ບົດຮຽນການເປັນໂຄ້ຊ
(Coach)
 |
| By Techin2018 |
...ຂ້າພະເຈົ້າຂໍໃຊ້ຄຳວ່າ “ໂຄ້ຊ” ໃນບົດຄວາມນີ້
ຍ້ອນວ່າໃນພາສາລາວເຮົາ ຍັງບໍ່ໄດ້ມີຄຳແປທີ່ໄດ້ກຳນົດໄວ້ຢ່າງຊັດເຈນ...ມີຫຼາຍທ່ານໄດ້ໃຫ້ຄຳແປ
“ການໂຄ້ຊ” ວ່າ
ການສອນວຽກແບບໃກ້ຊິດ ການສອນວຽກຕົວຈິງ ການຊີ້ແນະການເຮັດວຽກ...ສ່ວນຜູ້ທີ່ເປັນ ໂຄ້ຊ
ກໍຈະແປວ່າ ຜູ້ສອນວຽກແບບໃກ້ຊິດ ຜູ້ສອນວຽກຕົວຈິງ ຜູ້ຊີ້ແນະການເຮັດວຽກ...ດັງນັ້ນ ຂ້າພະເຈົ້າຈຶງໃຊ້ຄຳວ່າ
ໂຄ້ຊ ເປັນການຫຼີກລ່ຽງຄວາມສັບສົນ...
...ເພື່ອໃຫ້ເກີດຄວາມຊັດເຈນ ຂ້າພະເຈົ້າຈະຂໍອະທິບາຍຄວາມໝາຍ “ການໂຄ້ຊ” ກ່ອນ ໃຫ້ເຫັນພາບລວມກ່ອນ ວ່າ “ການໂຄ້ຊ” ນີ້ແມ່ນຫຍັງແທ້...ຈາກປະສົບການຂອງຂ້າພະເຈົ້າ “ການໂຄ້ຊ” ແມ່ນ
“ໂຄ້ຊ” ໃຊ້ຂະບວນການເພື່ອກະຕຸ້ນ
“ຜູ້ຖືກໂຄ້ຊ” ໄດ້ດຶງເອົາທ່າແຮງຂອງຕົວເອງອອກມາເພື່ອໝຸນໃຊ້ໃນເຫດການໃດໜຶ່ງ
ໂດຍ “ຜູ້ຖືກໂຄ້ຊ” ເຫັນທ່າແຮງຂອງຕົວເອງ ຕັດສິນໃຈເອງ ແລະ
ສ້າງຄວາມປ່ຽນແປງທີ່ດີໃຫ້ເກີດຂຶ້ນດ້ວຍຕົວເອງ...ເວົ້າໃຫ້ງ່າຍຂຶ້ນ ແມ່ນ “ໂຄ້ຊ” ຈະເປັນຜູ້ສ້າງຂະບວນການ ເປັນຜູ້ກະຕຸ້ນ ສ່ວນ “ຜູ້ຖືກໂຄ້ຊ” ຈະເປັນຜູ້ສຳຫຼວດ ຊອກຫາ ຕັດສິນໃຈ ແລະ
ນຳພະລັງນັ້ນໄປສ້າງຄວາມປ່ຽນແປງຕໍ່ໄປ...
...ບົດຮຽນຕໍ່ໄປນີ້ ເປັນບົດຮຽນຂອງຂ້າພະເຈົ້າເອງ
ໃນການໂຄ້ຊໃຫ້ກັບບຸກຄົນໃນວົງການການພັດທະນາຊຸມຊົນໃນຂົງເຂດວຽກຕ່າງໆ ດັງນັ້ນ
ອາດຈະມີມຸມມອງທີ່ແຕກຕ່າງຈາກຜູ້ມີປະສົບການອີກຫຼາຍໆ ທ່ານ ຂ້າພະເຈົ້າມີຄວາມຍິນດີທີ່ຈະນ້ອມຮັບ
ແລະ ຮຽນຮູ້ໃນມຸມມອງທີ່ມີຄວາມແຕກຕ່າງ ເພື່ອໃຫ້ການຮຽນຮູ້ມີຄວາມຫຼາກຫຼາຍ ແລະ ເຕີມເຕັມ...
1. ການໂຄ້ຊ ບໍ່ແມ່ນ ການສອນ...ການໂຄ້ຊ
ແນໃສ່ການສ້າງສະພາບແວດລ້ອມທີ່ແທດເໝາະເພື່ອໃຫ້ ຜູ້ຖືກໂຄ້ຊ
ໄດ້ເຫັນທ່າແຮງທີ່ມີຢູ່ຂອງຕົວເອງ ແລະ ສາມາດຮັບຮູ້ເຖີງທ່າແຮງຂອງຕົວເອງ...ການສອນ
ເປັນການເພີ່ມເຕີມສິ່ງໃໝ່ໆ ໃຫ້ຜູ້ຮຽນ...
2. ເປົ້າໝາຍຂອງການໂຄ້ຊ ແມ່ນ ການເຮັດໃຫ້ ຜູ້ຖືກໂຄ້ຊ ໄດ້ເຫັນຄວາມເປັນຈິງ
ແລະ ເກີດຈິດສຳນຶກຮັບຜິດຊອບ ບົນພື້ນຖານທ່າແຮງຂອງຕົວເອງ...
3. ບໍ່ວ່າຈະເປັນໂຄ້ຊ...ຄູຝຶກ...ຜູ້ອຳນວຍຄວາມສະດວກໃນການຮຽນຮູ້...ຜູ້ໃຫ້ຄຳແນະນຳ (Mentor) ຕ່າງກໍໃຊ້ຂະບວນການໃຫ້ຜູ້ຮຽນຮູ້ໄດ້ເຫັນຄວາມເປັນຈິງຂອງຕົວເອງ ແລະ ຍອມຮັບຄວາມຈິງນັ້ນຈົນເກີດຈິດສຳນຶກຮັບຜິດຊອບ...
4. ທຸກສິ່ງທີ່ “ຜູ້ຖືກໂຄ້ຊ” ໄດ້ເຮັດມາ ສິ່ງນັ້ນລ່ະ ແມ່ນຈຸດເລີ່ມຕົ້ນໃນການຊອກຫາທ່າແຮງຂອງເຂົາເຈົ້າ...
5. ບາງເທືອ ເຮົາເປັນຜູ້ຮັບຟັງທີ່ດີ ແລະ ຖາມຄຳຖາມສຳຄັນສອງສາມຄຳຖາມ
ກໍສາມາດເຮັດໃຫ້ “ຜູ້ຖືກໂຄ້ຊ” ໄດ້ເຫັນຄວາມເປັນຈິງທີ່ເປັນຢູ່...
6. ສຸດທ້າຍຂອງການໂຄ້ຊ ແມ່ນ ການກະຕຸ້ນໃຫ້ “ຜູ້ຖືກໂຄ້ຊ” ໄດ້ເກີດຄວາມມັ່ນໃຈໃນທ່າແຮງຂອງຕົວເອງ...
7. ພື້ນຖານຂອງຜູ້ເປັນໂຄ້ຊ ແມ່ນ ບໍ່ເອົາຕົວເອງເປັນໄຈກາງ...ຕ້ອງມີນ້ຳໃຈ...ຟັງຄົນໄດ້ດີ...ຈັບປະເດັນໄດ້...ຮູ້ຈັກສັງເກດ...ຮັບຮູ້ອາລົມຄວາມຮູ້ສຶກຄົນອື່ນ...ສາມາດໂອບອຸ້ມເອົາບົດຮຽນແລະປະສົບການດີໆ...ຕັ້ງຄຳຖາມເປັນ...ທີ່ສຳຄັນ
ມີຄວາມເປັນມິດ ເປັນໝູ່ເພື່ອນ...
8. “ໂຄ້ຊ” ຕ້ອງມີຄວາມເຊື່ອວ່າ
ຄົນເຮົາທຸກຄົນມີທ່າແຮງຢູ່ໃນຕົວເອງເປັນພື້ນຖານຢູ່ແລ້ວ...ສົມທຽບໄດ້ກັບພະລັງທີ່ຖືກເຊື່ອງຊ່ອນຢູ່
ເພື່ອລໍຖ້າວັນທີ່ຈະນຳເອົາອອກມາໃຊ້...
9. ການໂຄ້ຊນັ້ນ ຈະຕ້ອງພ້ອມໃຈກັນທັ້ງສອງຝ່າຍ ທັ້ງ
“ໂຄ້ຊ” ແລະ “ຜູ້ຖືກໂຄ້ຊ”...
10. ສິ່ງທີ່ຍາກທີ່ສຸດຂອງ “ຜູ້ຖືກໂຄ້ຊ” ແມ່ນການເລີ່ມຕົ້ນເຊື່ອໝັ້ນໃນທ່າແຮງຂອງຕົວເອງ...ການແຫວກອອກຈາກຄວາມລຶ້ງເຄີຍ...ດັງນັ້ນ
“ໂຄ້ຊ” ຈະຕ້ອງຊ່ວຍກະຕຸ້ນໃຫ້ “ຜູ້ຖືກໂຄ້ຊ” ໄດ້ເຫັນຄວາມສຳເລັດເລັກໆ ນ້ອຍໆ ທີ່ເກີດຂຶ້ນເປັນໄລຍະ ອິງຈາກປະສົບການຂອງ
“ຜູ້ຖືກໂຄ້ຊ” ກໍຈະຊ່ວຍໃຫ້ “ຜູ້ຖືກໂຄ້ຊ” ໄດ້ເຫັນຄວາມສຳຄັນຂອງຄວາມສຳເລັດທີ່ເກີດຈາກທ່າແຮງຂອງຕົວເອງ
ແລະ ຈະສົ່ງຜົນຕໍ່ຄວາມເຊື່ອໝັ້ນທ່າແຮງຂອງຕົວເອງໃນໄລຍະຍາວ...
11. ການໂຄ້ຊ ສາມາດເກີດຂຶ້ນໄດ້ຕະຫຼອດເວລາ...ອາດຈະໃຊ້ເວລາພຽງແຄ່ໜຶ່ງນາທີ
ຫຼືອາດຈະໜຶ່ງຊົ່ວໂມງກໍເປັນໄປໄດ້...
12. ການໃຊ້ຄຳຖາມໃນການໂຄ້ຊ
ແມ່ນມີຄວາມສຳຄັນຫຼາຍ...ຖາມດ້ວຍຄຳຖາມປິດ ຕອບໄດ້ງ່າຍ
ແຕ່ບໍ່ໄດ້ໃຊ້ຄວາມຄິດຫຼາຍ...ຖາມດ້ວຍຄຳຖາມເປິດ ຕອບໄດ້ຍາກ ແຕ່ໃຊ້ຄວາມຄິດຫຼາຍ...ດັງນັ້ນ
ໃນການໂຄ້ຊ ຕ້ອງໃຊ້ຄຳຖາມເປິດ...
13. ໃນແຕ່ລະຄັ້ງຂອງການໂຄ້ຊ “ໂຄ້ຊ” ຈະບໍ່ໄດ້ຕັ້ງເປົ້າໝາຍວ່າຈະບັນລຸແນວໃດ
ແຕ່ຈະປ່ອຍໄປຕາມຈັງຫວະ ຄວາມພ້ອມຂອງ “ຜູ້ຖືກໂຄ້ຊ”...
14. ຄວາມທ້າທາຍຂອງການໂຄ້ຊ ແມ່ນ ການທີ່ ຜູ້ຖືກໂຄ້ຊ
ນຳເອົາຄວາມຈິງທີ່ຕົວເອງໄດ້ຮັບຮູ້ ແລະ ຍອມຮັບ ລວມເຖີງເກີດຈິດສຳນຶກຮັບຜິດຊອບ ໄປປະຕິບັດຕົວຈິງ...ການຕິດຕາມຄວາມປ່ຽນແປງຫຼັງຈາກມື້ທີ່ໄດ້ຮັບການໂຄ້ຊ
ຈຶງເປັນເລື່ອງທີ່ຕ້ອງພິຈາລະນາ ວ່າຈະເຮັດແນວໃດຕໍ່ໄປ...
ไม่มีความคิดเห็น:
แสดงความคิดเห็น