“ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” (ຕອນທີ 1)

ໃນຍຸກທີ່ການຮຽນຮູ້ເກີດຂຶ້ນຢູ່ຕະຫຼອດເວລາ, ການຝຶກອົບຮົມແບບເດີມໆ ທີ່ຄູຝຶກເປັນໃຈກາງ ອາດຈະບໍ່ແມ່ນຄໍາຕອບແລ້ວ. “ຄູຝຶກ ຜູ້ນໍາພາການຮຽນຮູ້ແບບມີສ່ວນຮ່ວມ" ແມ່ນບົດບາດທີ່ອົງການຈັດຕັ້ງສະໄຫມໃຫມ່ຕ້ອງການ, ປ່ຽນຈາກ "ການສອນ" ມາເປັນ "ການສ້າງປະສົບການຮ່ວມກັນ".

“ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” (Facilitative Trainer) ແມ່ນຜູ້ໃດ?

“ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” ແມ່ນ ບຸກຄົນທີ່ເຮັດຫນ້າທີ່ຫຼາຍກວ່າ "ຄູຝຶກ" ແຕ່ເປັນ "ຜູ້ອໍານວຍຄວາມສະດວກ" ໃນຂະບວນການຮຽນຮູ້, ເອົາໃຈໃສ່ຜູ້ຮຽນ ໃຫ້ຜູ້ຮຽນເປັນໃຈກາງການຮຽນຮູ້, ຊຸກຍູ້ການມີສ່ວນຮ່ວມ, ແລກປ່ຽນຄໍາຄິດເຫັນ, ແລະ ສ້າງຄວາມຮູ້ດ້ວຍຕົວເອງ.

ຄວາມສຳຄັນຂອງ “ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ”

1.   ສ້າງການຮຽນຮູ້ແບບມີສ່ວນຮ່ວມ: ຜູ້ຮຽນໄດ້ຄິດ, ວິເຄາະ, ຖາມ, ຕອບ, ສະແດງຄວາມຄິດເຫັນ ແລະ ແລກປ່ຽນການຮຽນຮູ້ເຊິ່ງກັນແລະກັນ. ຜົນກໍ່ຄື ການຮຽນຮູ້ແມ່ນມີຄວາມຫມາຍ ແລະ ໃຊ້ການໄດ້ແທ້.

2.   ກະຕຸກຊຸກຍູ້ຜູ້ຮຽນໃຫ້ນຳໃຊ້ທ່າແຮງທີ່ມີ: ຜູ້ຮຽນໄດ້ຝຶກທັກສະ ເຊັ່ນ: ການຄິດວິຈານ, ການແກ້ໄຂບັນຫາ,ການເຮັດວຽກເປັນທີມງານ ແລະ ການສື່ສານ.

3.   ສ້າງສະພາບແວດລ້ອມການຮຽນຮູ້ໃນທາງບວກ: ຜູ້ຮຽນຮູ້ສຶກຜ່ອນຄາຍ, ປອດໄພ, ແລະ ກ້າສະແດງອອກ. ເຮັດໃຫ້ເກີດການຮ່ວມມື ແລະ ຄວາມເປັນເອກະພາບໃນກຸ່ມ.

4.   ການຝຶກອົບຮົມທີ່ມີປະສິດທິພາບ: ການຮຽນຮູ້ທີ່ມີສ່ວນຮ່ວມຊ່ວຍໃຫ້ຜູ້ຮຽນ "ຈື່ຈໍາ" ແລະ "ນໍາໃຊ້" ດີກວ່າຟັງການບັນລະຍາຍພຽງຢ່າງດຽວ.

ພັດທະນາຕົວທ່ານເອງໃຫ້ເປັນ “ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” ມືອາຊີບ.

1.   ການປັບປ່ຽນ “ກອບຄວາມຄິດ”: ປ່ຽນຈາກ "ຄູສອນ" ມາເປັນ "ຜູ້ອໍານວຍຄວາມສະດວກ".

2.   ຮຽນຮູ້ເຕັກນິກ: ຝຶກການນຳໃຊ້ເຕັກນິກການອໍານວຍຄວາມສະດວກ ເຊັ່ນ:

o   ການຕັ້ງຄໍາຖາມ: ຄໍາຖາມທີ່ເປີດກວ້າງ ຄໍາຖາມທີ່ກະຕຸ້ນຄວາມຄິດ.

o   ການຟັງຢ່າງຕັ້ງໃຈ: ເອົາໃຈໃສ່, ເຂົ້າໃຈ ແລະ ຕອບສະໜອງ.

o   ການໃຊ້ພະລັງກຸ່ມ: ການຄວບຄຸມ, ສ້າງແຮງຈູງໃຈ ແລະ ສົ່ງເສີມ.

o   ການສ້າງບັນຍາກາດ: ຜ່ອນຄາຍ, ປອດໄພ, ແລະ ເປັນມິດ.

3.   ການປະຕິບັດຢ່າງຕໍ່ເນື່ອງ: ເຮັດຕົວຈິງ, ທົດລອງ, ຮຽນຮູ້, ແລະ ປັບປຸງ.

ບົດສົ່ງທ້າຍ.

ເພື່ອເປັນ “ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” ທ່ານຈໍາເປັນຕ້ອງມີທັງ "ຈິດໃຈ" ແລະ "ທັກສະ", ເລີ່ມຕົ້ນດ້ວຍ "ຄວາມຄິດເປີດກວ້າງ", ຍອມຮັບຄວາມແຕກຕ່າງ, ແລະ ໃຫ້ຄວາມສຳຄັນກັບຜູ້ຮຽນ, ພ້ອມທັງ "ທັກສະການອໍານວຍຄວາມສະດວກ" ທີ່ໄດ້ຮັບການປະຕິບັດຈົນເກີດຄວາມຊ່ຽວຊານ ມື້ນັ້ນລ່ະ ທ່ານຈະກາຍເປັນ “ຄູຝຶກ ຜູ້ນຳພາການຮຽນຮູ້ແບບມີສ່ວນຮ່ວມ” ທີ່ສ້າງການປ່ຽນແປງຢ່າງແທ້ຈິງ.