກຕ່າງກັນ...ອາຍຸ ການສຶກສາ ປະສົບການ ເປັນສິ່ງທີ່ເຮົາຕ້ອງພິຈາລະນາໃນການອອກແບບຂະບວນການຮຽນຮູ້...

·   ອ່ານບໍ່ອອກ ຂຽນບໍ່ໄດ້ ບໍ່ເປັນອຸປະສັກໃນການຮຽນຮູ້...ໃນຖານະນັກຈັດຂະບວນການຮຽນຮູ້ ເຮົາຕ້ອງສ້າງເງື່ອນໄຂໃຫ້ເກີດການຮຽນຮູ້ໃຫ້ໄດ້...ຂຽນບໍ່ໄດ້ ກໍບໍ່ຕ້ອງໃຫ້ຂຽນ ເຮົາກໍໃຫ້ແຕ້ມຮູບ...ແຕ້ມບໍ່ໄດ້ ກໍໃຫ້ໃຊ້ສັນຍະລັກ ແລະ ອະທິບາຍ...

·      ຖ້າເຮົາຍັງຊອກຫາສິ່ງທີ່ເຮົາຮັກທີ່ຈະເຮັດບໍ່ພົບ ເຮົາກໍຕ້ອງຝຶກທີ່ຈະຮັກໃນສິ່ງທີ່ເຮັດ...

.....ພົບກັນຕອນຕໍ່ໄປເດີ້ພີ່ນ້ອງ...😊.....