ການສ້າງຂີດຄວາມສາມາດໃຫ້ກັບພະນັກງານ ທ່າມກາງສະຖານະການໂຄວິດ-19.

...ຍັງບໍ່ຢຸດ ບໍ່ເຊົາເທືອ ກັບສະຖານະການຂອງການແພ່ລະບາດຂອງໂຄໂລນ່າໄວຣັສ...ເຖີງແມ້ວ່າການແພ່ລະບາດເກີດຂຶ້ນຢູ່ເລື້ອຍໆ ຊີວິດຂອງເຮົາກໍ່ຕ້ອງດຳເນີນໄປກັນຕໍ່ໄປ...

...ການພັດທະນາຄົນໃນອົງກອນ ກໍ່ຍັງຕ້ອງພັດທະນາຕໍ່ໄປ ບໍ່ສາມາດຢຸດ ເພື່ອລໍຖ້າໃຫ້ສະຖານະການດີຂຶ້ນ ກວ່າຈະດີຂຶ້ນກໍ່ຄົງໃຊ້ເວລາອີກດົນ ຖ້າບໍ່ເຮັດຫຍັງເລີຍ ກໍ່ຄົງຈະເຮັດໃຫ້ອົງກອນພົບກັບບັນຫາອື່ນໆ ຕາມມາອີກຫຼາຍເລື່ອງ...

...ສັນຍານທີ່ສຳຄັນ ທີ່ອົງກອນທຸກອົງກອນຕ້ອງໃຫ້ຄວາມສຳຄັນ ແມ່ນ ພຶດຕິກຳຂອງການໃຊ້ຊີວິດຂອງຄົນໃນຊຸມຊົນທີ່ຈະປ່ຽນໄປ...ຄົນຈະບໍ່ເຄື່ອນຍ້າຍໄປໄສມາໄສມັກງ່າຍ ມັກຈະຢູ່ຕິດບ້ານ ຕິດເຮືອນ ຢູ່ໃນພື້ນທີ່ຂອງຕົວເອງ ມີກິດຈະກຳທີ່ເປັນໄປຕາມຄວາມຈຳເປັນຂອງຊີວິດ ການພົບພໍ້ກັນໂດຍໄປຫາກັນກໍ່ຈະຫຼຸດລົງ ການພົບກັນໂດຍໃຊ້ເທັກໂນໂລຍີການສື່ສານກໍ່ຈະຫຼາຍຂຶ້ນ...ຄົນຈະຫຼີກລ້ຽງການສຳຜັດ ການຈັບຕ້ອງໃຫ້ໄດ້ຫຼາຍທີ່ສຸດເທົ່າທີ່ຈະເຮັດໄດ້...ຄົນຈະມີຄວາມເປັນສ່ວນຕົວຫຼາຍຂຶ້ນ ບໍ່ນິນິຍົມໃຊ້ບໍລິການສາທາລະນະ ຫຼີກລ້ຽງການໃຊ້ຂອງຮ່ວມກັບຜູ້ອື່ນ...ຄົນຈະບໍ່ຍຶດຕິດກັບຍີ່ຫໍ້ ຫຼື ສິ່ງຂອງທີ່ບໍ່ໄດ້ຈຳເປັນກັບຊີວິດຢ່າງແທ້ຈິງ ຍ້ອນວ່າບໍ່ໄດ້ອອກໄປໄສເລື້ອຍໆ ການກິນຢູ່ກໍ່ແນໃສ່ກິນແບບງ່າຍໆ ຕາມຄວາມຈຳເປັນ...ຈາກພຶດຕິກຳທີ່ປ່ຽນໄປ ກໍ່ຈະສົ່ງຜົນໂດຍກົງກັບການເຮັດວຽກຂອງອົງກອນແນ່ນອນ...ອົງກອນທີ່ຂ້າພະເຈົ້າເວົ້າເຖີງໃນບົດຄວາມນີ້ ກໍ່ຈະແນໃສ່ອົງກອນທີ່ເຮັດວຽກງານພັດທະນາໃນຊົນນະບົດລາວເຮົາ ບໍ່ວ່າຈະເປັນອົງການຈັດຕັ້ງສັງຄົມ, ອົງການສາກົນ ລວມທັ້ງຄູ່ຮ່ວມງານພາກສ່ວນຕ່າງໆ...

...ແນວໂນ້ມການພັດທະນາຂີດຄວາມສາມາດຂອງພະນັກງານໃນອົງກອນ ແມ່ນເກີດຂຶ້ນແນ່ນອນ ຍ້ອນວ່າເຮົາຕ້ອງປັບວິທີການເຮັດວຽກໃຫ້ແທດເໝາະກັບວິຖີຊີວິດຂອງພໍ່ແມ່ປະຊາຊົນ...

...ສິ່ງທີ່ຕ້ອງເຮັດທຳອິດ ແມ່ນ ການປັບວິທີຄິດ ໃຫ້ຮັບຮູ້ວ່າວິຖີຊີວິດຂອງຄົນກຳລັງປ່ຽນແປງໄປແລ້ວ ແລະ ເຂົ້າໃຈກັບສະຖານະການວ່າເກີດຫຍັງຂຶ້ນແດ່ພາຍຫຼັງທີ່ວິຖີຊີວິດຂອງຄົນປ່ຽນໄປ...ພະນັກງານກໍ່ຕ້ອງບອກໃຫ້ໄດ້ວ່າ ຕົວເອງຕ້ອງປັບຕົວແນວໃດແດ່ ຈະພັດທະນາຕົວເອງໄດ້ແນວໃດແດ່ ຈະຮັບມືກັບອາລົມຄວາມຮູ້ສຶກຂອງຕົວເອງແນວໃດແດ່ ໃນກໍລະນີທີ່ເຮັດວຽກຜ່ານເທັກໂນໂລຍີການສື່ສານ ແຕ່ບໍ່ໄດ້ພົບຄົນຕົວເປັນໆ ຄືທີ່ຜ່ານມາ...ນັ່ງລົມກັບຄົນອື່ນຜ່ານຄອມພິວເຕີ້ ຜ່ານຈໍໂທລະສັບ ບາງເທືອກໍ່ບໍ່ແມ່ນເລື່ອງງ່າຍໃນການປັບຕົວໃຫ້ເກີດຄວາມລຶ້ງເຄີຍ...ດັງນັ້ນ ພະນັກງານຈຶງຕ້ອງປັບວິທີຄິດຂອງຕົວເອງໃຫ້ໄດ້ ເພື່ອຜ່ານໄປສູ່ການເຮັດວຽກໄດ້ໃນທຸກສະຖານະການ...

...ອັນດັບທີ່ສອງ ແມ່ນ ປັບວິທີເຮັດວຽກຂອງພະນັກງານ...ຈະຕ້ອງປັບຕົວເອງນັບຕັ້ງແຕ່ການຍອມຮັບວິທີການເຮັດວຽກທີ່ຈະຕ້ອງປ່ຽນແປງໄປ ບາງເທືອ ອາດຈະຕ້ອງໃຊ້ເວລາຫຼາຍຂຶ້ນ ຢູ່ທີ່ຫ້ອງການ ຫຼື ຢູ່ທີ່ເຮືອນ ເພື່ອເຮັດວຽກ...ອາດຈະບໍ່ໄດ້ໃຊ້ເວລາໃນການລົງຍ້ຽມຢາມຂັ້ນບ້ານຄືແຕ່ກ່ອນ ຍ້ອນວ່າຊຸມຊົນອາດຈະບໍ່ຕ້ອນຮັບພະນັກງານຄືແຕ່ກ່ອນ ອັນນີ້ກໍ່ເປັນໄປໄດ້...

...ອັນດັບທີ່ສາມ ແມ່ນ ການພັດທະນາທັກສະດ້ານເທັກໂນໂລຍີການສື່ສານອອນລາຍ ກໍ່ມີຄວາມຈຳເປັນແລ້ວ...ພະນັກງານຕ້ອງຮຽນຮູ້ການໃຊ້ຄອມພິວເຕີ້, ໂທລະສັບແບບສະມ້າດໂຟນ, ແທ໊ບເລັດ ທີ່ຈະເປັນເຄື່ອງມືທີ່ສຳຄັນຕ້ອງໄດ້ໃຊ້ຢ່າງຈິງຈັງ...ການຮຽນຮູ້ ແລະ ນຳໃຊ້ໂປຣແກຣມສື່ສານອອນລາຍ ທີ່ມີຢູ່ຫຼາກຫຼາຍ ເຊີ່ງຂໍ້ດີ ຂໍ້ດ້ອຍ ຂອງແຕ່ລະໂປຣແກຣມກໍ່ມີ ດັງນັ້ນ ຕ້ອງເລືອກໃຫ້ແທດເໝາະກັບຕົວເອງ ແລະ ແທດເໝາະກັບກຸ່ມເປົ້າໝາຍ...

...ອັນດັບທີ່ສີ່ ແມ່ນ ການປັບປຸງ ແລະ ພັດທະນາສື່ການຮຽນຮູ້ໃຫ້ແທດເໝາະກັບກຸ່ມເປົ້າໝາຍຜ່ານເທັກໂນໂລຍີການສື່ສານ ແລະ ພັດທະນາຊ່ອງທາງໃຫ້ຄົນເຂົ້າເຖີງຂໍ້ມູນໄດ້ ແລະ ສະດວກ ຕົວຢ່າງ ສື່ທີ່ເຮັດອອກມາໃນຮູບແບບວີດິໂອ, ຮູບພາບທີ່ໃຫ້ຂໍ້ມູນໄດ້ພາຍໃນຮູບດຽວ, ຄຼິບສຽງ, ເອກະສານອອນລາຍ...ໃນບົດຄວາມນີ້ ຜູ້ຂຽນແນໃສ່ກຸ່ມເປົ້າໝາຍທີ່ສາມາດເຂົ້າເຖີງ ແລະ ນຳໃຊ້ເທັກໂນໂລຍີການສື່ສານໄດ້ ແຕ່ກໍ່ຄິດວ່າໃນອະນາຄົດອັນໃກ້ ໄວໄວນີ້ ຄົນກໍ່ຈະຫັນມາໃຊ້ເທັກໂນໂລຍີການສື່ສານຫຼາຍຂຶ້ນ...

...ບັນທັດຖານໃໝ່ ໃນການພັດທະນາຂີດຄວາມສາມາດຂອງພະນັກງານ...ການອົບຮົມແບບເປັນໝູ່ຄະນະເພື່ອສ້າງຂີດຄວາມສາມາດໃຫ້ກັບພະນັກງານ ອາດຈະຕ້ອງປັບປ່ຽນໄປແລ້ວ ເມື່ອພະນັກງານແຕ່ລະຄົນກໍ່ມີທັກສະໃນການນຳໃຊ້ເທັກໂນໂລຍີໃນການສື່ສານຫຼາຍຂຶ້ນ ກໍ່ສາມາດເຂົ້າຫາແຫຼ່ງຂໍ້ມູນໄດ້ງ່າຍຂຶ້ນ ຕົວຢ່າງ ສາມາດເຂົ້າຫາເອກະສານ, ເຂົ້າຫາຊ່ຽວຊານທີ່ກົງກັບຄວາມຕ້ອງການຂອງຕົວເອງໄດ້...ດັງນັ້ນ ສິ່ງທີ່ອົງກອນຕ້ອງກະກຽມໄວ້ ເພື່ອສ້າງບັນຍາກາດການຮຽນຮູ້ໃຫ້ເກີດຂຶ້ນ ແມ່ນ...

...ການມີສູນຮຽນຮູ້ອອນລາຍຂອງອົງກອນ ເພື່ອເປັນແຫຼ່ງຂໍ້ມູນຂອງອົງກອນ ທີ່ພະນັກງານສາມາດເຂົ້າມາໃຊ້ໄດ້ຕະຫຼອດເວລາ...ການໃຫ້ພະນັກງານໄປຊອກຫາຄວາມຮູ້ຈາກກູເກີ້ລ ເປັນເລື່ອງທີ່ເຮັດໄດ້ ຄວາມຮູ້ມີຫຼາຍທີ່ມີປະໂຫຍດ ແລະ ເຂົ້າເຖີງໄດ້ງ່າຍ ແຕ່ຕ້ອງຮັບປະກັນວ່າ ຄວາມຮູ້ທີ່ໄດ້ມາ ແມ່ນຄວາມຮູ້ທີ່ສາມາດນຳມາໃຊ້ໄດ້ແທ້ຈິງຫຼືບໍ່ ແທດເໝາະຫຼືບໍ່ ພະນັກງານຂອງອົງກອນນຳໃຊ້ຂໍ້ມູນເປັນຫຼືບໍ່ ນີ້ກໍ່ເປັນຄຳຖາມທີ່ສຳຄັນທີ່ອົງກອນຕ້ອງພິຈາລະນາໃຫ້ດີ ເພື່ອບໍ່ໃຫ້ເກີດຄວາມສ່ຽງ ທີ່ຈະສົ່ງຜົນຕໍ່ພາບລັກຂອງອົງກອນໃນໄລຍະຍາວ ບໍ່ວ່າຈະເປັນເລື່ອງຂອງຄວາມຮູ້ຂອງອົງກອນ ຫຼື ເລື່ອງວິທີການເຮັດວຽກທີ່ເປັນເອກະລັກຂອງອົງກອນ...ດັງນັ້ນ ການມີສູນຄວາມຮູ້ຂອງອົງກອນເອງ ຈຶງເປັນຄວາມຈຳເປັນໃນໄລຍະຍາວ...

...ການພັດທະນາພະນັກງານ ແນໃສ່ລາຍບຸກຄົນຊັດເຈນຂຶ້ນ ແທດເໝາະກັບລະດັບຂີດຄວາມສາມາດຂອງແຕ່ລະຄົນໄດ້ຊັດເຈນຂຶ້ນ ຍ້ອນວ່າພະນັກງານແຕ່ລະຄົນຈຳເປັນຕ້ອງພັດທະນາຕົວເອງໃຫ້ທັນກັບຄວາມປ່ຽນແປງຂອງສັງຄົມ ດັງນັ້ນ ພະນັກງານແຕ່ລະຄົນກໍ່ຕ້ອງຮັບຜິດຊອບຕໍ່ການພັດທະນາຕົວເອງ ແລະ ບໍ່ເອື້ອຍອິງກັບຜູ້ອື່ນອີກຕໍ່ໄປ ໃນຂະນະທີ່ອົງກອນກໍ່ຕ້ອງເປີດພື້ນທີ່ຊ້ວນຊູເອົາຜົນຈາກການພັດທະນາຕົວເອງຂອງພະນັກງານໃຫ້ໄດ້ ເພື່ອໃຫ້ບັນລຸຕາມເປົ້າໝາຍຂອງອົງກອນ ຕົວຢ່າງ ມີພື້ນທີ່ແລກປ່ຽນບົດຮຽນການພັດທະນາຕົວເອງ ທີ່ບໍ່ແມ່ນການລາຍງານຜົນ ແຕ່ເປັນການຄົ້ນພົບ ການບອກເຖີງແຮງບັນດານໃຈ ສິ່ງທີ່ຈະສືບຕໍ່ ການສະໜັບສະໜຸນທີ່ຕ້ອງການ...

...ເຄືອຂ່າຍນັກພັດທະນາບຸກຄະລາກອນ ທີ່ພ້ອມຈະໃຫ້ຄຳແນະນຳກັບພະນັກງານ ໃນການພັດທະນາຕົວເອງ ໂດຍການແລກປ່ຽນ ຫຼື ຮັບຄຳແນະນຳຢ່າງທັນເວລາ ໂດຍບໍ່ຈຳເປັນຕ້ອງລໍຖ້າການຝຶກອົບຮົມ ຫຼື ການຮຽນຮູ້ແບບກຳນົດເວລາອີກຕໍ່ໄປ...

...ຜູ້ໃດເຮັດກ່ອນ ຍ່ອມໄດ້ບົດຮຽນກ່ອນ ແລະ ປັບຕົວໄດ້ດີ...ອົງກອນຕ້ອງພະຍາຍາມເບີ່ງທຸກບາດກ້າວຂອງວິກິດໃຫ້ເປັນໂອກາດຢູ່ສະເໝີ...