ບົດຮຽນການເປັນຄູຝຶກ

...ການເປັນຄູຝຶກ ກໍບໍ່ໄດ້ແຕກຕ່າງຈາກການເຮັດອາຊີບອື່ນໆ...ມີການຮຽນຮູ້ ມີການສະສົມປະສົບການ ມີການພັດທະນາອາຊີບຂອງຕົວເອງ ມີການເຕີບໃຫຍ່ທາງຈິດແລະວິນຍານ ພາຍໃຕ້ເງື່ອນໄຂຂອງອາຊີບເຊັ່ນດຽວກັນ.

...ຈາກການປະກອບອາຊີບເປັນຄູຝຶກຂອງຜູ້ຂຽນ ກໍພໍຈະສະຫຼຸບເປັນບົດຮຽນ ເພື່ອເປັນແນວທາງໃຫ້ກັບຜູ້ທີ່ສົນໃຈໃນການພັດທະນາຕົວເອງໃນສາຍທາງອາຊີບນີ້...

...1. ມີຈຸດເລີ່ມຕົ້ນທີ່ຄວາມມັກຂອງຕົວເອງ ມີຄວາມຢາກເປັນຄູຝຶກເປັນຕົ້ນທຶນ...

...2. ຕ້ອງມ່ວນກັບການຮຽນຮູ້...ເຮົາສາມາດຮຽນຮູ້ໄດ້ກັບທຸກສິ່ງທີ່ຜ່ານເຂົ້າມາໃນຊີວິດຂອງເຮົາ...ແລະ ນຳສະເໜີມຸມມອງທີ່ເປັນຕົວຂອງຕົວເອງ ໃນມຸມທີ່ແຕກຕ່າງ ຫຼື ເຕີມເຕັມ ໃຫ້ກັບຜູ້ອື່ນ...

...3. ອ່ານ ອ່ານ ແລະ ອ່ານ...ການອ່ານປື້ມຫຼາຍຫົວ ຫຼາຍເລື່ອງ ຫຼາຍຮູບແບບ ເຮັດໃຫ້ເຮົາມີເລື່ອງເລົ່າປະກອບກັບເນື້ອໃນທີ່ເຮົາສອນ ຍ້ອນວ່າໃນທຸກເລື່ອງທີ່ອ່ານ ຍ່ອມມີມຸມທີ່ເຮົາສາມາດນຳມາເຊື່ອມໂຍງກັບເລື່ອງທີ່ເຮົາກຳລັງນຳສະເໜີ ບໍ່ມຸມໃດກໍມຸມໜຶ່ງ...

...4. ຖ້າຄິດວ່າຕົວເອງຮູ້ເບິ່ດທຸກເລື່ອງແລ້ວ ເຮົາກໍຈະບໍ່ມີໄຟໃນການຢາກຮູ້ ຢາກເຫັນ ແນວໃໝ່ໆ...

...5. ການກະກຽມຕົວເອງໃຫ້ດີ ໃຫ້ພ້ອມ ເປັນເລື່ອງທີ່ມີຄວາມສຳຄັນທີ່ສຸດ...ຖ້າມື້ໃດ ເຮົາຮູ້ສຶກວ່າຕົວເອງເກັ່ງແລ້ວ ຄັກແລ້ວ ມື້ນັ້ນກໍສະແດງວ່າ ເຮົາຖືເບົາກັບການພັດທະນາຕົວເອງ...

...6. ທຸກເລື່ອງທີ່ເກີດຂຶ້ນ ເປັນການທົດສອບຄວາມເຂັ້ມແຂງທາງຈິດແລະວິນຍານຂອງເຮົາ...ແມ່ນ ການທົດສອບຄວາມສັດທາຂອງເຮົາຕໍ່ເປົ້າໝາຍໃນການເປັນຄູຝຶກທີ່ດີຂອງເຮົາ...ດັງນັ້ນ ຈົງນ້ອມຮັບເອົາບົດຮຽນ ແລະ ປະສົບການທີ່ເກີດຂຶ້ນກັບເຮົາຢ່າງເຄົາລົບ...ການເຄົາລົບແມ່ນການເຫັນຄຸນຄ່າຂອງສິ່ງນັ້ນຢ່າງແທ້ຈິງ...

...7. ຕ້ອງໃຈເຍັນ ສະສົນປະສົບການ ແລະ ຮຽນຮູ້...ບໍ່ມີຫຍັງທີ່ເຮົາຈະໄດ້ມາງ່າຍໆ...ກວ່າຈະເປັນຄູຝຶກທີ່ໄດ້ຮັບການຍອມຮັບນັ້ນ ບໍ່ແມ່ນເກີດຂຶ້ນໄດ້ພາຍໃນວັນຫຼືສອງວັນ ແຕ່ເປັນເລື່ອງທີ່ເກີດຂຶ້ນຢູ່ຕະຫຼອດເວລາຂອງການມີຊີວິດຢູ່...

...ຂໍໃຫ້ໂຊກດີ ກັບການພັດທະນາຕົວເອງ ສູ່ການເປັນຄູຝຶກທີ່ມີປະສິດທິພາບ ປະສິດທິຜົນ ແລະ ເປັນທີ່ຍອມຮັບ...