ຄວາມຄ້າຍຄືທີ່ແຕກຕ່າງ ຂອງບົດບາດພາຍໃຕ້ຄຳວ່າ “ນັກຈັດຂະບວນການຮຽນຮູ້”...Same Same But Different ວ່າຊັ້ນ...

By Techin2018

...ໃນບົດຄວາມຕອນທີ່ຜ່ານໆ ມາ ໄດ້ນຳສະເໜີບົດຮຽນຂອງການເປັນນັກຈັດຂະບວນການຮຽນຮູ້ໄວ້ໃນບົດບາດຕ່າງໆ ກັນ ກໍມີບົດບາດການເປັນຄູຝຶກ, ຜູ້ອຳນວຍຄວາມສະດວກໃນການຮຽນຮູ້, ໂຄ້ຊ ແລະ ຜູ້ໃຫ້ຄຳແນະນຳ...ມີຜູ້ອ່ານທີ່ສົນໃຈ ຕິດຕໍ່ມາສອບຖາມວ່າ ບົດບາດແຕ່ລະບົດບາດນີ້ ມີຄວາມແຕກຕ່າງກັນແນວໃດ ຍ້ອນວ່າ ໃນວົງການການຈັດຂະບວນການຮຽນຮູ້ໃນລາວເຮົານີ້ ຍັງມີການສົນທະນາເລື່ອງນີ້ກັນໃນວົງຈຳກັດຢູ່...ດັງນັ້ນ ຂ້າພະເຈົ້າ ກໍຈະນຳສະເໜີໃຫ້ຜູ້ອ່ານໄດ້ເຫັນຄວາມຄ້າຍຄື ແລະ ຄວາມແຕກຕ່າງ ເພື່ອວ່າ ຖ້າມີໂອກາດ ທ່ານກໍຈະໄດ້ເຮັດບົດບາດຂອງຕົວເອງໄດ້ຢ່າງມີປະສິດທິພາບ ແລະ ປະສິດທິຜົນ...

ຫົວຂໍ້.	ຄູຝຶກ. (Trainer)	ຜູ້ອຳນວຍຄວາມສະດວກໃນການຮຽນຮູ້. (Facilitator)	ໂຄ້ຊ. (Coach)	ຜູ້ໃຫ້ຄຳແນະນຳ. (Mentor)
ຄວາມໝາຍ.	ຜູ້ຖ່າຍທອດຄວາມຮູ້ໃຫ້ກັບຜູ້ຮຽນ.	ຜູ້ຈັດຂະບວນການໃຫ້ຜູ້ເຂົ້າຮ່ວມໄດ້ແລກປ່ຽນຮຽນຮູ້ຮ່ວມກັນ ແລະ ນຳພາຂະບວນການໃຫ້ຜູ້ເຂົ້າຮ່ວມໄດ້ບັນລຸຈຸດປະສົງທີ່ໄດ້ຕັ້ງໄວ້.	ຜູ້ສ້າງຂະບວນການ, ກະຕຸ້ນ “ຜູ້ຖືກໂຄ້ຊ” ໃຫ້ສຳຫຼວດ ຊອກຫາ ຕັດສິນໃຈ ແລະ ນຳພະລັງຂອງຕົວເອງໄປສ້າງຄວາມປ່ຽນແປງ.	ຜູ້ໃຫ້ຄຳແນະນຳ ແລະ ຊ່ວຍໃຫ້ຜູ້ຮັບຄຳແນະນຳ (Mentee) ສາມາດເຮັດວຽກໄດ້ ຫຼື ສາມາດສ້າງຄວາມປ່ຽນແປງທີ່ດີໃນເລື່ອງໃດໜຶ່ງໃຫ້ບັນລຸຕາມເປົ້າໝາຍທີ່ໄດ້ກຳນົດໄວ້.
ເປົ້າໝາຍ.	ຜູ້ຮ່ວມຂະບວນການເຂົ້າໃຈສະຖານະການຄວາມເປັນຈິງ ແລະ ຍອມຮັບໄດ້, ເກີດຈິດສຳນຶກຮັບຜິດຊອບທີ່ຈະນຳໄປສູ່ການປ່ຽນແປງ, ຮູ້ທ່າແຮງຂອງຕົວເອງໃນການສ້າງຄວາມປ່ຽນແປງໃຫ້ເກີດຂຶ້ນ.
ຄວາມຮັບຜິດຊອບ.	ເປັນ “ທະນາຄານຄວາມຮູ້”.	ເປັນ “ນັກອອກແບບຂະບວນການທີ່ດີ”.	ເປັນ “ນັກຟັງ ແລະ ນັກຕັ້ງຄຳຖາມທີ່ດີ”.	ເປັນ “ນັກຟັງ ແລະ ໃຫ້ຂໍ້ສະເໜີແນະທີ່ດີ”.
ພາບລັກ. (Image)	ເປັນ “ຜູ້ຮູ້”.	ເປັນ “ຜູ້ວາງກັບດັກທາງການຮຽນຮູ້”.	ເປັນ “ແວ່ນສະທ້ອນ”.	ເປັນ “ຕົວແບບ”.
ລັກສະນະການຈັດຂະບວນການຮຽນຮູ້.	ສື່ສານທາງດຽວ,  ໃຫ້ເກີດການປ່ຽນແປງດ້ານຄາມຮູ້, ທັດສະນະຄະຕິ, ແລະ ທັກສະ.	ສື່ສານສອງທາງ, ປ່ຽນແປງ ວິທີຄິດ ແລະ ນິໄສສ່ວນບຸກຄົນ.	ສື່ສານສອງທາງ, ເປິດທ່າແຮງໃນຕົວບຸກຄົນ.	ສື່ສານສອງທາງ, ຮັກສາສິ່ງທີ່ເກີດຂຶ້ນ ແລະ ພັດທະນາ, ຕໍ່ຍອດ.
ການຮັບຮູ້ຂອງຜູ້ຮ່ວມຂະບວນການ.	ຜູ້ຮ່ວມຂະບວນການ ຮັບຮູ້ວ່າກຳລັງຮຽນຮູ້ກັບຄູຝຶກ.	ຜູ້ຮ່ວມຂະບວນການມີທັ້ງຮັບຮູ້ ແລະ ບໍ່ຮູ້ຕົວ.	ຜູ້ຮ່ວມຂະບວນການ ຮັບຮູ້ວ່າກຳລັງຖືກໂຄ້ຊ.	ຜູ້ຮ່ວມຂະບວນການ ຮັບຮູ້ວ່າກຳລັງຢູ່ໃນການຮັບຄຳແນະນຳ.
ຂົງເຂດແລະໄລຍະເວລາ	ກຳນົດໄວ້ຊັດເຈນ.	ເປັນໄປຕາມສະຖານະການ, ບາງເທືອມີໂອກາດທີ່ແທດເໝາະ ກໍສາມາດເຮັດໄດ້.	ກຳນົດໄວ້ຊັດເຈນ.	ກຳນົດໄວ້ຊັດເຈນ.

...ຈາກຕາຕະລາງ ກໍຈະເຫັນໄດ້ວ່າ ບົດບາດແຕ່ລະບົດບາດໃນການຈັດຂະບວນການຮຽນຮູ້ ຕ່າງກໍມີເປົ້າໝາຍດຽວກັນ...ຄວາມແຕກຕ່າງຈະເປັນໃນເລື່ອງລາຍລະອຽດຂອງວິທີການ ແລະ ຈຸດປະສົງ...ບາງເທືອ ໃນຖານະນັກຈັດຂະບວນການຮຽນຮູ້ ກໍຕ້ອງເຮັດຫຼາຍບົດບາດໃນໄລຍະເວລາດຽວກັນ ທັ້ງນີ້ ກໍຂຶ້ນຢູ່ກັບຈຸດປະສົງຂອງການຈັດຂະບວນການໃນເທືອນັ້ນໆ...😊