ບົດຮຽນການເປັນຜູ້ໃຫ້ຄຳແນະນຳ
(Mentor)
 |
| By Techin2018 |
...ໜ້າວຽກທີ່ສຳຄັນຂອງຜູ້ໃຫ້ຄຳແນະນຳ (Mentor) ກໍແມ່ນການຊ່ວຍໃຫ້ຜູ້ຮັບຄຳແນະນຳ (Mentee) ສາມາດເຮັດວຽກໄດ້
ຫຼື ສາມາດສ້າງຄວາມປ່ຽນແປງທີ່ດີໃນເລື່ອງໃດໜຶ່ງໃຫ້ບັນລຸຕາມເປົ້າໝາຍທີ່ໄດ້ກຳນົດໄວ້...ການຊ່ວຍເຮັດໄດ້ໂດຍການຖ່າຍທອດຄວາມຮູ້
ຖ່າຍທອດເຕັກນິກການເຮັດວຽກ ທັກສະການໃຊ້ຊີວິດໃນການເຮັດວຽກ ໃຫ້ຜູ້ຮັບຄຳແນະນຳ ອາດຈະເປັນພະນັກງານໃໝ່
ຫຼືຜູ້ທີ່ຈະຂຶ້ນໄປຕຳແໜ່ງໃໝ່ ຫຼື ຄົນທີ່ກຳລັງຈະເຮັດເລື່ອງໃໝ່ໆ ທີ່ຍັງບໍ່ເຄີຍເຮັດ
ບໍ່ມີຄວາມຮູ້ ຄວາມສາມາດກ່ຽວກັບເລື່ອງນັ້ນມາກ່ອນ...ນອກຈາກນັ້ນ ເມື່ອຖ່າຍທອດແລ້ວ ຜູ້ໃຫ້ຄຳແນະນຳ
(Mentor) ກໍຮ່ວມໃນການປະຕິບັດຕົວຈິງເປັນບາງໄລຍະຕາມເງື່ອນໄຂ...
...ບົດຮຽນແລະປະສົບການຕໍ່ໄປນີ້
ເປັນສ່ວນໜຶ່ງຈາກການໄດ້ຮ່ວມຮຽນຮູ້ກັບບັນດາໝູ່ມິດນັກພັດທະນາ ແລະ ຊາວບ້ານ
ທີ່ໄດ້ມີສ່ວນຮ່ວມໃນການສ້າງສາພັດທະນາຊຸມຊົນ ເພື່ອໃຫ້ມີການປ່ຽນແປງທີ່ດີຂຶ້ນ
ສາມາດປັບຕົວເຂົ້າກັບຄວາມປ່ຽນແປງທີ່ເປັນໄປຢ່າງໄວວາໃນປະຈຸບັນ...ຂ້າພະເຈົ້າຂໍເປີດຮັບເອົາບົດຮຽນ
ແລະ ປະສົບການຈາກທ່ານ ເພື່ອເຕີມເຕັມ ແລະ
ສ້າງສີສັນແຫ່ງການຮຽນຮູ້ດ້ວຍຄວາມຍິນດີເປັນຢ່າງຍິ່ງ...
1. ຜູ້ໃຫ້ຄຳແນະນຳ (Mentor) ຕ້ອງມີຄວາມຮູ້ໃນເລື່ອງທີ່ຈະແນະນຳ...ມີຄວາມສາມາດໃນການສື່ສານທີ່ດີ...
2. ເຮົາຕ້ອງເຊື່ອວ່າ ຜູ້ຮັບຄຳແນະນຳ (Mentee) ບໍ່ໄດ້ເລີ່ມຕົ້ນແບບບໍ່ມີຫຍັງເລີຍ...ແມ້ວ່າເຂົາເຈົ້າຍັງບໍ່ມີຄວາມຮູ້ໃນເລື່ອງທີ່ເຮົາຈະແນະນຳ
ແຕ່ເຂົາເຈົ້າມີຄວາມຄິດ ມີມຸມມອງເປັນຂອງຕົວເອງ...
3. ເຮົາຕ້ອງເຊື່ອວ່າ ຜູ້ຮັບຄຳແນະນຳ (Mentee) ສາມາດພັດທະນາຕົວເອງໄດ້ ຖ້າໄດ້ຮັບການແນະນຳທີ່ແທດເໝາະ
ຖືກເລື່ອງ ຖືກເວລາ...
4. ການໃຫ້ກຽດ ແລະ ເຄົາລົບເຊິ່ງກັນແລະກັນ
ເປັນພື້ນຖານຂອງການໃຊ້ຊີວິດຮ່ວມກັບຄົນອື່ນໃນສັງຄົມ...ຢ່າໄປຄິດວ່າ ຜູ້ຮັບຄຳແນະນຳ (Mentee) ຈະດ້ອຍກວ່າເຮົາ ເຂົາມີດີຫຼາຍແນວ ເຮົາບໍ່ສາມາດຮູ້ໄດ້ ຈົນກວ່າຈະເຮົາຈະເປີດໃຈຮຽນຮູ້ເຂົາເຈົ້າ...
5. ການໃຫ້ກຳລັງໃຈ ແລະ ສ້າງແຮງບັນດານໃຈໃຫ້ກັບຜູ້ຮັບຄຳແນະນຳ (Mentee) ເປັນເລື່ອງສຳຄັນ...ຍ້ອນວ່າ ເຂົາເຈົ້າຍັງບໍ່ເຄີຍມີປະສົບການ
ຍັງບໍ່ມີຄວາມຮູ້ ດັງນັ້ນ ການຖ່າຍທອດຄວາມຮູ້ ຕ້ອງໃຫ້ມ່ວນ
ໃຫ້ເປັນເລື່ອງໃກ້ຕົວເຂົາເຈົ້າ ຍ່ອຍຄວາມຮູ້ອອກມາໃຫ້ເປັນເລື່ອງທີ່ຈັບຕ້ອງໄດ້ ແລະ
ບອກເຂົາເຈົ້າສະເໝີວ່າ “ເຈົ້າເຮັດໄດ້”...
6. ການສ້າງຄວາມປະທັບໃຈໃນເທືອທຳອິດທີ່ໄດ້ພົບກັບຜູ້ຮັບຄຳແນະນຳ
(Mentee) ເປັນເລື່ອງສຳຄັນ ຍ້ອນວ່າ
ມີຜົນຕໍ່ການຍອມຮັບຈາກຜູ້ຮັບຄຳແນະນຳ (Mentee)...ຖ້າຮູ້ສຶກດີຕັ້ງແຕ່ທຳອິດ
ທຸກຢ່າງກໍຈະສະດວກໃນຕອນຕໍ່ໄປ...
7. ການໃຫ້ຄຳແນະນຳ ແມ່ນຕ້ອງໃຫ້ຜູ້ຮັບຄຳແນະນຳໄດ້ຮັບຮູ້ ແລະ
ຍອມຮັບກ່ອນວ່າ ຄວາມເປັນຈິງແມ່ນຫຍັງ ຈາກນັ້ນຄ່ອຍແນະນຳຕໍ່ໄປວ່າ
ຄວາມເປັນຈິງທີ່ເປັນຢູ່ມັນມີຄວາມສຳຄັນແນວໃດ ມີຜົນດີ ຜົນເສຍແນວໃດ...ແລະ
ທ່າແຮງຂອງເຮົາໃນການປະຕິບັດຕົວຈິງເລື່ອງນັ້ນມີແນວໃດແດ່ ແລະ ຈະປະຕິບັດແນວໃດແດ່...
8. ຄຳແນະນຳບໍ່ໄດ້ມີສູດແນ່ນອນ ຍ້ອນວ່າ
ມີປັດໄຈຫຼາຍເລື່ອງທີ່ເຮົາບໍ່ສາມາດຄວບຄຸມໄດ້ ດັງນັ້ນ ຕ້ອງວິເຄາະຮ່ວມກັນກັບຜູ້ຮັບຄຳແນະນຳ
(Mentee)...ໃຫ້ມີການສະທ້ອນຂໍ້ມູນທີ່ກົງໄປກົງມາ
ເພື່ອໃຫ້ຜູ້ໃຫ້ຄຳແນະນຳໄດ້ເຫັນພາບທີ່ຊັດເຈນ ແລະ
ສາມາດໃຫ້ຄຳແນະນຳທີ່ສະເພາະເຈາະຈົງໄດ້...
9. ວິທີການໃຫ້ຄຳແນະນຳເຮັດໄດ້ຫຼາຍແບບ...ແບບຊອງໜ້າ...ແບບກຸ່ມ
ແມ່ນ ມີຜູ້ໃຫ້ຄຳແນະນຳ (Mentor) ຜູ້ດຽວ...ແບບທີມ
ແມ່ນ ມີຜູ້ໃຫ້ຄຳແນະນຳ (Mentor) ຫຼາຍຄົນ...ການໃຫ້ຄຳແນະນຳແບບທາງໄກ
ແມ່ນ ການໂທລະສັບ ການແຊທ ການສົ່ງອີເມວ...
10. ພາຍຫຼັງການໃຫ້ຄຳແນະນຳ ຄວນຈັດໃຫ້ມີການສະໜັບສະໜຸນທີ່ຕໍ່ເນື່ອງ ເພື່ອຮັບປະກັນວ່າ ຜູ້ຮັບຄຳແນະນຳ ສາມາດນຳຄວາມຮູ້ໄປປະຕິບັດຕໍ່ເນື່ອງໃຫ້ບັນລຸຕາມຈຸດປະສົງທີ່ໄດ້ຕັ້ງໄວ້...
...😊...
ไม่มีความคิดเห็น:
แสดงความคิดเห็น