...ສະຖານະການຂອງການແພ່ລະບາດຂອງໂຄໂລນ່າໄວຣັສໃນໄລຍະນີ້
ກໍ່ສົ່ງຜົນໃຫ້ເກີດການປັບຕົວກັນໃນທຸກເລື່ອງ...ມີຄົນເວົ້າໄວ້ວ່າ ຢາມເກີດພະຍາດລະບາດ
ກໍ່ຈະເຮັດໃຫ້ເກີດຄວາມປ່ຽນແປງຂອງວິຖີຊີວິດສະເໝີ ຫຼາຍໆ ຄົນຄົງຈະເຂົ້າໃຈດີ ຍ້ອນເຮົາກຳລັງຢູ່ໃນສະຖານະການແບບນັ້ນ...
...ການເຮັດວຽກກໍ່ຄືກັນ ມີທາງເລືອກໜຶ່ງທີ່ມີຄົນເວົ້າກັນຫຼາຍ
ແມ່ນ ການເຮັດວຽກຫ້ອງການ ຢູ່ເຮືອນ Work from
home (WFH)...ການເຮັດວຽກແບບນີ້ ໝາຍເຖີງ
ການເຮັດວຽກທີ່ຫ້ອງການໄດ້ມອບໝາຍໃຫ້ພະນັກງານ ແລະ ມີຄວາມຈຳເປັນວ່າຈະຕ້ອງໃຊ້ສະມາທິສຸມໃສ່ເພື່ອໃຫ້ໄດ້ປະສິດທິພາບ
ແລະ ປະສິດທິຜົນ ອົງການຈຶງອະນຸຍາດໃຫ້ເຮັດວຽກຢູ່ເຮືອນໄດ້ ຕາມໄລຍະເວລາທີ່ຕົກລົງກັນ...
...ແນ່ນອນລ່ະວ່າການເຮັດວຽກແບບນີ້ກໍ່ຍ່ອມມີຜົນດີ ແລະ ຜົນເສຍ
ເປັນເລື່ອງທຳມະດາ ເຊີ່ງກໍ່ຂຶ້ນຢູ່ກັບແຕ່ລະອົງກອນຈະມີມາດຕະການແນວໃດ...ໃນບົດຄວາມຕອນນີ້
ຜູ້ຂຽນຂໍນຳສະເໜີວ່າ ເຮົາຈະມີວິທີການແນວໃດທີ່ຈະເຮັດໃຫ້ເກີດປະສິດທິພາບ ແລະ
ປະສິດທິຜົນທີ່ສຸດ...
...ອັນດັບທີ່ໜຶ່ງ...ແມ່ນຕ້ອງພິຈາລະນາຕົວເອງວ່າ ລະດັບຄວາມຮູ້
ຄວາມສາມາດຂອງຕົວເອງ ຢູ່ໃນລະດັບໃດ ມີປະສົບການໜ້ອຍຫຼາຍເທົ່າໃດ ຍ້ອນວ່າ
ການເຮັດວຽກຢູ່ເຮືອນນັ້ນ ເຮົາບໍ່ໄດ້ມີຜູ້ໃດຄອຍໃຫ້ຄຳແນະນຳກັບເຮົາ ເຮົາຕ້ອງເຮັດຕາມທີ່ມອບໝາຍ
ຕ້ອງຕັດສິນໃຈເອງ ດັງນັ້ນ ຖ້າເຮົາມີຄວາມຮູ້ຄວາມສາມາດ ມີປະສົບການໃນເລື່ອງນັ້ນຫຼາຍພໍທີ່ຈະເພີ່ງພາຕົວເອງໄດ້
ກໍ່ຈະມີຄວາມເໝາະສົມທີ່ທ່ານຈະເຮັດວຽກຢູ່ບ້ານໄດ້ດີ...
...ອັນດັບທີ່ສອງ...ທ່ານຈະຕ້ອງເປັນຄົນທີ່ມີວິໄນໃນຕົວເອງ ມີຄວາມຮັບຜິດຊອບຫຼາຍ
ເຊີ່ງທ່ານຈະຕ້ອງເຮັດເລື່ອງຕໍ່ໄປນີ້...
1. ເປົ້າໝາຍຂອງວຽກແມ່ນຫຍັງ ແມ່ນຫຍັງທີ່ທ່ານຈະຕ້ອງບັນລຸໃນການເຮັດວຽກໃນວັນນັ້ນ.
2. ຕ້ອງຂຽນ “ສິ່ງທີ່ຕ້ອງເຮັດ” ເພື່ອໃຫ້ເຫັນລາຍການທີ່ຊັດເຈນວ່າຈະຕ້ອງເຮັດຫຍັງໃຫ້ສຳເລັດແດ່...
3. ຕ້ອງຄິດຢູ່ສະເໝີວ່າ ເຮົາຕ້ອງເຮັດວຽກໃນວັນນັ້ນ ເຊີ່ງບໍ່ແມ່ນວັນຢຸດ...ສ່ວນຫຼາຍຢາມເຮັດວຽກຢູ່ເຮືອນ
ຄົົນຈະຄິດວ່າ ເຮັດຕົວຕາມສະບາຍ ແຕ່ວ່າບາງເທືອອາດຈະຍາກກວ່າເຮັດວຽກຢູ່ຫ້ອງການ
ຍ້ອນວ່າບໍ່ມີຄົນຄຸມ...ການເຮັດວຽກຢູ່ເຮືອນ ເປັນແຄ່ການປ່ຽນບ່ອນເຮັດວຽກ
ປ່ຽນບັນຍາກາດເຮັດວຽກ ແຕ່ຄວາມຮັບຜິດຊອບຍັງຄືເກົ່າ ຫຼື ຫຼາຍກວ່າເກົ່າອີກ...
4. ກຳນົດເວລາເລີ່ມຕົ້ນເຮັດວຽກ ເວລາພັກຜ່ອນ ເວລາກິນເຂົ້າ
ໃຫ້ແທດເໝາະ...ບາງເທືອການເຮັດວຽກຢູ່ບ້ານ ອາດຈະໜັກກວ່າຢູ່ຫ້ອງການ ຍ້ອນວ່າມີເວລາຫຼາຍ
ແລະ ບໍ່ໄດ້ແບ່ງເວລາໃຫ້ດີ ບາງເທືອອາດຈະເຮັດວຽກໜັກກວ່າຢູ່ຫ້ອງການ...
...ອັນດັບທີ່ສາມ...ພ້ອມນຳໃຊ້ເທັກໂນໂລຍີ ຍ້ອນວ່າ ຕ້ອງມີການສື່ສານຢູ່ຕະຫຼອດກັບທີມງານ
ການສົ່ງວຽກ ການສື່ສານຕ່າງໆ ກໍ່ຕ້ອງໃຊ້ເຄື່ອງມື ອຸປະກອນຕ່າງໆ ເຂົ້າມາຊ່ວຍ...
...ການເຮັດວຽກຢູ່ເຮືອນ ອາດຈະບໍ່ແມ່ນຄຳຕອບສຸດທ້າຍສຳລັບທຸກຄົນ ກໍ່ໃຫ້ພິຈາລະນາເບິ່ງຈຸດປະສົງທີ່ແທ້ຈິງວ່າແມ່ນຫຍັງແທ້ ມີຄວາມຈຳເປັນສ່ຳໃດ...ການເຮັດວຽກຢູ່ຫ້ອງການ ກໍ່ຈະໄດ້ບັນຍາກາດ ໄດ້ຄວາມສຳພັນກັບເພື່ອນຮ່ວມງານ ໄດ້ສົນທະນາ ເກີດຄວາມຄິດໃໝ່ໆ ໃນການເຮັດວຽກໄດ້ພະລັງອີກແບບໜຶ່ງ ແຕ່ກໍ່ອາດຈະວຸ່ນວາຍແດ່...ການເຮັດວຽກຢູ່ບ້ານ ກໍ່ຈະໄດ້ຄວາມສະຫງົບງຽບ ແລະ ມີສະມາທິ ແຕ່ກໍ່ຈະເຫງົາແດ່...ທຸກເລື່ອງຍ່ອມມີສອງດ້ານສະເໝີ...
ไม่มีความคิดเห็น:
แสดงความคิดเห็น